ខេត្តរតនគិរី ៖ ឯកឧត្តម ញ៉ែម សំអឿនអភិបាលនៃគណៈអភិបាលខេត្តរតនគិរី នៅព្រឹកថ្ងៃទី២៥ ខែកញ្ញា ឆ្នាំ២០២៥ បានដឹកនាំក្រុមការងារចុះពិនិត្យផ្ទាល់ពីស្ថានភាព នៃផលប៉ះពាល់ដោយសារជំនន់ទឹកភ្លៀង…
ខេត្តរតនគិរី ៖ ឯកឧត្តម ញ៉ែម សំអឿនអភិបាលនៃគណៈអភិបាលខេត្តរតនគិរី នៅព្រឹកថ្ងៃទី២៥ ខែកញ្ញា ឆ្នាំ២០២៥ បានដឹកនាំក្រុមការងារចុះពិនិត្យផ្ទាល់ពីស្ថានភាព នៃផលប៉ះពាល់ដោយសារជំនន់ទឹកភ្លៀង ធ្វើអោយទន្លេស្រែពកហក់ឡើងលិច ភូមិដ្ឋាន ស្រែចំការ និងហេដ្ឋារចនាសម្ព័ន្ធនៅក្នុងភូមិសាស្ត្រ ស្រុកលំផាត់ ក្នុងខេត្តរតនគិរី ។ នេះបើយោងតាមផេក មន្ទីរព័ត៌មានខេត្តរតនគិរីបានផ្សាយនាថ្ងៃល្ងាចថ្ងៃទី២៥ ខែកញ្ញានេះ ។
មន្ទីរព័ត៌មានខេត្តរតនគិរី បានបញ្ជាក់ថា ក្នុងឱកាសនៃការចុះពិនិត្យផ្ទាល់អំពីស្ថានភាពនៃផលប៉ះពាល់ដោយសារជំនន់ទឹកភ្លៀង នៅក្នុងភូមិសាស្ត្រស្រុកលំផាត់ នាពេលនេះ ឯកឧត្តមអភិបាលខេត្ត បានណែនាំដល់អាជ្ញាធរមូលដ្ឋាន និងមន្ទីរជំនាញពាក់ព័ន្ធ ត្រូវរួមសហការគ្នាធ្វើការវាយតម្លៃនៃការខូចខាតឱ្យបានច្បាស់លាស់ និងលើកផែនការជាក់លាក់ ដើម្បីជាវិធានការជួយដល់ប្រជាពលរដ្ឋ ព្រមទាំងការងារជួសជុលហេដ្ឋារចនាសម្ព័ន្ធក្នុងមូលដ្ឋាន ដំណាំស្រូវឱ្យបានទាន់ពេលវេលា និងឆាប់រហ័ស ព្រមទាំងសំណូមពរឱ្យអាជ្ញាធរមូលដ្ឋាន និងប្រជាពលរដ្ឋបន្តបង្កើនការប្រុងប្រយ័ត្នពីគ្រោះថ្នាក់ផ្សេងៗ ដែលអាចកើតមានឡើងជាយថាហេតុ និង ត្រៀមឆ្លើយតបជាប្រចាំ ជាពិសេសទីតាំងដែលងាយរងការជន់លិច ។
ឯកឧត្តមក៏បានជំរុញឱ្យអាជ្ញាធរមូលដ្ឋាន ត្រូវមានភាពម្ចាស់ការ ក្នុងពេលមានគ្រោះមហន្តរាយធម្មជាតិកើតមានក្នុងភូមិសាស្ត្រខ្លួន គឺត្រូវប្រើឲ្យអស់គ្រប់វិធានការ ក្នុងការដោះស្រាយជូនដល់ប្រជាពលរដ្ឋយើងអោយបានទាន់ពេលវេលា។
គួរបញ្ជាក់ថា ៖ របាយការណ៍ស្តីពីផលប៉ះពាល់ដោយសារគ្រោះទឹកជំនន់នៅ ស្រុកលំផាត់ បានបង្ហាញថា ស្រុកលំផាត់បានរង នៅសម្ពាធទាបដែលជាហេតុបណ្តាលឱ្យមានគ្រោះទឹកជំនន់ទាំង១៦ភូមិ នៅឃុំជ័យឧត្តម ឃុំសេដា និង ឃុំកាឡែង មានដូចខាងក្រោម៖
១.ឃុំសេដា.ប៉ះពាល់ ០៧ភូមិ លំនៅដ្ឋានមានចំនួន១៦៣ ខ្នង ២៤៣គ្រួសារ មានប្រជាពលរដ្ឋសរុបចំនួនចំនួន១.៨៧៥ នាក់ ស្រី ៩១០នាក់ដីស្រែចំនួន ៨៨៤ ហិកតាដីចំការ និងដំណាំរួមផ្សំ ចំនួន១.៦៩០ ហិកតា មាន់.ទា.ជ្រូក.ក្របី.គោ សុរបចំនួន ១៥០ក្បាល ផ្លូវមានចំនួន ០៣ កន្លែង សរុបជាប្រវែងចំនួន ៣៤ គីឡូម៉ែត្រការ៉េ គ្រួសារសរុប៣២៣គ្រួសារ ប្រជាពលរដ្ឋសរុប១.៤៤៩នាក់ ស្រី៧១០នាក់ ជម្លៀសប្រជាពលរដ្ឋទៅទីទួលសុវត្ថិភាពសរុប១៤០គ្រួសារ ប្រជាពលរដ្ឋសរុប៥៤០នាក់ ស្រី២១០នាក់ កុមារ៤៥នាក់ ស្ត្រីមេម៉ាយ៣៥នាក់ និងជនពិការសរុប១៥នាក់។
២. ឃុំកាឡែង ប៉ះពាល់ចំនួន៣ភូមិ លំនៅឋានចំនួន ៦០ គ្រួសារ មានប្រជាពលរដ្ឋចំនួន១៤៩នាក់ ស្រី៦៦ នាក់ដីស្រែចំនួន ១៨ ហិកតាដីចំការ និងដំណាំរួមផ្សំចំនួន១៨០ហិកតា។
៣. ឃុំជ័យឧត្តម ទឹកជំនន់ទាំង៦ភូមិ មានគ្រួសារសរុប ១,៥៣២គ្រួសារមនុស្សសរុប៦,២២៥នាក់ ស្រី៣,០៧៨នាក់ គ្រួសារទឹកលិចចំនួន ១,០០៨គ្រួសារមនុស្សសរុប៣,០២៤នាក់ ស្រី១,៦០៧នាក់ ប៉ះពាល់ចំនួន ០៦ភូមិលំនៅដ្ឋានចំនួន៥៤ខ្នង មានប្រជាពលរដ្ឋចំនួន ២១២ នាក់ ស្រី១១នាក់ ដីស្រែចំនួន ៧៥៥ ហិកតាដីចំការ និងដំណាំរួមផ្សំ ចំនួន៣១៥ ហិកតាផ្លូវប្រវែងចំនួន៤,៩៣៥ម៉ែត្រ និងលូ០៧កន្លែង វត្តអារាមចំនួន០១វត្ត ជម្លៀសប្រជាពលរដ្ឋទៅទីទួលសុវត្តិភាពសរុប៧១គ្រួសារ ប្រជាពលរដ្ឋសរុប២៣៤នាក់ ស្រី១២៤ នាក់ កុមារ៤៥នាក់ ។
៤. ប៉ះពាល់សាលារៀនចំនួន០៤សាលា រួមមាន សាលាបឋមសិក្សាកែងសាន់ សាលាបឋមសិក្សាបានម៉ៃ សាលាបឋម សិក្សាស្រែឈូក សាលាបឋមសិក្សាអូរកាន និងមានផលប៉ះពាល់ លិចអណ្តូងទឹកសរុបចំនួន៤អណ្តូង បង្គន់អនាម័យចំនួន៥ខ្នង១០បន្ទប់ ៕
ចែករំលែកព័តមាននេះ