ដំណាំត្រឡាចត្រូវបានឈ្មួញចុះប្រមូលទិញ យកទៅលក់នៅប្រទេសជិតខាង

ថ្ងៃទី ២៤ ខែ កញ្ញា ឆ្នាំ ២០១៧
ម៉ោង ១១:០៨
mony

ខេត្តកំពង់ចាម ៖ ដំណាំត្រឡាចដែលបានដាំដុះនៅក្នុងឃុំបុសខ្នុរ ស្រុកចម្ការលើ បានហុចផលជាបណ្តើរៗហើយ ជាមួយនោះគេបានឃើញក្រុមឈ្មួញចុះប្រមូលទិញដឹកតាមរថយន្តធំៗ ដើម្បីយកទៅលក់នៅប្រទេសវៀតណាម និងថៃ។ នៅលើផ្ទៃរាប់រយហិកតានៅក្បែរនោះ ក៏គេបានឃើញមានដំណាំផ្សេងៗមានពោត ត្រប់ជាដើម ដែលប្រជាកសិករដាំដើម្បីលក់ទ្រទ្រង់ជីវភាពគ្រួសារ។ មេការកម្មករម្នាក់ឈ្មោះ ហ៊ន់ ចន្ថា ភេទស្រី អាយុ៣៥ឆ្នាំ ប្រាប់ឲ្យដឹងនៅរសៀលថ្ងៃទី២៣ កញ្ញា ២០១៧ថា នៅពេលណាដែលថៅកែស្រីមានចម្ការរាប់រយហិកតានៅក្នុងស្រុកចម្ការ ដែលមានដាំដំណាំផ្សេងៗជាច្រើនមុខនោះ ពេលណាដែលមានការកុម្មង់ទិញច្រើនតោន គាត់ត្រូវដឹកនាំកម្មករប្រុស ស្រី ជាង២០នាក់ ដើម្បីប្រមូលបេះលើកដាក់រថយន្តឲ្យគេ។

ជាក់ស្តែងនៅថ្ងៃទី២២ កញ្ញា ពួកគាត់បានបេះត្រឡាចបាន១រថយន្តទម្ងន់១៩តោន ដោយក្នុង១តោន បានកម្រៃ២៥.០០០រៀល ហើយនៅថ្ងៃទី២៣ កញ្ញា ដោយសារតែមេឃបានបង្អុរភ្លៀងធ្លាក់ចុះមកនោះ មានអ្នកខ្លះបានទៅផ្ទះ និងនៅសល់១១នាក់ បានបន្តនាំគ្នាបេះ និងលើកដាក់លើរថយន្ត។ លោក ហ៊ឹង សុផាត អាយុ៤៣ឆ្នាំ ជាឈ្មួញប្រមូលទិញដំណាំល្ពៅ និងត្រឡាច នៅក្នុងប្រទេសកម្ពុជាប្រាប់ឲ្យដឹងដែរថា នៅក្នុងរដូវវស្សាពេលណាដែលប្រជាកសិករដាំដុះបានផលដំណាំទាំង២មុខនេះគឺគាត់បានចុះប្រមូលទិញជាក់ស្តែងនៅថ្ងៃទី២៣ កញ្ញា ២០១៧ ត្រូវបានចុះប្រមូលត្រឡាចនៅស្រុកចម្ការលើ ដើម្បីនាំចេញទៅកាន់ ទីផ្សារប្រទេសវៀតណាម។ ដែលគេបានកុម្មង់ទិញត្រឡាចទុំជាច្រើនតោនដើម្បីយកទៅធ្វើនំសម្រាប់ទទួលទាន។

លោក ហ៊ឹង សុផាត បញ្ជាក់ថា ត្រឡាចនេះគាត់បានទិញក្នុង១តោនតម្លៃ៥០ម៉ឺនរៀល លុះពេលដឹកយកទៅលក់ទទួលបានផលចំណេញតិចទោះជាបែបណាក្តី រូបលោកនូវតែបន្តរបរនេះទៅមុខទៀត ព្រោះថា បានប្រកបរបរនេះជាង៦ឆ្នាំមកហើយ ដោយកម្រៃចំណេញបានសម្រាប់ផ្តត់ផ្គង់ជីវភាពគ្រួសារ។ ចំពោះហេតុផលដែលកន្លងមកត្រឡាចនៅស្រុកចម្ការលើ ពេលដែលបានផលហើយបែរជាលក់មិនចេញត្រូវបានប្រជាកសិករទុកចោលនៅចម្ការឡើងស្អុយរលួយ និងបេះនោះ មានកត្តាដូចជានៅប្រទេសវៀតណាម និងថៃគេមិនទទួលទិញពីយើង ហេតុដូច្នេះហើយបានជាជួបនឹងវិបត្តិនេះ។ មកដល់ឆ្នាំ២០១៧ ទីផ្សារប្រទេសជិតខាងគេទទួលទិញ ទើបរូបលោកបានចុះប្រមូលទិញពីកសិករនៅក្នុងប្រទេសកម្ពុជាមានដូចជា៖ ខេត្តបាត់ដំបង ខេត្តកំពង់ចាម និងខេត្តព្រះវិហារជាដើម ដែលប្រមូលទិញមានល្ពៅ និងត្រឡាច ដើម្បីនាំចេញទៅកាន់ទីផ្សារប្រទេសជិតខាង។ ថ្វិត្បិតរបរនេះមិនបានទទួលបានប្រាក់ចំណេញច្រើនក្តី ក៏រូបលោកនៅតែប្រឹងប្រែងបន្តទៅមុខទៀត៕