ខេត្តកំពតនឹងសាងសង់កំពង់ផែទេសចរណ៍នៅចុងឆ្នាំនេះ
រាជធានីភ្នំពេញ ៖ កំពង់ផែទេសចរណ៍ថ្មីមួយដែលមានតម្លៃ១០លានដុល្លារ
រាជធានីភ្នំពេញ ៖ កំពង់ផែទេសចរណ៍ថ្មីមួយដែលមានតម្លៃ១០លានដុល្លារក្រោមជំនួយរបស់ធនាគារអភិវឌ្ឍន៍អាស៊ី ហៅកាត់ថា (ADB) គ្រោងនឹងចាប់ផ្តើមសាងសង់នៅចុងឆ្នាំនេះ និងបញ្ចប់នៅចុងឆ្នាំ២០១៩ខាងមុខ ។
លោក ថោង ខុន រដ្ឋមន្ត្រីក្រសួងទេសចរណ៍ បានថ្លែងតាមទូរស័ព្ទនាព្រឹកថ្ងៃទី៥ កញ្ញា ថា ក្រោមជំនួយពីធនាគារអភិវឌ្ឍន៍អាស៊ី ក្នុងក្របខ័ណ្ឌនៃបណ្តាប្រទេសតាមអនុតំបន់ទន្លេមេគង្គ នៃច្រករបៀងភាគខាងត្បូង ធនាគារនេះបានផ្តល់ឥណទានចំនួន១៨លានដុល្លារដើម្បីសាងសង់កំពង់ផែទេសចរណ៍នេះ ។ កំពង់ផែនេះគ្រោងចំណាយទឹកប្រាក់១០លានដុល្លារ និងថវិកាដទៃទៀតគ្រោងនឹងប្រើប្រាស់សម្រាប់អភិវឌ្ឍន៍ផ្សារក្តាម ក្នុងខេត្តកំពតផងដែរ ។
លោកបន្តថា ៖« កំពង់ផែនេះនឹងជួយរួមចំណែកទាក់ទាញភ្ញៀវទេសចរពីតាមបណ្តាប្រទេសក្នុងតំបន់ ពិសេស ប្រទេសវៀតណាម និងថៃ តាមរយៈភ្ជាប់ការធ្វើដំណើរតាមផ្លូវទឹកតាមកប៉ាល់លឿន ឬកប៉ាល់ទេសចរណ៍ខ្នាតធំ» ។ លោកបន្តថា ៖« កំពង់ផែនេះជាផ្នែកមួយនៃជំនួយរបស់ធនាគារអភិវឌ្ឍន៍អាស៊ី តាមរយៈក្របខ័ណ្ឌនៃបណ្តាប្រទេសក្នុងអនុតំបន់ទន្លេមេគង្គនៃច្រករបៀងភាគខាងត្បូង » ។
គម្រោងសាងសង់ផែនេះ មានទីតាំងក្នុងភូមិជំគ្រាល ឃុំជំគ្រាល ស្រុកទឹកឈូ ខេត្តកំពត ។
លោករដ្ឋមន្ត្រីទេសចរណ៍បានបន្តថា ទំហំវិសាលភាពនៃកំពង់ផែនេះ នឹងមានលទ្ធភាពអាចឲ្យភ្ញៀវទេសចរឆ្លងកាត់បានចំនួន១,៥លាននាក់ក្នុង១ឆ្នាំ ។ ក្នុងគម្រោងសាង សង់នេះ នឹងផ្ដល់ផលប្រយោជន៍ជាច្រើនដល់តំបន់ទេសចរណ៍ផ្សេងទៀតផងដែរ ក្នុងនោះ វាអាចបង្កភាពងាយស្រួលដល់ភ្ញៀវទេសចរ ដែលមានបំណងចង់បន្តដំណើរពីតំបន់មួយទៅតំបន់មួយទៀតដូចជា ពីខេត្តកំពត ទៅភ្នំបូកគោ ខេត្តព្រះសីហនុ និងខេត្តសៀមរាបជាដើម ។
ទាក់ទងនឹងការសាងសង់កំពង់ផែទេសចរណ៍នេះ លោក ចាន់ ជេស្ដា អភិបាលខេត្តកំពត បញ្ជាក់ថា ផែទេសចរណ៍នេះនឹងផ្ដល់ផលប្រយោជន៍ជាច្រើនមកប្រទេសជាតិទាំងមូល ហើយវានឹងផ្ដល់ការងារកាន់តែច្រើនលើវិស័យទេសចរណ៍ដល់ប្រជាពលរដ្ឋកម្ពុជា ។
លោកក៏បានបន្ថែមថា តាមរយៈកំពង់ផែនេះ ក៏ជាផ្នែកមួយដែលនឹងស្រូបយកភ្ញៀវទេសចរអឺរ៉ុបកាន់តែច្រើនផងដែរ ព្រោះកំពង់ផែនេះផ្ដល់សេវាកម្មទេសចរណ៍ជាកញ្ចប់ ដែលនាំភ្ញៀវទេសចរពីខេត្តកំពត ទៅកោះត្រល់ ប្រទេសវៀតណាម និងដែនសមុទ្រប្រទេសថៃ ។
លោក ហូ វណ្ឌី ទីប្រឹក្សាសមាគមទីភ្នាក់ងារទេសចរណ៍កម្ពុជា បានថ្លែងថា វាជាផលិតផលទេសចរណ៍ថ្មីមួយសម្រាប់កម្ពុជាអាចភ្ជាប់ជាមួយប្រទេសជិតខាង តាមរយៈទេសចរណ៍ផ្លូវទឹក ព្រោះកម្ពុជាអាចភ្ជាប់ខ្សែទស្សនកិច្ចជាមួយកោះភូកុក ឬកោះត្រល់ និងជាមួយប្រទេសថៃ ។ លោកបន្តថា ខ្សែទស្សនកិច្ចតាមផ្លូវទឹកមានសក្តានុពលច្រើន ដែលកម្ពុជានឹងទទួលបានផលប្រយោជន៍ច្រើនសម្រាប់តំបន់ឆ្នេរ និងអាចតភ្ជាប់ទៅកាន់ខេត្តសៀមរាប តាមរយៈព្រលានយន្តហោះកងកេង ខេត្តព្រះសីហនុ ។
លោកបន្តថា ៖« តំបន់ឆ្នេរកម្ពុជាមានការរីកចម្រើនខ្លាំង ដោយសារការទៅដល់របស់ភ្ញៀវទេសចរកាន់តែច្រើន ដែលធ្វើឲ្យមានទាំងការអភិវឌ្ឍ និងបញ្ហាប្រឈម ។
ហេតុនេះ ការដោះស្រាយបញ្ហាបរិស្ថានជាកង្វល់មួយ ដែលត្រូវយកចិត្តទុកដាក់ពីអាជ្ញាធរពាក់ព័ន្ធ » ។
តាមរបាយការណ៍ក្រសួងទេសចរណ៍ ក្នុងរយៈពេល៦ខែដើមឆ្នាំ២០១៧ ភ្ញៀវទេសចរអន្តរជាតិដែលមកទស្សនាកម្ពុជាមានចំនួន ២.៦៦២.៦៧៩នាក់ កើនឡើង១២,៨% ធៀបនឹងរយៈពេលដូចគ្នាឆ្នាំ២០១៦ ក្នុងនោះការមកដល់តាមផ្លូវទឹកមានចំនួន៨៩,៥២៥នាក់ ៕
ចែករំលែកព័តមាននេះ