ល្បិចបន្លំយកទូរស័ព្ទខូចដូរយកល្អ របស់អ្នករត់ម៉ូតូកង់បី ផ្អើលក្បែរអធិការដ្ឋាននគរបាលខណ្ឌទួលគោក
- ភ្នំពេញ
រាជធានីភ្នំពេញ ៖ ជនសង្ស័យជាបុរសម្នាក់ និងស្ត្រីម្នាក់បានធ្វើជាហៅម៉ូតូកង់បីជិះ ពេលមកដល់
រាជធានីភ្នំពេញ ៖ ជនសង្ស័យជាបុរសម្នាក់ និងស្ត្រីម្នាក់បានធ្វើជាហៅម៉ូតូកង់បីជិះ ពេលមកដល់គោលដៅក៏បន្លំធ្វើជាខ្ចីទូរស័ព្ទដៃអ្នករត់ម៉ូតូកង់បី ហើយលួចដូរទុកទូរស័ព្ទខូចអោយ រួចព្យាយាមគេចខ្លួនបាត់ម្នាក់ និងចាប់ឃាត់ខ្លួនបានម្នាក់ កាលពីវេលាម៉ោង១០និង២០នាទីយប់ ថ្ងៃទី៩ ខែមីនា ឆ្នាំ២០២៣ ត្រង់ចំណុចក្បែរអធិការដ្ឋាននគរបាលខណ្ឌទួលគោក តាមបណ្ដោយផ្លូវ២៦១ ក្នុងសង្កាត់ទឹកល្អក់ទី៣ ខណ្ឌទួលគោក។
តាមប្រភពព័ត៌មានពីបុរសជាអ្នករត់ម៉ូតូកង់បីបានរៀបរាប់ប្រាប់ឲ្យដឹងថា នៅមុនពេលកើតហេតុ ស្ត្រីជាជនសង្ស័យ និងបុរសជាបក្ខពួកម្នាក់ទៀតបានហៅម៉ូតូកង់បីគាត់ជិះចេញពីផ្សារតូច ដោយឲ្យគាត់ដឹកមកម្តុំកន្លែងកើតហេតុ។ បន្ទាប់ពីគាត់ក៏បានដឹកជនសង្ស័យទាំង២នាក់នោះធ្វើដំណើរចេញមក តែពេលដែលជិះតាមផ្លូវ ជនសង្ស័យទាំងពីរនាក់នោះបានប្រាប់ម្តងឲ្យគាត់ដឹកទៅពោតិ៍ចិនតុង ម្តងឲ្យគាត់ដឹកទៅកន្លែងកើតហេតុ។
បុរសជាអ្នករត់ម៉ូតូកង់បីបានបន្តថា បន្ទាប់មកជនសង្ស័យទាំង២នាក់នោះក៏បានសុំខ្ចីទូរស័ព្ទដៃរបស់គាត់តេ ហើយគាត់មិនបានចាប់អារម្មណ៍អ្វីច្រើននោះទេ ក៏បានព្រមអោយទូរស័ព្ទដៃទៅជនសង្ស័យខ្ចីរួចក៏ធ្វើដំណើរទៅមុខជាធម្មតា។ លុះដល់ចំណុចកើតហេតុ ជនសង្ស័យទាំង២នាក់ក៏បានឲ្យគាត់ឈប់ ហើយបុរសជាជនសង្ស័យក៏បានឲ្យទូរស័ព្ទដៃមកគាត់វិញ រួចក៏បានចុះដើរទៅដោយមិនទាន់ឲ្យលុយគាត់នោះទេ រីឯស្ត្រីជាជនសង្ស័យក៏បានព្យាយាមដើរតាមពីក្រោយ ។
បុរសជាអ្នករត់ម៉ូតូកង់បីបានបន្តទៀតថា ខណៈពេលនោះ គាត់ក៏បានមើលទូរស័ព្ទដៃហាក់ប្លែកខុសពីធម្មតា ព្រោះទូរស័ព្ទទូចជាងសំបកទូរស័ព្ទ ទើបគាត់ដឹងថាជនសង្ស័យបានលួចដូរយកទូរស័ព្ទដៃរបស់គាត់ ដោយទុកទូរស័ព្ទដៃខូចឲ្យគាត់ ក៏បានស្រែកឆោឡោរត់ដេញតាមបង្កឲ្យការភ្ញាក់ផ្អើលដល់ប្រជាពលរដ្ឋជួយចាប់បានស្ត្រីជាជនសង្ស័យម្នាក់។ ចំណែកឯបុរសជាបក្ខពួកបានយកទូរស័ព្ទដៃរបស់ជនសង្ស័យរត់គេចខ្លួនបាត់ស្រមោលដោយសុវត្ថិភាព។
ក្រោយពេលកើតហេតុ សមត្ថកិច្ចមូលដ្ឋានក៏បានចុះមកធ្វើការអន្តរាគមន៍ ហើយបាននាំជនរងគ្រោះ និងស្ត្រីជាជនសង្ស័យយកទៅកាន់អធិការដ្ឋាននគរបាលខណ្ឌទួលគោកដើម្បីសាកសួរនាំនិងរង់ចាំចាត់ការទៅតាមនិតិវិធីច្បាប់ជាបន្តទៀត ៕
ចែករំលែកព័តមាននេះ