រាជធានីភ្នំពេញ ៖ ក្មេងប្រុសម្នាក់បានស្លាប់ភ្លាមៗនៅនឹងកន្លែង ក្នុងស្ថានភាពរបួសសុសសាច់ និង២នាក់រងរបួសធ្ងន់ រីឯម្នាក់ទៀតរងរបួសស្រាល ខណៈដែលពួកគេមានគ្នា៧នាក់ បានប្រើប្រាស់ចំពាមកៅស៊ូលេងបាញ់ផាវគ្រាប់បែកដាក់គ្នាទៅវិញទៅមក ជាមួយក្មេង១ក្រុមទៀត ដែលជាអ្នកភូមិផ្សេងគ្នា ជាការលេងកម្សាន្តទាំងងងឹតងងល់ នាវេលាយប់ពេលបណ្ដែតដូនតាក្នុងឱកាសថ្ងៃបុណ្យភ្ជុំបិណ្ឌ ។
ពេលនោះ ក្រុមក្មេងរងគ្រោះបានបាញ់តែ១គ្រាប់ម្ដងៗប៉ុណ្ណោះ ជាការលេងសើច ។ ចំណែកឯក្រុមម្ខាងទៀត មិនបានលេងបាញ់ម្ដង១គ្រាប់នោះទេ គឺបានច្នៃចងផាវគ្រាប់បែកនោះផ្អោបជាប់គ្នាជាច្រើនគ្រាប់រុំដោយស្កុត រួចបានបាញ់សំដៅលើក្រុមក្មេងរងគ្រោះបណ្ដាលឲ្យផ្ទុះលាន់ឮដូចគ្រាប់បែកមែនទែន ត្រូវដួលស្លាប់និងរងរបួសរដូករណែលចំនួន៤នាក់ ក្លាយជាសោកនាដកម្មគួរឱ្យសោកស្តាយ ។
ក្រោយពេលកើតហេតុអ្នករងរបួសត្រូវបានក្រុមគ្រួសារបញ្ជូនទៅកាន់មន្ទីរពេទ្យដើម្បីសង្គ្រោះបន្ទាន់ភ្លាមៗដែរ ។ ចំណែកឯក្រុមក្មេងដែលជាអ្នកបាញ់នោះ បាននាំគ្នារត់គេចខ្លួនបាត់អស់ ។ មុននេះអាជ្ញាធរបានដាក់បំរាមមិនឱ្យមានការលក់ផាវគ្រាប់បែកប្រភេទនេះទេ ព្រោះបារម្ភពីគ្រោះថ្នាក់ជាយថាហេតុ បន្ទាប់ពីរថយន្តដឹកផាវគ្រាប់បែកដ៏ច្រើនមួយបានផ្ទុះឆេះខ្ទេចខ្ទីនៅខេត្តបន្ទាយមានជ័យ និងស្លាប់មនុស្សរហូតដល់៣នាក់ស្ទើរតែរកបំណែកសាកសពមិនឃើញផង ។ហេតុកាណ៍នោះបានកើតឡើងនិងបង្កឲ្យមានការភ្ញាក់ផ្អើល កាលពីវេលាម៉ោង៣រំលងអធ្រាត្រឈានចូលថ្ងៃទី២១ កញ្ញា ។
សមត្ថកិច្ចបានឲ្យដឹងថា ក្មេងប្រុសរងគ្រោះដែលស្លាប់នៅនឹងកន្លែងកើតហេតុនោះ ឈ្មោះ វិត សុផល អាយុ១៣ឆ្នាំ ជាសិស្សថ្នាក់ទី៥(ក) រៀននៅសាលាបឋមសិក្សាអង្គស្តុក មានម្តាយឈ្មោះ ជិន អ៊ុក អាយុ៥៣ឆ្នាំ មានមុខរបរលក់បាយ គឺជាស្ត្រីមេម៉ាយដែលត្រូវបានប្តីរត់ចោលទៅមានប្រពន្ធថ្មី តាំងពីក្មេងប្រុសរងគ្រោះរូបនេះ ទើបមានអាយុ២ខែប៉ុណ្ណោះ ។ ចំណែកឯក្មេងប្រុស៣នាក់ ដែលរងរបួសធ្ងន់និងស្រាលនោះ ១-ឈ្មោះ ឃួន តុលា អាយុ១៥ឆ្នាំ ជាសិស្សរៀននៅសាលាជាមួយគ្នា ២-ឈ្មោះ តឿ គុណ អាយុ១៥ឆ្នាំ មានមុរបរនៅផ្ទះ អ្នកទាំង២នាក់រងរបួសធ្ងន់កំពុងសំរាកព្យាបាលនៅមន្ទីពេទ្យ គន្ធបុប្ផាទី៣ និង៣-ឈ្មោះ ផល បញ្ញា អាយុ១៥ឆ្នាំ មានមុខរបរសិស្សថ្នាក់ទី៧(A) សាលាអនុវិទ្យល័យឪឡោក រងរបួសស្រាលហើយពួកគេទាំង៣នាក់នេះ មានទីលំនៅក្នុងភូមិត្រពាំងពោធិ៍ សង្កាត់ឪឡោក ខណ្ឌពោធិ៍សែនជ័យ ។
ប្រភពព័ត៌មានបានឲ្យដឹងថា ដោយឡែកក្រុមក្មេងម្ខាងទៀតដែលច្នៃគ្រាប់បែកនោះបណ្ដាលឲ្យស្លាប់មនុស្សបែបនេះ បានរត់គេចខ្លួនបាត់ស្រមោលអស់ ហើយសមត្ថកិច្ចកំពុងធ្វើការស្រាវជ្រាវដើម្បីតាមចាប់ខ្លួន ។ តាមប្រភព័ត៌មានបានឲ្យដឹងថា នៅវេលាម៉ោង៣ទៀបភ្លឺឈានចូលថ្ងៃទី២១ ខែកញ្ញា ឆ្នាំ២០១៧ នៅមុនកើតហេតុ ក្មេងប្រុសរងគ្រោះទាំង៤នាក់រួមជាមួយនឹងក្មេងនៅក្នុងភូមិជាមួយគ្នា៣នាក់ទៀត ទាំងអស់មានគ្នាចំនួន៧នាក់ ប្រដាប់ដោយចំពាមកៅស៊ូ និងផាវគ្រាប់បែក ក្នុងម្នាក់ៗចាប់ពីជាង១០គ្រាប់ទៅ២០គ្រាប់ បាននាំគ្នាលេងបាញ់ផាវគ្រាប់បែក នៅក្នុងពិធីបណ្ដែតដូនតា នាថ្ងៃបញ្ចប់ពិធីបុណ្យភ្ជុំបិណ្ឌប្រពៃណីព្រះពុទ្ធសាសនា ។ ពេលនោះបានជួបក្រុមម្ខាងទៀត ដោយមិនបានដឹងថា មានគ្នាចំនួនប៉ុន្មាននាក់នោះទេ និងជាអ្នករស់នៅក្នុងភូមិជិតគ្នានោះដែរ។
បន្ទាប់មកពួកគេបានអុជផាវគ្រាប់បែក រួចបានប្រើចំពាមកៅស៊ូបាញ់ដាក់គ្នាទៅវិញទៅមក ប៉ុន្តែក្រុមក្មេងប្រុសរងគ្រោះបាញ់ម្ដងតែ១គ្រាប់ប៉ុណ្ណោះ ។ ចំណែកឯក្រុមម្ខាងទៀតបានច្នៃផាវ ដោយចងផ្អោបជាប់គ្នា៥ទៅ៦គ្រាប់ រួចរុំស្កុតហើយបានអុជរួចបាញ់សំដៅទៅក្រុមក្មេងប្រុសរងគ្រោះ បណ្ដាលឲ្យផ្ទុះត្រូវចំចុងដង្ហើមផុងប៉ុនចានចង្កិះដួលផ្កាប់មុខស្លាប់ម្នាក់់រងរបួសធ្ងន់២នាក់ និងស្រាលម្នាក់បែបនេះតែម្ដង ។
ផាវគ្រាប់បែកដែលបានសម្លាប់មនុស្សនេះ បើតាមការសន្និដ្ឋានមិនត្រឹមតែដាក់ច្រើនគ្រាប់ប៉ុណ្ណោះទេ ពួកគេបានច្នៃដោយបានយកផាវ២គ្រាប់ ធ្វើជា១គ្រាប់ថែមទៀត គឺបានគាស់បើកផាវយករំសេវចាក់បញ្ចូលគ្នា ដើម្បីឲ្យមានកម្លាំងផ្ទុះខ្លាំង មិនតែប៉ុណ្ណោះផាវគ្រាប់បែកនោះក៏ខុសគ្នាដែរ គឺមួយប្រភេទ២ឬ៣គ្រាប់ តម្លៃ៥រយរៀលដែលមានកម្លាំងមិនសូវជាខ្លាំងប៉ុន្មានទេ និងមួយប្រភេទទៀត១គ្រាប់តម្លៃ៥រយរៀល ដែលមានកម្លាំងខ្លាំង ហើយពួកគេបានយកមកច្នៃចងផ្អោបជាប់គ្នាទើបផ្ទុះយ៉ាងកក្រើកបណ្ដាលឱ្យមានសោកនាដកម្មយ៉ាងនេះ ។
ប៉ូលិសស្រុកអង្គស្នួលបង្ក្រាបក្រុមក្មេងលេងផាវនិងរឹបអូសពីផ្ទះលក់
ខេត្តកណ្តាល ៖ កម្លាំងនគរបាលព្រហ្មទណ្ឌស្រុកអង្គស្នួល បានសហការជាមួយកម្លាំងនគរបាលប៉ុស្ដិ៍ចំនួន៤រួមមាននគរបាលប៉ុស្ដិ៍ឆក់ឈើនាង ប៉ុស្ដិ៍ពើក ប៉ុស្ដិ៍ក្រាំងម្កាក់ និងប៉ុស្ដិ៍ព្រៃពួច ចុះធ្វើការបង្ក្រាបបំបែកហ្វូងក្មេងៗដែលនាំគ្នាដុតផាវក្នុងពិធីបណ្ដែតដូនតា ក្រោយថ្ងៃភ្ជុំបិណ្ឌ គឺចាប់ពីវេលាម៉ោង១យប់រំលងអធ្រាត្រឈានចូលថ្ងៃទី២១ កញ្ញា រហូតដល់ព្រឹកថ្ងៃដដែលនោះឃាត់ខ្លួន៨នាក់ និងដកហូតផាវគ្រាប់បែកជាច្រើនគ្រាប់ រួមជាមួយផាវកាំជ្រួចជាច្រើនដើម និងចំពាមកៅស៊ូមួយចំនួន ។
មិនតែប៉ុណ្ណោះក្រោយពេលឃាត់ខ្លួនធ្វើការសាកសួរដឹងពីទីតាំងលក់ផាវ កម្លាំងនគរបាលខាងលើក៏បានចុះទៅធ្វើការដកហូត យកពីកន្លែងលក់នោះបានជាច្រើនថែមទៀត ។ នគរបាលបានឱ្យដឹងថា ប្រតិបត្តិការបង្ក្រាបការដុតផាវខាងលើនោះ គឺធ្វើឡើងក្នុងគោលបំណងទប់ស្កាត់រាល់បទល្មើសនិងគ្រោះថ្នាក់ជាយថាហេតុ ដល់អាយុជីវិតរបស់ពួកគេនិងអ្នកដ៏ទៃផងដែរ ព្រោះថ្មីៗនេះមានអ្នកស្លាប់និងរងរបួសដោយសារតែផាវគ្រាប់បែកនេះជាបន្តបន្ទាប់ ។ ថ្វីដ្បិតតែនៅក្នុងភូមិសាស្ត្រស្រុកអង្គស្នួល មិនទាន់មានអ្នកស្លាប់និងរបួសដោយសារវា ប៉ុន្តែនៅកន្លែងផ្សេងកើតឡើងរួចមកហើយ ។ មិនតែប៉ុណ្ណោះមុននិងឈានដល់ការចុះបង្ក្រាបនោះនគរបាលប៉ុស្ដិ៍ក៏ដូចជានគរបាលស្រុក បានធ្វើការផ្សព្វផ្សាយនិងណែនាំដល់អ្នកលក់និងហាមឃាត់មិនឱ្យលក់បន្តទៀត ព្រមទាំងណែនាំប្រជាពលរដ្ឋឱ្យប្រាប់កូនចៅកុំឱ្យលេងគ្រឿងផ្ទុះគ្រប់ប្រភេទ ប៉ុន្តែនៅតែមិនព្រមស្ដាប់ទាល់តែសោះ ។ ទីបំផុតនៅតែមានសម្លេងផ្ទុះយ៉ាងកក្រើកដដែល ទើបនគរបាលសម្រេចចិត្តធ្វើការបង្ក្រាបតែម្ដង ។
ប្រភពដដែលបានបន្តទៀតថា បន្ទាប់មកនគរបាលបានបន្តទៅកាន់ឃុំព្រៃពួច ឃុំក្រាំងម្កាក់ និងឃុំពើកជាបន្តទៀត តែឃាត់ខ្លួនមនុស្សអត់បានទេ ។ ខណៈនោះនៅក្នុងឃុំព្រៃពួច កម្លាំងបានរឹបអូសផាវគ្រាប់បែកចំនួន១៥០គ្រាប់, ដែកកេះ២, ចំពាមកៅស៊ូ២, កាបូបស្ពាយ១ ហើយនៅក្នុងឃុំក្រាំងម្កាក់ ដកហូតបានផាវគ្រាប់បែកចំនួន១១៤គ្រាប់,ព្រមទាំងឃុំពើក ដកហូតបានផាវគ្រាប់បែកចំនួន១០០គ្រាប់ដោយក្មេងៗទាំងនោះបោះចោលហើយរត់គេចខ្លួនបាត់អស់ ។
ចំណែកក្មេងៗដែលត្រូវឃាត់ខ្លួននៅក្នុងឃុំឆក់ឈើនាងនោះបានសារភាពថា ខ្លួនបានទិញមកពីឈ្មោះ អុល នៅភូមិត្រពាំងថ្លាន់ សង្កាត់ពន្សាំង ខណ្ឌព្រែកព្នៅ រាជធានីភ្នំពេញ និងផាវគ្រាប់បែកបានទិញមកពីផ្សារបែកចាន ឃុំបែកចាន និងផ្សារអង្គស្នួល ឃុំពើក ស្រុកអង្គស្នួល ខេត្តកណ្តាល ដើម្បីដុតលេងនាពេលបណ្ដែតដូនតាថ្ងៃភ្ជុំបិណ្ឌ ។
នគរបាលបានបន្តទៀតថា ក្រោយពីបានចម្លើយសារភាពហើយរហូតដល់ម៉ោង៨ព្រឹកថ្ងៃដដែលកម្លាំងនគរបាលព្រហ្មទណ្ឌស្រុកបានសហការជាមួយកម្លាំងប៉ុស្តិ៍រដ្ឋបាលពើក រួមជាមួយមន្ត្រីក្រុមប្រឹក្សាឃុំ និងលោកមេភូមិចុះទៅតូបលក់ផាវនៅក្នុងផ្សារអង្គស្នួល ដែលមានម្ចាស់ឈ្មោះ គង់ លី ភេទប្រុស អាយុ៥២ឆ្នាំ មានទីលំនៅភូមិអង្គស្នួលទី៣ ឃុំពើក ស្រុកអង្គស្នួល ខេត្តកណ្តាល មុខរបរលក់ចាប់ហួយដោយដកហូតបានផាវគ្រាប់បែកចំនួន៣៦កញ្ចប់ស្មើ៣.៦០០គ្រាប់ ។ ផាវឈើគូសចំនួន១៦០ប្រអប់ស្មើនិង៣.២០០ដើម ។ កាំជ្រួចចំនួន១២ដុំស្មើនិង១៤៤ដើម ព្រមទាំងបានធ្វើការអប់រំនិងធ្វើកិច្ចសន្យាបញ្ឈប់ការទិញយកមកលក់បន្តទៀត ។
មន្ត្រីនគរបាលបានបញ្ជាក់បន្ថែមទៀតថា នៅសល់ទីតាំងលក់ផាវខ្លះមិនទាន់បានចុះទៅបង្ក្រាបនៅឡើយ ហើយសរុបលទ្ធផលនៅក្នុងកិច្ចប្រតិបត្តិការខាងលើនោះ កម្លាំងនគរបាលបានដកហូតបានផាវគ្រាប់បែក ៣៦កញ្ចប់ស្មើនិង៤.១៥០គ្រាប់, ផាវឈើគូស១៦០ប្រអប់ ស្មើនឹង៣.២០០ដើម ។ កាំជ្រួចធ្វើក្នុងស្រុក៤៧ដើម ។ កាំជ្រួចខ្នាតតូច១២ដុំស្មើនឹង១៤៤ដើមផលិតនៅប្រទេសថៃ ។ ចំពាមកៅស៊ូចំនួន៥ ដែកកេះចំនួន៧, កាបូបដាក់ផាវចំនួន៣ ។ ដោយឡែកក្មេងទាំង៨នាក់ខាងលើ កម្លាំងកំពុងសុំគោលការណ៍ទៅថ្នាក់លើដើម្បីអប់រំនិងធ្វើកិច្ចសន្យាប្រគល់ជូនអាណាព្យាបាលវិញ ៕
ចែករំលែកព័តមាននេះ