បឹងប្រា គឺជាតំបន់អភិរក្សមួយកន្លែង ដែលស្នើសុំគោលការណ៍ដោយមន្ត្រីរដ្ឋបាលជលផល នៃមន្ទីរកសិកម្មរុក្ខាប្រម៉ាញ់ និងនេសាទខេត្តកំពង់ឆ្នាំង និងត្រូវបានកំណត់ដោយក្រសួងកសិកម្ម ហើយបឹងនេះ មានទីតាំងស្ថិតនៅឃុំពាមឆ្កោក ស្រុកជល់គីរី ។ ប៉ុន្តែបឹងមួយនេះ
ខេត្តកំពង់ឆ្នាំង ៖ បឹងប្រា គឺជាតំបន់អភិរក្សមួយកន្លែង ដែលស្នើសុំគោលការណ៍ដោយមន្ត្រីរដ្ឋបាលជលផល នៃមន្ទីរកសិកម្មរុក្ខាប្រម៉ាញ់ និងនេសាទខេត្តកំពង់ឆ្នាំង និងត្រូវបានកំណត់ដោយក្រសួងកសិកម្ម ហើយបឹងនេះ មានទីតាំងស្ថិតនៅឃុំពាមឆ្កោក ស្រុកជល់គីរី ។ ប៉ុន្តែបឹងមួយនេះ បានប្រែក្លាយទៅជាទីកន្លែងប្រព្រឹត្តបទល្មើសនេសាទយ៉ាងអនាធិបតេយ្យទៅវិញ គឺមានទាំងសម្រាស់ និងរបាំងស្បៃមុងបិទភ្ជិតព្រែក ដែលមានលបលូយ៉ាងធំមួយផងដែរ នៅមិនឆ្ងាយពីរោងប្រចាំការរបស់សហគមន៍នេសាទ ដែលការពារទីនោះឡើយ។
ទោះយ៉ាងណា ក្រោយពីបានឃើញបទល្មើសនេសាទយ៉ាងអនាធិបត្យេបែបនេះ ក្រុមអ្នកសារព័ត៌មានបានរាយការណ៍ជូនអភិបាលខេត្តកំពង់ឆ្នាំង ហើយបន្ទាប់មកនៅព្រឹកថ្ងៃទី៧ ខែមីនា ឆ្នាំ២០២៣ យោងតាមបទបញ្ជាឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង និងជាប្រធានគណៈបញ្ជាការឯកភាពខេត្ត គេឃើញលោក ពេជ្រ កែវមុនី្ន អភិបាលរងខេត្ត លោក ជា សុខរិទ្ធ នាយករងរដ្ឋបាលសាលាខេត្ត និងលោក ងិន ហ៊ុន ប្រធានមន្ទីរកសិកម្មខេត្ត រួមនឹងសមត្ថកិច្ច អាជ្ញាធរមូលដ្ឋាន និងក្រុមការងារ បានចុះទៅដល់តំបន់បឹងអភិរក្ស (បឹងប្រា) ដើម្បីចុះបង្ក្រាបបទល្មើសនេសាទទាំងនោះតែម្តង។
លោក ជា សុខរិទ្ធ នាយករងរដ្ឋបាលខេត្កកំពង់ឆ្នាំង បានបញ្ជាក់ថា កិច្ចប្រតិបត្តិការខាងលើនេះ គឺចុះបង្ក្រាបបទល្មើសនេសាទនៅក្នុងតំបន់អភិរក្ស (បឹងប្រា) និងបានអញ្ជើញបងប្អូនប្រជានេសាទសហគមន៍នេសាទ ព្រមទាំងបានផ្សព្វផ្សាយ អប់រំដល់ពួកគាត់ដែលជាអ្នក ប្រព្រឹត្តបទល្មើស ដោយប្រើប្រាស់ឧបករណ៍នេសាទល្មើសច្បាប់ ដូចជា ៖ ការដាក់របាំងស្បៃមុងកាត់ព្រែក នៅក្នុងបឹងអភិរក្ស មកធ្វើកិច្ចសន្យាដោយឲ្យបញ្ឈប់សកម្មភាពនេសាទខុសច្បាប់ចាប់ពីពេលនេះតទៅ។
ជាមួយគ្នា លោក ពេជ្រ កែវមុន្នី អភិបាលរងខេត្ត ក៏បានចុះពិនិត្យទៅលើឧបករណ៍នេសាទល្មើសច្បាប់ នៅត្រង់ចំណុចព្រែកសំពៅរពាក់ ដែលកម្លាំងជំនាញបានបំផ្លាញចោលរួចហើយនោះ និងបានដាក់វិធានការមួយចំនួនដល់ប្រជានេសាទ និងប្រជាសហគមន៍នេសាទ ធ្វើយ៉ាងណារួមគ្នាថែរក្សា អភិរក្ស ទប់ស្កាត់ និងបង្ក្រាបរាល់បទល្មើសនេសាទ ដែលកើតមាននៅក្នុងតំបន់អភិរក្ស ក៏ដូចជានៅកន្លែងដទៃទៀតផងដែរ៕
ចែករំលែកព័តមាននេះ