ទីតាំងស្តុកអេតចាយមួយកន្លែង ត្រូវបានអគ្គិភ័យឆាបឆេះអស់ទាំងស្រុង ដោយពុំទាន់ដឹងថា តើផ្ដើមចេញពីមូលហេតុអ្វីនៅឡើយទេ? ហើយក៏ពុំបានឆេះរាលដាលដល់ផ្ទះសម្បែងរបស់អ្នកភូមិនោះដែរ ព្រោះថាទីតាំងនេះ គឺស្ថិតនៅ
រាជធានីភ្នំពេញ ៖ ទីតាំងស្តុកអេតចាយមួយកន្លែង ត្រូវបានអគ្គិភ័យឆាបឆេះអស់ទាំងស្រុង ដោយពុំទាន់ដឹងថា តើផ្ដើមចេញពីមូលហេតុអ្វីនៅឡើយទេ? ហើយក៏ពុំបានឆេះរាលដាលដល់ផ្ទះសម្បែងរបស់អ្នកភូមិនោះដែរ ព្រោះថាទីតាំងនេះ គឺស្ថិតនៅដាច់ឆ្ងាយពីគេ ហើយក្រោយពេលកើតហេតុភ្លាម ក៏មានរថយន្តពន្លត់អគ្គិភ័យបានចេញទៅអន្តរាគមន៍ជាច្រើនគ្រឿងធ្វើការផ្លាស់ប្ដូរគ្នាបាញ់ទឹកពន្លត់ផងដែរ។ ហេតុការណ៍នេះបានកើតឡើងកាលពីវេលាម៉ោង៣និង១០នាទីរសៀល ថ្ងៃទី៣ ខែមីនា ឆ្នាំ២០២៣ ស្ថិតនៅក្នុងភូមិកាកាប សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ។
បើតាមអ្នកភូមិខាងលើបាននិយាយថា ទីតាំងមួយនេះ មានស្តុកអេតចាយច្រើនប្រភេទរាប់សិបតោន ជាពិសេសក្រដាសកាតុង និងគ្រឿងជ័រជាដើម ដែលដាក់គរលើគ្នាហើយសុទ្ធតែជារបស់ងាយនឹងរងការឆាបឆេះខ្លាំងណាស់។ ដោយឡែកនៅពេលកើតហេតុ ពុំដឹងថា តើមានមូលហេតុអ្វីនោះទេ? ស្រាប់តែមានផ្សែងហុយ ហើយនឹងមានអណ្ដាតភ្លើងឆាបឆេះឡើងយ៉ាងសន្ធោសន្ធៅឆាប់រហ័សតែម្ដង។
ប្រភពដដែលបានប្រាប់ឲ្យដឹងបន្តទៀតថា អ្នកដែលស្ថិតនៅក្នុងទីតាំងមួយនេះ ពុំអាចពន្លត់ភ្លើងឈ្នះឡើយ ហើយត្រឹមតែមួយសន្ទុះប៉ុណ្ណោះ ភ្លើងបានឆេះរាលដាលពេញទីតាំងទាំងមូលយ៉ាងពេញបន្ទុកតែម្ដង។ បន្ទាប់មក ពួកគាត់ក៏បានរាយការណ៍ទៅកាន់អាជ្ញាធរសង្កាត់ ដើម្បីសុំឲ្យជួយផ្ដល់ដំណឹងទៅកាន់រថយន្តពន្លត់អគ្គិភ័យជួយអន្តរាគមន៍បាញ់ពន្លត់ ប៉ុន្តែទោះជាបែបណា ពួកគាត់ពុំមានការព្រួយបារម្ភអំពីសុវត្ថិភាពផ្ទះសម្បែងរបស់ពួកគាត់ឡើយ ព្រោះទីតាំងមួយនេះស្ថិតនៅដាច់ឆ្ងាយពីផ្ទះរបស់ពួកគាត់។
នគរបាលបាននិយាយថា អេតចាយនេះ ត្រូវបានម្ចាស់ប្រមូលទិញពីតំបន់នានា រួចយកមកស្តុកទុកនៅក្នុងទីតាំងនោះ ប៉ុន្តែពុំមានធ្វើជាអគារឃ្លាំងដែលមានដំបូល ឬជញ្ជាំងបិទបាំងជុំជិតនោះទេ គឺស្តុកទុកនៅកណ្ដាលវាលតែម្ដង។ដោយសារតែភាគច្រើនលើសលប់សុទ្ធតែជារបស់ងាយនឹងឆាបឆេះនោះ ទើបភ្លើងឆេះលឿន ហើយទោះជារថយន្តពន្លត់អគ្គិភ័យជាច្រើនគ្រឿងទៅដល់បាញ់ទឹកពន្លត់យ៉ាងណាក៏ដោយ ក៏មិនរលត់ឡើយ។ ដោយមានអេតចាយរាប់សិបតោន រួមជាមួយទូកុងតឺន័រមួយផងដែរ ត្រូវបានភ្លើងឆាបឆេះទាំងស្រុង ប៉ុន្តែជាសំណាងដែរ ដែលគ្មានផ្ទះសម្បែងអ្នកភូមិនៅក្បែរនោះ ទើបគ្មានគ្រោះមហន្តរាយធំធេងជាងនេះ៕
ចែករំលែកព័តមាននេះ