ទីក្រុងស៊ីដនី, ប្រទេសអូស្ត្រាលី៖ ថ្មីៗនេះ, បុរសជនជាតិអូស្ត្រាលីម្នាក់បានបំបែកកំណត់ត្រាពិភពលោក ក្នុងនាមជាអ្នកជិះក្ដារបន្ទះបណ្ដែតនៅលើទឹករលកសមុទ្របានយូរ និងឆ្ងាយបំផុតនៅក្នុងប្រវត្តិសាស្ត្រពិភពលោក។ លោកប្លេក ចនស្តុន (Blake Johnston)…
ទីក្រុងស៊ីដនី, ប្រទេសអូស្ត្រាលី៖ ថ្មីៗនេះ, បុរសជនជាតិអូស្ត្រាលីម្នាក់បានបំបែកកំណត់ត្រាពិភពលោក ក្នុងនាមជាអ្នកជិះក្ដារបន្ទះបណ្ដែតនៅលើទឹករលកសមុទ្របានយូរ និងឆ្ងាយបំផុតនៅក្នុងប្រវត្តិសាស្ត្រពិភពលោក។ លោកប្លេក ចនស្តុន (Blake Johnston) អាចជិះក្ដារបន្ទះបណ្ដែតខ្លួននៅលើរលកសមុទ្ររយៈពេលសាមសិបម៉ោង និងដប់មួយនាទី នៅលើតំបន់មាត់សមុទ្រក្រូនូឡា (Cronulla)។ ពិតជាធម្មតាទេ! កំណត់ត្រាពិភពលោកនេះបើទុកជាទៅថ្ងៃមុខក៏មិនងាយអ្នកណាអាចបំបែកបានដោយងាយៗនោះទេ បើយោងតាមការប្រមើលមើលរបស់មនុស្សភាគច្រើន។
លោកប្លេក ចនស្តុន ប្រាប់អ្នកកាសែតថាគាត់នឹងខិតខំធ្វើកិច្ចការនេះជាបន្តទៀតដើម្បីកសាងកេរ្តិ៍ឈ្មោះឱ្យបានរុងរឿងនាពេលអនាគត។ លោកជិះក្ដារបណ្ដែតទឹក ឬ surfing នេះគោលដៅសំខាន់គឺរៃអង្គាសថវិកាពីសប្បុរសជនដើម្បីជួយមូលនិធិមួយចំនួន។ ឥឡូវនេះ គាត់ប្រមូលបានថវិកា២,៤សែនដុល្លារអូស្ត្រាលី (ជាង១,៦សែនដុល្លារអាមេរិក)។ ដោយមានជំនួយពីការបាញ់ភ្លើងហ្វាផងនោះ, លោកចនស្តុនបានខិតខំជិះក្ដារបណ្ដែតទឹកទាំងយប់ថែមទៀតដើម្បីធ្វើយ៉ាងណាជិះក្ដារឱ្យបានយូរបំផុតតាមដែលអាចធ្វើទៅបាន។
បុរសវ័យ៤០ឆ្នាំរូបនេះធ្លាប់ជាអ្នកគាំទ្រយ៉ាងសកម្មចំពោះការជិះក្ដារលើទឹក និងជាអ្នកមានបទពិសោធជ្រៅជ្រះនៅក្នុងផ្នែករត់ចម្ងាយផងដែរ។ គាត់សុខចិត្តប្រឈមនឹងឧបសគ្គជាច្រើនដូចជា៖ ការប្រឈមនឹងងងឹតភ្នែក, ការប៉ះពាល់ក្រដាស់ត្រចៀក, ការខ្សោះជាតិទឹកនៅក្នុងខ្លួន, ការអត់ងងុយ, ការបាត់កម្ដៅពីក្នុងខ្លួន, ត្រីឆ្លាម និងសត្វខ្ញែរសមុទ្រដេញខាំជាដើម។ នៅពេលកំពុងជិះក្ដារបណ្ដែតខ្លួនលើទឹកសមុទ្រសុខៗ គាត់ផុសឡើងមកប៉ែកខាងលើនៅវេលាថ្ងៃត្រង់នៅថ្ងៃសុក្រនេះដើម្បីឱ្យគ្រូពេទ្យពិនិត្យសុខភាព និងបន្តក់ទឹកថ្នាំសម្រាប់ជំនួយកែវភ្នែក។
លោកបឹន (Ben) ដែលត្រូវជាប្អូនប្រុសរបស់លោកប្លេក ចនស្តុន ប្រាប់ថានៅម៉ោង២រំលងអាធ្រាត្រឈានចូលព្រឹកថ្ងៃសុក្រនេះ, គាត់ក៏ជិះក្ដារបណ្ដែតទឹកអមដំណើរជាមួយលោកចនស្តុនផងដែរ។ នៅតាមផ្លូវធ្វើដំណើរនោះ, មានសត្វខ្ញែរសមុទ្រជាច្រើន។ ដូច្នេះ សំណាងហើយដែលពួកយើងមិនត្រូវពួកវាវាយប្រហារ។ មុនពេលចាប់ផ្ដើមបំបែកកំណត់ត្រានេះ, លោកចនស្តុនសង្ឃឹមថាគាត់អាចធ្វើកិច្ចការនេះបាន។ តាមចិត្តរបស់គាត់, គាត់ចង់ជិះក្ដាររហូតដល់សែសិបម៉ោងឯណោះ។ គាត់សង្ឃឹមថាតាមរយៈកិច្ចការនេះ, គាត់អាចចូលរួមជាមួយអ្នកឯទៀត និងនាំមកនូវការផ្លាស់ប្ដូរមុខមាត់ថ្មីនាពេលអនាគត។
លោកចនស្តុនកំពុងរៃអង្គាសថវិកាសម្រាប់ដាក់ចូលទៅក្នុងមូលនិធិ Chumpy Pullin Foundation ដើម្បីជាការរម្លឹកទៅដល់វិញ្ញាណក្ខន្ធរបស់លោក អាឡិច ឈុំពី ភូលីន (Alex Chumpy Pullin) ជាកីឡាករឆ្នើមដែលធ្លាប់ចូលរួមប្រកួតអូឡាំពិក និងបានលង់ទឹកស្លាប់កាលពីឆ្នាំ២០២០ នៅពេលគាត់នេសាទត្រីដោយប្រើវិធី «ហែលទឹកចាក់ត្រីនឹងស្ន» (spearfishing)។ លោកចនស្តុនក៏រកថវិកាជួយទ្រទ្រង់មូលនិធិសម្រាប់លើកកម្ពស់សុខភាពផ្លូវចិត្តផងដែរ ដើម្បីជាការរម្លឹកវិញ្ញាណក្ខន្ធរបស់ឪពុកគាត់ដែលធ្វើអត្តឃាតកាលពីមួយទសវត្សមុនដោយសារវិបត្តិផ្លូវចិត្ត៕
ប្រភព៖ BBC, CNN
ចែករំលែកព័តមាននេះ