ស៊ីរ៉ែនប្រកាសអាសន្នលាន់កក្រើក… មនុស្សជាង១០០នាក់សន្លប់
ខេត្តកោះកុង ៖ កម្មកររោងចក្រកាត់ដេរជាង១០០នាក់ដែលភ័យតក់ស្លុត
ខេត្តកោះកុង ៖ កម្មកររោងចក្រកាត់ដេរជាង១០០នាក់ដែលភ័យតក់ស្លុត បានដួលសន្លប់ជាបន្តបន្ទាប់គ្នា បន្ទាប់ពីឮសំឡេងស៊ីរ៉ែនប្រកាសអាសន្ននៅក្នុងរោងចក្រពេលកំពុងធ្វើការ ។ តាមពិត ស៊ីរ៉ែនប្រកាសអាន្នដែលលាន់ឮឡើងនោះ ដោយសារឆ្លងចរន្តអគ្គិសនីប៉ុណ្ណោះ ។
ហេតុការណ៍ផ្អើលឆោឡោនេះ បានកើតឡើងនៅថ្ងៃទី៥ ខែកញ្ញា ចាប់ពីម៉ោង៧និង១០នាទីដល់ម៉ោង៨និង៣០នាទីព្រឹក នៅរោងចក្រកាត់ដេរ KKNទី៣ ស្ថិតក្នុងតំបន់សេដ្ឋកិច្ចពិសេសកោះកុង ។ ភ្លាមៗ កម្មករកម្មការិនីដែលដួលសន្លប់ ត្រូវបានដឹកបញ្ជូនតាមរថយន្តរបស់រោងចក្រយកទៅសង្គ្រោះនៅមន្ទីរពេទ្យខេត្ត ។
ប្រភពពីកម្មកររោងចក្រជាច្រើននាក់អះអាងថា ខណៈកម្មកររាប់រយនាក់ទើបតែចូលដល់ក្នុងរោងចក្រមិនបានប៉ុន្មាននាទីផង ស្រាប់តែសំឡេងស៊ីរ៉ែនប្រកាសអាសន្នបានបន្លឺឡើងយ៉ាងកងរំពងពេញក្នុងរោងចក្រ ។ ភ្លាមៗនោះកម្មករទាំងអស់មានការភ័យស្លន់ស្លោ និងចាប់ផ្តើមមានការដួលសន្លប់ជាបន្តបន្ទាប់តែម្តង ។ ប្រភពដដែលបន្តថា មួយសន្ទុះក្រោយមកសំឡេងស៊ីរ៉ែនក៏ត្រូវបានបិទ ប៉ុន្តែដោយឃើញដួលសន្លប់ច្រើនពេក អ្នកដែលមិនទាន់ដួលក៏ចាប់ផ្តើមដួលសន្លប់ជាបន្តបន្ទាប់ទៀតដែរ ទោះបីមិនមានសំឡេងស៊ីរ៉ែនក៏ដោយ ។ នៅពេលនោះ ខាងរោងចក្រក៏ចាត់វិធានការជាបន្ទាន់ យករថយន្តរដឹកកម្មការិនីទៅសង្គ្រោះនៅឯមន្ទីរពេទ្យខេត្ត ដែលមានចម្ងាយប្រមាណ៨គីឡូម៉ែត្រពីរោងចក្រ ។
លោកវេជ្ជបណ្ឌិត ទៅ ម៉ឹង ប្រធានមន្ទីរសុខាភិបាលខេត្ត ថ្លែងថា កម្មករកម្មការិនីដែលបញ្ជូនមកដល់មន្ទីរពេទ្យមានចំនួន១០០នាក់ និងមានក្រុមគ្រូពេទ្យទៅសង្គ្រោះដល់រោងចក្រមួយចំនួនទៀត ចំពោះអ្នកដែលមានអាការស្រាល ។ លោកវេជ្ជបណ្ឌិតបន្ថែមថា ការសន្លប់របស់កម្មករកម្មការិនីទាំងនោះ កើតឡើងដោយសារភ័យរន្ធត់ខ្លាំង ចង្វាក់បេះដូងដើរខុសប្រក្រតី ឬក៏ហៅថាស្រឺត ។ ចំពោះការសង្គ្រោះ គឺត្រូវបញ្ចូលសេរ៉ូមទាំង១០០នាក់តែម្តង ហើយក្រុមគ្រូពេទ្យត្រូវដើរពិនិត្យនិងសម្រួលអារម្មណ៍ដល់ពួកគាត់តាមរយៈពាក្យសម្តីលួងលោម ដើម្បីឱ្យចង្វាក់បេះដូងត្រឡប់មកភាពប្រក្រតីវិញ ។
រហូតមកដល់ម៉ោង២កន្លះរសៀលថ្ងៃដដែលលោកគ្រូពេទ្យនៅមិនទាន់អនុញ្ញាតឱ្យកម្មករ កម្មការិនីណាម្នាក់ចេញពីមន្ទីពេទ្យនៅឡើយទេ ទោះបីពួកគាត់ខ្លះមានអាការធូរស្រាល ហើយបានសុំវិលត្រឡប់ទៅវិញក៏ដោយ ។ ចំណែកភាគីខាងរោងចក្របានបញ្ជាក់ជាផ្លូវការថា ការកើតមានសំឡេងស៊ីរ៉ែននៅក្នុងរោងចក្រនេះ គឺបណ្តាលមកពីឆ្លងចរន្តអគ្គិសនី ។ មានការកត់សម្គាល់ថា កាលពីប៉ុន្មានខែមុន មានករណីដូចគ្នានេះដែរបានកើតឡើងនៅរោងចក្រKKNទី២ តែពេលនោះមានការដួលសន្លប់តិចនាក់ទេ៕
ចែករំលែកព័តមាននេះ