បណ្តាសម្ព័ន្ធមិត្តរបបយោធា មិនសប្បាយចិត្តការបាត់ខ្លួនលោកស្រីយីងឡាក់
សម្ព័ន្ធមិត្តរបស់របបយោធាថៃជាអ្នកអភិរក្សនិយមច្រើននាក់បានសម្តែងពីការមិនសប្បាយចិត្តរបស់ពួកគេ ក្រោយការបាត់ខ្លួន
ប្រទេសថៃ ៖ សម្ព័ន្ធមិត្តរបស់របបយោធាថៃជាអ្នកអភិរក្សនិយមច្រើននាក់បានសម្តែងពីការមិនសប្បាយចិត្តរបស់ពួកគេ ក្រោយការបាត់ខ្លួនអតីតនាយករដ្ឋមន្ត្រីលោកស្រីយីងឡាក់ ស៊ីណាវ៉ាត្រា កាលពីថ្ងៃទី២៥ សីហា ជាថ្ងៃត្រូវប្រកាសសាលដីកាពីការកាត់ទោសលោកស្រី ។
រកមិនឃើញតាំងពីថ្ងៃនោះមក លោកស្រីយីងឡាក់ អាចភៀសខ្លួនទៅកាន់ក្រុងឌូបៃ ហើយស្វែងរកការសុំសិទ្ធិជ្រកកោននៅប្រទេសអង់គ្លេស ។ នេះបើយោងតាមប្រភពព័ត៌មាននានារបស់របបយោធាថៃ ។
លោកស្រីអតីតនាយករដ្ឋមន្ត្រីរូបនេះដែលត្រូវផ្តួលរំលំដោយរដ្ឋប្រហារយោធាកាលពីឆ្នាំ២០១៤ អាចមានទោសជាប់គុកដល់១០ឆ្នាំពីបទធ្វេសប្រហែសក្នុងរឿងទិញស្រូវពីកសិករក្នុងតម្លៃថ្លៃ ។ លោកស្រីពុំទៅបង្ហាញខ្លួនថ្ងៃប្រកាសសាលដីកាកាត់ទោសនៅតុលាការកំពូលដែលកាត់ទោសមនុស្សជំនិតរបស់លោកស្រី២នាក់ឱ្យជាប់គុកច្រើនឆ្នាំបំផុត ។
របបយោធាថៃអះអាងថា ខ្លួនពុំបានដឹងថាតើលោកស្រីយីងឡាក់ ដែលស្ថិតក្រោមការតាមឃ្លាំមើលយ៉ាងតឹងតែងបំផុតអាចចាកចេញពីថៃពុំអាចចាប់ខ្លួនបានរបៀបណាឡើយ ។ បណ្តាសារព័ត៌មានថៃលើកឡើងពីលទ្ធភាពនៃការព្រមព្រៀងគ្នាជាសម្ងាត់មួយជាមួយពួកយោធា ដែលថាលោកស្រីយីងឡាក់ ទៅក្រៅប្រទេសអាចកែមុខមាត់លើឆាកនយោបាយជាតិមុនការបោះឆ្នោតឆ្នាំ២០១៨ ។
ឥស្សរជននយោបាយនៃក្រុមអភិរក្សនិយមជាច្រើនរូប ក្នុងនោះមួយចំនួនធ្លាប់គាំទ្រដល់រដ្ឋប្រហារប្រឆាំងលោកស្រីយីងឡាក់ ហើយចាត់ទុកថាជាសម្ព័ន្ធមិត្តនៃរបបយោធាបានសម្តែងការភ្ញាក់ផ្អើល និងការមិនសប្បាយចិត្តរបស់ពួកគេ ។
លោក PANTHEP PUAPONGPAN ជាមេខ្លោងម្នាក់ក្នុងចំណោមមេខ្លោងធ្វើបាតុកម្មប្រឆាំងរដ្ឋាភិបាលឆ្នាំ២០១៤ ថ្លែងទៅកាន់សារព័ត៌មានថា ច្បាស់ណាស់ពួកភ្នាក់ងារសន្តិសុខ ដែលតាមដានយ៉ាងប្រកិតរួចថតរូបភាពលោកស្រីយីងឡាក់ គ្រប់ពេល ទោះលោកស្រីទៅកាន់ទីណាក្តី ហើយហេតុអីក៏លោកស្រីអាចគេចខ្លួនរត់រួច ។ លោកបន្តថា ពេលនេះលោកស្រីយីងឡាក់ រត់បាត់ហើយ ដូច្នេះរដ្ឋាភិបាល កងកម្លាំងសន្តិសុខ និងរបបយោធាត្រូវតែជាអ្នកទទួលខុសត្រូវ ។
មេខ្លោងប្រឆាំងត្រកូលស៊ីណាវ៉ាត្រា ម្នាក់ទៀតលោក VEERA SOMKWANDID ក៏សម្តែងកំហឹងតាម FACEBOOK ដែរ ។ លោកថា រដ្ឋាភិបាលត្រូវតាមប្រមាញ់ពួកក្បត់ ហើយដាក់ទោសពួកគេដែលបណ្តោយឱ្យលោកស្រីយីងឡាក់រត់រួច បើពុំដូច្នោះទេ របបយោធានឹងត្រូវជាប់ការចោទប្រកាន់ ៕
ចែករំលែកព័តមាននេះ