ទីក្រុងសេអ៊ូលនឹងដេញថ្លៃសម្រាប់ព្រឹត្តិការណ៍អូឡាំពិកឆ្នាំ២០៣៦ ដោយគ្មានកូរ៉េខាងជើង
កូរ៉េខាងត្បូង ៖ ទីក្រុងសេអ៊ូលរបស់កូរ៉េខាងត្បូង នឹងបន្តដំណើរការដេញថ្លៃរបស់ខ្លួន ដើម្បីធ្វើម្ចាស់
កូរ៉េខាងត្បូង ៖ ទីក្រុងសេអ៊ូលរបស់កូរ៉េខាងត្បូង នឹងបន្តដំណើរការដេញថ្លៃរបស់ខ្លួន ដើម្បីធ្វើម្ចាស់ផ្ទះព្រឹត្តិការណ៍កីឡាអូឡាំពិករដូវក្តៅឆ្នាំ២០៣៦ ដោយពុំចាំបាច់ស្តារឡើងវិញនូវកិច្ចខិតខំប្រឹងប្រែង ដើម្បីធ្វើជាសហម្ចាស់ផ្ទះជាមួយនឹងរដ្ឋធានីព្យុងយ៉ាងរបស់កូរ៉េខាងជើងនោះទេ។ នេះបើយោងតាមការបញ្ជាក់របស់លោក Oh Se-hoon អភិបាលក្រុងសេអ៊ូលប្រាប់ទៅកាន់ទីភ្នាក់ងារសារព័ត៌មាន Reuters។
ចំពេលមានក្តីសង្ឃឹមសម្រាប់ទំនាក់ទំនងកាន់តែប្រសើរឡើងជាមួយកូរ៉េខាងជើង ទីក្រុងសេអ៊ូលបានផ្ញើសំណើសម្រាប់ការធ្វើជាសហម្ចាស់ផ្ទះកីឡាអូឡាំពិកឆ្នាំ ២០៣២ ជាមួយទីក្រុងព្យុងយ៉ាងទៅកាន់គណៈកម្មាធិការអូឡាំពិកអន្តរជាតិ (IOC) កាលពីឆ្នាំ២០២១ ពោលគឺមុនពេលដែលទីក្រុងប្រ៊ីសបាន Brisbane របស់ប្រទេសអូស្ត្រាលី ត្រូវបានប្រកាសជាផ្លូវការថាជាម្ចាស់ផ្ទះ។
ការដេញថ្លៃរួមគ្នាសម្រាប់ឆ្នាំ២០៣២ គឺដើម្បីស្វែងរកការកសាងព្រឹត្តិការណ៍ជាប្រវត្តិសាស្ត្រ ដូចនឹងព្រឹត្តិការណ៍អូឡាំពិករដូវរងាតំបន់ Pyeongchang ដែលធ្វើជាម្ចាស់ផ្ទះនៅភាគខាងត្បូងក្នុងឆ្នាំ២០១៨ ដោយអំឡុងពេលនោះ អត្តពលិកប្រទេសកូរ៉េទាំងពីរ បានដើរដង្ហែក្បួនក្រោមទង់ជាតិបង្រួបបង្រួមក្នុងពិធីបើក និងដាក់ក្រុមកីឡាវាយកូនគោលលើទឹកកកផ្នែកនារីរួមបញ្ចូលគ្នាផងដែរ។
លោក Oh បានលើកឡើងក្នុងបទសម្ភាសន៍មួយថា «ខ្ញុំគិតថាយុទ្ធសាស្ត្រសម្រាប់ឆ្នាំ ២០៣២ នឹងត្រូវវិនាសនិងបរាជ័យ ដោយសារទំនាក់ទំនងអន្តរកូរ៉េ ដែលមិនអាចទាយទុកជាមុនបាន»។
ប្រធាន IOC លោក Thomas Bach បានស្វាគមន៍ចំពោះការដេញថ្លៃរួមគ្នានៅពេលនោះ ដែលលោកបានហៅថា គំនិតផ្តួចផ្តើមជាប្រវត្តិសាស្ត្រ។ ប៉ុន្តែទោះយ៉ាងណា ទំនាក់ទំនងនេះ បានរសាត់ឆ្ងាយទៅវិញ ហើយកូរ៉េខាងជើងបានសាកល្បងកាំជ្រួចមីស៊ីលបាលីស្ទីកជាកំណត់ត្រាក្នុងឆ្នាំមុនរបស់ខ្លួនផងដែរ។
ទីក្រុងព្យុងយ៉ាងតែងតែធ្វើការគំរា.មកំហែងទីក្រុងសេអ៊ូល រួមនិងទីក្រុងវ៉ាស៊ីនតោន (សម្ព័ន្ធមិត្តកូរ៉េខាងត្បូង) ជាកន្លែងដែលក្រុមមន្ត្រីបានលើកឡើងថា កូរ៉េខាងជើងប្រហែលជាកំពុងរៀបចំដើម្បីបន្តការសាកល្បងអាវុ.ធនុយក្លេអ៊ែរជាលើកដំបូងរបស់ខ្លួន ចាប់តាំងពីឆ្នាំ២០១៧។
បន្ថែមពីលើនេះ លោក Oh បាននិយាយថា ទីក្រុងសេអ៊ូលនឹងនៅតែអាចបត់បែនបានចំពោះគំនិតនៃការរៀបចំព្រឹត្តិការណ៍មួយចំនួននៅក្នុងតំបន់គ្មានយោធា ឬទីក្រុងព្យុងយ៉ាង ប្រសិនបើទំនាក់ទំនងមានភាពប្រសើរឡើងគ្រប់គ្រាន់នៅពេលនោះ។
ទោះយ៉ាងណាក៏ដោយ មន្ត្រីមួយរូប ដែលមិនបញ្ចេញឈ្មោះរបស់គណៈកម្មាធិការកីឡា និងអូឡាំពិកកូរ៉េ (KSOC) បាននិយាយថា ខ្លួនមិនបានទទួលសេចក្តីថ្លែងការណ៍ផ្លូវការពីចេតនារបស់ទីក្រុងសេអ៊ូល ឬទីក្រុងប៊ូសាន លើការដេញថ្លៃធ្វើម្ចាស់ព្រឹត្តិការណ៍អូឡាំពិកឆ្នាំ២០៣៦ នោះទេ។ មន្ត្រីរូបនោះបន្ថែមថា វាអាស្រ័យលើទីក្រុងនីមួយៗ ក្នុងការពិគ្រោះយោបល់ជាមួយរដ្ឋាភិបាលជាតិ ដើម្បីសម្រេចថា តើត្រូវធ្វើជាម្ចាស់ផ្ទះរួមគ្នាជាមួយទីក្រុងព្យុងយ៉ាងឬយ៉ាងណា?
ក្នុងចំណោមគូប្រជែងដ៏មានសក្ដានុពលសម្រាប់ការដេញថ្លៃនេះ ប្រទេសកាតាត្រូវបានគេរំពឹងថា នឹងធ្វើការជំរុញបន្ថែមទៀត ដើម្បីធ្វើជាម្ចាស់ផ្ទះព្រឹត្តិការណ៍អូឡាំពិកឆ្នាំ២០៣៦ បន្ទាប់ពីពួកគេទទួលបានជោគជ័យនៃព្រឹត្តិការណ៍បាល់ទាត់ពិភពលោក FIFA World Cup កាលពីឆ្នាំមុន ហើយជាមួយគ្នានោះ ឥណ្ឌា អាល្លឺម៉ង់ ម៉ិកស៊ិក និងអេហ្ស៊ីបក៏ត្រូវបានរាយការណ៍ថា កំពុងពិចារណាលើការដេញថ្លៃផងដែរ៕
ចែករំលែកព័តមាននេះ