រឿងហេតុលម្អិត… ករណីហូបសាច់សត្វព្រៃឆៅស្លា.ប់មនុស្ស៧នាក់យ៉ាងរន្ធត់
ដោយសារតែការបរិភោគសាច់សត្វព្រៃឆៅ (ដែលចម្អិនមិនឆ្អិន) !
ដោយសារតែការបរិភោគសាច់សត្វព្រៃឆៅ (ដែលចម្អិនមិនឆ្អិន) !
ខេត្តកំពង់ធំ ៖ យ៉ាងហោចណាស់ មានមន្ត្រីឧទ្យានុរក្សម្នាក់ស្លាប់ ១២នាក់ឈឺធ្ងន់ និងប្រជាពលរដ្ឋចំនួន៦នាក់ទៀតឈឺស្លាប់ដោយសារតែការបរិភោគសាច់សត្វព្រៃឆៅ (ដែលចម្អិនមិនឆ្អិន) !
ពាក់ព័ន្ធនឹងករណីបណ្តាលឱ្យមនុស្សស្លាប់ជាច្រើននាក់ខាងលើនេះ បើយោងតាមប្រភពព័ត៌មានដែលកោះសន្តិភាពទទួលបានឱ្យដឹងថាបានកើតឡើងនៅច្រកតោ ស្ថិតក្នុងឃុំមានឫទ្ធិ ស្រុកសណ្តាន់ ខេត្តកំពង់ធំ ជិតបរិវេណព្រៃឡង់ ។
លោកអនុសេនីយ៍ឯក ចាន់ មានជ័យ មេប៉ុស្តិ៍មានឫទ្ធិបានប្រាប់ថា នៅច្រកតោនេះ មានប្រជាពលរដ្ឋចំណាកស្រុកច្រើនមកស្នាក់នៅ ហើយការស្លាប់នេះ បើតាមរបាយការណ៍មានចំនួន៧នាក់ រួមមានមន្ត្រីឧទ្យាននុរក្សការពារឧទ្យានធនធានធម្មជាតិព្រៃឡង់ម្នាក់ និងប្រជាពលរដ្ឋចំនួន៦នាក់ទៀត ក្នុងនោះពលរដ្ឋនៅក្នុងភូមិត្បូងទឹក ឃុំមានឫទ្ធិរបស់លោកចំនួន២នាក់ស្លាប់ ទី១-ឈ្មោះ អ៊ុល ជីន ភេទប្រុស អាយុ២៨ឆ្នាំ និងទី២-ឈ្មោះ ហ៊ិន ញ៉ឹម ភេទប្រុស អាយុ៤៩ឆ្នាំ ស្លាប់កាលពីថ្ងៃទី១៩ កញ្ញា ។ ចំណែកប្រជាពលរដ្ឋ៤នាក់ទៀតរស់នៅឃុំសណ្តាន់ ។
លោក បាន ហេង មេឃុំសណ្តាន់ប្រាប់ថាពលរដ្ឋនៅក្នុងឃុំរបស់លោកចំនួន៤នាក់បានឈឺស្លាប់ជាបន្តបន្ទាប់រួមមានទី១-ឈ្មោះ ផេង ច្រាញ់ ភេទប្រុស អាយុប្រហែល៣៨ឆ្នាំ ទី២-ឈ្មោះ សាំ គួន ភេទប្រុស អាយុ៤០ឆ្នាំ ទី៣-ឈ្មោះ ហ៊ីង ភន ភេទប្រុស អាយុ៣៧ឆ្នាំ និងទី៤-ឈ្មោះ ប៉ាត ឌីន ភេទប្រុស អាយុ៣៣ឆ្នាំ ចំណែកឈ្មោះ កុយ ហ៊ន ភេទប្រុស អាយុ៣២ឆ្នាំ កំពុងឈឺធ្ងន់ដឹកចេញពីមន្ទីរពេទ្យបង្អែកស្រុកសណ្តាន់ទៅកាន់មន្ទីរពេទ្យខេត្តហើយ ។ អ្នកទាំង៥រស់នៅភូមិឈូក ឃុំសណ្តាន់ ។ រីឯខាងមន្ត្រីឧទ្យានុរក្សរបស់មន្ទីរបរិស្ថានខេត្តដែលដាក់ឱ្យឈរជើងការពារនៅតំបន់ធនធានធម្មជាតិព្រៃឡង់តាមប្រភពព័ត៌មានបានឱ្យដឹងថា មានចំនួនសរុប១៣នាក់បានឈឺចូលសម្រាកពេទ្យក្នុងនោះស្លាប់ម្នាក់ ។
១-ឈ្មោះ ចាប់ ជាន ២-ឈ្មោះ ព្រុំ ពង ៣-ឈ្មោះ គី ម៉ាប់ ៤-ឈ្មោះ អេន អ៊ាន់ ៥-ឈ្មោះ ដោក ឌត ៦-ឈ្មោះ កែវ គីលីន ៧-ឈ្មោះ អៀប ឌីណា ៨-ឈ្មោះ ស៊ឹម គឹមស៊ន ៩-ឈ្មោះ អ៊ុក អៀង ១០-ឈ្មោះ គង់ វ៉ាន ១១-ឈ្មោះ លី សុខាឧត្តម ១២-ឈ្មោះ គឹមគង់ ។ ១២នាក់នេះកំពុងតែសម្រាកព្យាបាលនៅមន្ទីរពេទ្យ និងទី១៣-អ្នកដែលបានស្លាប់ឈ្មោះ ឆេង សុខឈី ភេទប្រុស អាយុ៣២ឆ្នាំរស់នៅភូមិគគី ឃុំសាលាវិស័យ ស្រុកប្រាសាទបល្ល័ង្ក ។
ជុំវិញករណីមានមនុស្សស្លាប់រហូតដល់៧នាក់ខាងលើនេះលោកវេជ្ចបណ្ឌិត ស្រី ស៊ីន និងជាប្រធានមន្ទីរសុខាភិបាលខេត្តកំពង់ធំ បានមានប្រសាសន៍ឱ្យដឹងនៅរសៀលថ្ងៃទី២៤ កញ្ញា ថាបើយោងតាមលទ្ធផលធ្វើតេស្តទៅលើអ្នកជម្ងឺរបស់ក្រសួងសុខាភិបាល និងមន្ទីរសុខាភិបាលខេត្ត ព្រមជាមួយនិងការចុះសាកសួរដល់ជនរងគ្រោះ បានឱ្យដឹងថា ករណីដែលបណ្តាលឱ្យមានមនុស្សស្លាប់ជាច្រើននាក់ខាងលើនេះមិនមែនបណ្តាលមកអំពីកើតជម្ងឺឆ្លងអ្វីនោះទេ ។
លោកនិយាយថា ការស្លាប់នេះគឺបណ្តាលមកពីពួកគាត់បាននាំគ្នាបរិភោគសាច់សត្វព្រៃដែលនៅឆៅ ចម្អិនមិនបានឆ្អិន ដូចជាសាច់ជ្រូកព្រៃ សាច់ឈ្លូស ពួកគាត់យកទៅធ្វើជាភ្លាហូបឆៅៗតែម្តងខណៈសាច់សត្វព្រៃនោះវាមានផ្ទុកមេរោគ ។ នៅពេលយើងបរិភោគឆៅ វាបណ្តាលឱ្យកើតជាជម្ងឺឈឺសាច់ដុំ និងហើមដៃហើមជើង ឈឺចុកចាប់ពេញខ្លួនរហូតដល់ស្លាប់បាន ។
ក្នុងនោះផងដែរដំណឹងដ៏ក្រៀមក្រំនេះ លោកក៏សូមអំពាវនាវដល់បងប្អូនប្រជាពលរដ្ឋ ក៏ដូចជាមន្ត្រីរាជការ សូមកុំឱ្យនាំគ្នាទទួលទានសាច់សត្វគ្រប់ប្រភេទ ដែលនៅឆៅ ពីព្រោះវាអាចបណ្តាលឱ្យមានគ្រោះថ្នាក់ដល់អាយុជីវិតរបស់យើងទាំងអស់គ្នា ។ ជាពិសេស ការទទួលទានសាច់សត្វព្រៃវាខុសច្បាប់ផងដែរ បើយើងទាំងអស់គ្នាមិននាំគ្នាបរិភោគសាច់សត្វព្រៃទេនោះ ក៏គ្មានអ្នកសម្លាប់យកមកលក់ដែរ ៕
ចែករំលែកព័តមាននេះ