អនិច្ចា! នាំគ្នាជិះកាណូតលេងមើលគេប្រណាំងទូក ស្រាប់តែ…
ខេត្តកំពង់ធំ ៖ លោកវរសេនីយ៍ទោ ញ៉ែម ឈុនលី បានប្រាប់កោះសន្តិភាពឱ្យដឹងថា
ខេត្តកំពង់ធំ ៖ លោកវរសេនីយ៍ទោ ញ៉ែម ឈុនលី បានប្រាប់កោះសន្តិភាពឱ្យដឹងថា មាន ករណីលិចកាណូតមួយគ្រឿង បណ្តាលកុមារម្នាក់លិចបាត់រកមិនឃើញ ហេតុការណ៍នេះបង្កឱ្យមានការភ្ញាក់ផ្អើលកាលពីរសៀលថ្ងៃទី២១ ខែកញ្ញា ឆ្នាំ២០១៧ ស្ថិតក្នុងស្ទឹងសែន ភូមិអូរកន្ធរត្បូង សង្កាត់អូរកន្ធរ ក្រុងស្ទឹងសែន ខេត្តកំពង់ធំ។
កុមារីរងគ្រោះមានឈ្មោះ អឹង នីហ្សា អាយុ៥ឆ្នាំ មានឪពុកឈ្មោះ អឹង បូរ៉ា អាយុ២៦ឆ្នាំ និងម្តាយឈ្មោះ ឈឹង គន្ធា អាយុ២៥ឆ្នាំ រស់នៅភូមិ-សង្កាត់កើតហេតុខាងលើខាងលើ។
លោកអធិការបន្តថា នៅរសៀលថ្ងៃកើតហេតុខាងលើនៅក្នុងភូមិមានរៀបចំពិធីប្រណាំងទូងខ្នាតតូច ដើម្បីអបអរសាទរសប្បាយរីករាយក្នុងពិធីបុណ្យភ្ជុំបិណ្ឌប្រពៃណីជាតិយើង។ ពេលនោះបងប្អូន៥ទៅ៦នាក់មានចាស់មានក្មេងបានជិះកាណូតមួយគ្រឿងបើកកម្សាន្ត ចំណែកឯក្មេងស្រីរងគ្រោះត្រូវបានឪពុកមានាំឡើងលើកាណូតនោះផងដែរ ខណៈពេលកំពុងតែជិះលេងកម្សាន្តយ៉ាងសប្បាយនោះ ស្រាប់តែគាប់ជួនកាណូតនោះក៏លិច ហើយត្រូវបានអ្នកភូមិ និងសាច់ញាតិនាំគ្នាជួយសង្គ្រោះបានជាច្រើននាក់ នៅសល់តែកុមារីរងគ្រោះរកមិនទាល់ឃើញទាល់តែសោះ រហូតដល់ម៉ោង១០និង៣០នាទីព្រឹក ថ្ងៃទី២២ កញ្ញា ទើបសពកុមារីរងគ្រោះអណ្តែតឡើង ហើយក៏នាំគ្នាស្រង់យកទៅធ្វើបុណ្យតាមប្រពៃណី ។
ករណីខាងលើលោកអធិការក៏សូមអំពាវនាវដល់អាណាព្យាបាលគ្រប់រូបត្រូវតែមានការប្រុងប្រយ័ត្នខ្ពស់ចំពោះសុវត្ថិភាពរបស់កូនៗ មិនគួរឲ្យមានការធ្វេសប្រហែសដូចជាករណីខាងលើនេះនោះទេ នាំឲ្យមានការសោកស្តាយ៕
ចែករំលែកព័តមាននេះ