បារាំងប្រារព្ធព្រឹត្តិការណ៍រាប់ថយក្រោយ «500 Days To Go» នៃព្រឹត្តិការណ៍អូឡាំពិកឆ្នាំ២០២៤
បារាំង ៖ ប្រធានាធិបតីបារាំង លោក អេម៉ានុយអែល ម៉ាក្រុង (Emmanuel Macron) នឹងដើរតួយ៉ាង
បារាំង ៖ ប្រធានាធិបតីបារាំង លោក អេម៉ានុយអែល ម៉ាក្រុង (Emmanuel Macron) នឹងដើរតួយ៉ាងសំខាន់នៅថ្ងៃទី១៤ ខែមីនា ឆ្នាំ២០២៣ នៅក្នុងការប្រារព្ធព្រឹត្តិការណ៍រាប់ថយក្រោយ «500 Days To Go» រហូតដល់ការចាប់ផ្តើមនៃការប្រកួតព្រឹត្តិការណ៍កីឡាអូឡាំពិករដូវក្តៅទីក្រុងប៉ារីសឆ្នាំ២០២៤។
ប្រធានាធិបតីបារាំង បានទទួលទានអាហារថ្ងៃត្រង់ជាមួយអ្នកឧបត្ថម្ភ ដៃគូសំខាន់ៗ និងជាពិសេសជាមួយលោក Thomas Jolly ដែលជានាយកទទួលបន្ទុកសិល្បៈនៃព្រឹត្តិការណ៍ទីក្រុងប៉ារីសឆ្នាំ ២០២៤ ដើម្បីពិភាក្សាអំពីការរៀបចំ ដែលបាននិងកំពុងរៀបចំសម្រាប់ការបើក និងបិទព្រឹត្តិការណ៍អូឡាំពិក និងប៉ារ៉ាឡាំពិក ដែលខ្លួនទទួលធ្វើជាម្ចាស់ផ្ទះ។
ពិធីបើកព្រឹត្តិការណ៍កីឡាអូឡាំពិកឆ្នាំ២០២៤ ដែលគ្រោងនឹងប្រព្រឹត្តទៅនៅថ្ងៃទី២៦ ខែកក្កដា ឆ្នាំក្រោយ ត្រូវបានរំពឹងថា នឹងពិសេសជាទីបំផុត។ ដោយគ្រោងនឹងប្រព្រឹត្តទៅលើផ្លូវប្រវែង៦គីឡូម៉ែត្រតាមដងទន្លេសេន (Seine) ជាមួយនឹងកន្លែងលក់សំបុត្រចំនួន៧ម៉ឺនសន្លឹក និងសំបុត្រឥតគិតថ្លៃ ដែលរំពឹងថានឹងអនុញ្ញាតឱ្យអ្នកចូលរួមចាប់ពី៤០ដល់៦០ម៉ឺននាក់។
គោលបំណងដ៏ធំរបស់លោក ម៉ាក្រុង ដែលចេញជាសេចក្តីថ្លែងការណ៍គឺ ដើម្បីធានាថា មនុស្សគ្រប់គ្នា នៅក្នុងគ្រប់ក្រសួងទាំងអស់ ក៏ដូចជារដ្ឋបាលរដ្ឋាភិបាលបារាំង គឺកំពុងធ្វើការលើរបៀបវារៈ និងផែនទីបង្ហាញផ្លូវដ៏ច្បាស់លាស់ ដើម្បីធ្វើយ៉ាងណាឱ្យព្រឹត្តិការណ៍ឆ្នាំ២០២៤ ប្រព្រឹត្តទៅដោយរលូន និងជោគជ័យ។
គួរបញ្ជាក់ថា ព្រឹត្តិការណ៍កីឡាអូឡាំពិករដូវក្តៅទីក្រុងប៉ារីសឆ្នាំ២០២៤ នឹងត្រូវប្រព្រឹត្តទៅចាប់ពីថ្ងៃទី២៦ ខែកក្កដា រហូតដល់ថ្ងៃទី១១ ខែសីហា ខណៈព្រឹត្តិការណ៍ប៉ារ៉ាឡាំពិក នឹងប្រព្រឹត្តទៅចាប់ពីថ្ងៃទី២៨ ខែសីហា រហូតដល់ថ្ងៃទី៨ កញ្ញា៕ (ដកស្រង់ចេញពី Inside The Games)
ចែករំលែកព័តមាននេះ