ក្រៅពីស្រា និងបារី ការទទួលទានសាច់ច្រើនក៏មិនល្អដែរ
លោកសាស្ត្រាចារ្យទន្តបណ្ឌិតឱ្យដឹងថា ក្រៅពីផឹកស្រា និងជក់បារី ការទទួលទានសាច់ច្រើនពេក ក៏បណ្តាលឱ្យកើតជំងឺ
លោកសាស្ត្រាចារ្យទន្តបណ្ឌិតគាម ប៊ន ឯកទេសផ្នែកជំងឺមាត់ ធ្មេញ នៃ«មន្ទីរពេទ្យធ្មេញគាម ប៊ន» ឱ្យដឹងថា ជំងឺមហារីកមាត់ ធ្មេញ គឺជាដុំកោសិកាមហារីកដែលរីករាលដាលនៅក្នុងប្រអប់មាត់។
មូលហេតុដែលបណ្តាលឱ្យកើតជំងឺមាត់ ធ្មេញ ៖
-អាយុច្រើនលើសពី៥០ឡើងទៅ មានដំបៅក្នុងមាត់ ធ្មេញ ហើយមិនពិនិត្យ និងព្យាបាលជាមួយអ្នកជំនាញ ។
-អ្នកដែលមានប្រព័ន្ធការពាររាងកាយចុះខ្សោយ ដូចជាអ្នកជំងឺអេដស៍ ជំងឺថ្លើម ជំងឺទឹកនោមផ្អែម ។ អ្នកដែលព្យាបាលជំងឺមហារីកដោយប្រើកាំរស្មី ឬអ្នកដែលធាត់លើសទម្ងន់ ។
-អ្នកចូលចិត្តបរិភោគសាច់ច្រើន ពិសាស្រា បារីច្រើន ។
-អ្នកដែលចូលចិត្តហូបស្លាម្លូ ឬប្រើប្រាស់ថ្នាំចុក ។
-តំណពូជ ឬអ្នកដែលគ្មានអនាម័យមាត់ធ្មេញ ។
-ការប្រើប្រាស់ឱសថបុរាណដែលគ្មានប្រភពច្បាស់លាស់ជាដើម ។
លោកសាស្ត្រាចារ្យទន្តបណ្ឌិតឱ្យដឹងថា ក្នុងមួយឆ្នាំៗកម្ពុជាកើតមានជំងឺមហារីកមាត់ ធ្មេញ ច្រើនជាងប្រទេសជិតខាង ថៃ ឡាវ និងវៀតណាម ដោយសារតែប្រជាជនខ្មែរយើងមិនសូវយកចិត្តទុកដាក់ពិនិត្យសុខភាពមាត់ ធ្មេញឱ្យបានត្រឹមត្រូវ ពិសេសចំណេះដឹងទាក់ទងទៅនឹងសុខភាពមាត់ ធ្មេញនៅមានកម្រិតនៅឡើយ ។
សញ្ញានៃជំងឺមហារីកមាត់ ធ្មេញមានដូចជា៖
-សាច់ដែលកើតមានលក្ខណៈរឹង ហើយគែមកៀនៗមានលក្ខណៈខ្ពស់ជាងសាច់ធម្មតា ។
-សាច់កណ្តាលដែលមានដំបៅមានសភាពរលួយ ។
-រាលដាលទៅកន្លែងផ្សេង និងឈឺចាប់ខ្លាំង ។
-នៅពេលកើតដំបៅរលួយ២ទៅ៣សប្តាហ៍ឡើងកូនកណ្តុរដែលជាសញ្ញាបញ្ជាក់ថាជំងឺនេះអាចនឹងរាលដាល ។
លោកសាស្ត្រាចារ្យទន្តបណ្ឌិតគាម ប៊ន បន្តថា ការព្យាបាលជំងឺមហារីក គឺមានបីវិធី គឺវះកាត់ ប្រើថ្នាំគីមី និងបាញ់កាំរស្មី ។
ដើម្បីការពារជំងឺមហារីកមាត់ ធ្មេញ លោកអ្នកត្រូវអនុវត្តតាមវិធី៖
-ធ្វើអនាម័យមាត់ ធ្មេញឱ្យបានល្អស្អាត ។
-ឈប់ជក់បារី ផឹកស្រា និងពិសាស្លាម្លូ ។
-ផ្លាស់ប្តូរពីការចូលចិត្តទទួលទានសាច់មកបន្លែផ្លែ ឈើ ។
-ក្នុងករណីមានដុំសាច់ ឬដំបៅ ឬភាពប្រែប្រួល មិនធម្មតាក្នុងមាត់ដែលបានកើតឡើងហើយមិនជា ឬបាត់ទៅវិញក្នុងរយៈពេល២ទៅ៣អាទិត្យ សូមប្រឹក្សាជាមួយទន្តបណ្ឌិត និងគ្រូពេទ្យជំនាញ។
-ណាត់ជួបជាមួយទន្តបណ្ឌិតជារៀងរាល់៦ខែម្តង ដើម្បីពិនិត្យសុខភាពមាត់ ធ្មេញរបស់លោកអ្នក ។ ធ្វើរោគវិនិច្ឆ័យទាន់ពេលអាចកាត់បន្ថយអត្រាស្លាប់ និងងាយស្រួលក្នុងការព្យាបាល ៕
ចែករំលែកព័តមាននេះ