ខេត្តមណ្ឌលគិរី ៖ នៅទីបំផុត លិខិតរបស់រដ្ឋបាលខេត្តមណ្ឌលគិរី ដែលកំណត់ឲ្យម្ចាស់អាជីវកម្មការដ្ឋានសំណង់បេតុងលាយស្រេចរុះរើការដ្ឋាន ត្រឹមថ្ងៃទី២៨ កុម្ភៈ ២០២៣ ជាកំហិត ត្រូវបានលោកហ៊ាង…
ខេត្តមណ្ឌលគិរី ៖ នៅទីបំផុត លិខិតរបស់រដ្ឋបាលខេត្តមណ្ឌលគិរី ដែលកំណត់ឲ្យម្ចាស់អាជីវកម្មការដ្ឋានសំណង់បេតុងលាយស្រេចរុះរើការដ្ឋាន ត្រឹមថ្ងៃទី២៨ កុម្ភៈ ២០២៣ ជាកំហិត ត្រូវបានលោកហ៊ាង ឆៃលី ដែលជាម្ចាស់ទីតាំងទុកមិនស្មើក្រដាសជូតមាត់គ្មានតម្លៃអ្វីបន្តិចសោះ ដោយគិតត្រឹមថ្ងៃទី០១ មីនា ២០២៣ គ្មានសកម្មភាព ឬរូបភាពណាមួយដែលម្ចាស់អនុវត្តតាមការជូនដំណឹងរបស់អាជ្ញាធរឡើយ ។
សេចក្តីរាយការណ៍បានឲ្យដឹងថា នៅព្រឹកថ្ងៃទី០១ មីនា ២០២៣ អាជ្ញាធរខេត្តមណ្ឌលគិរី ដឹកនាំដោយលោកសាន់ ដារិទ្ឋ អភិបាលរងខេត្ត ដោយមានការសម្របសម្រួលពីលោកឈាវ ងីឈាន់ ព្រះរាជអាជ្ញាររងអមសាលាដំបូងខេត្តមណ្ឌលគិរី បានចុះពិនិត្យទីតាំង ការដ្ឋានសំណង់បេតុងលាយស្រេច ព្រោះដល់ពេលវេលាក្នុងការអនុវត្តតាមសេចក្តីសម្រេចរបស់រដ្ឋបាលខេត្ត ។ ប៉ុន្តែជាការហួសចិត្តសំណង់ដ៏ធំមហិមាកណ្តាលក្រុងសែនមនោរម្យនោះ មិនបានអនុវត្តតាមបញ្ជារបស់អាជ្ញាធរថែមទាំងបន្តសកម្មភាពធ្វើអាជីវកម្មទាំងគ្មានច្បាប់ល្មើសបំរាមរបស់ជំនាញយ៉ាងរំភើយដដែល ។
សេចក្តីរាយការណ៍បន្តថា អាជ្ញាធរចាប់តាំងពីឆ្នាំ២០២២ បានចុះហាមឃាត់និងចេញសេចក្តីជូនដំណឹងដល់លោក ហ៊ាង ឆៃលី ម្ចាស់ដេប៉ូលក់គ្រឿងសំណង់ខាងលើជាច្រើនដងរាប់ភ្លេច តែគាត់មិនស្តាប់ មិនអនុវត្តតាមសោះ។ទីតាំងការដ្ឋានសំណង់បេតុងលាយស្រេចនេះ មិនត្រឹមគ្មានច្បាប់អនុញ្ញាតទេ មានទាំងការសង់សំណង់រំលោភយកអូរធម្មជាតិនៅផ្នែកខាងក្រោយដែលបច្ចុប្បន្នកំពុងតវ៉ាក្តីនៅសាលាឧទ្ឋរណ៏។ចំណែកនៅផ្នែកខាងមុខការដ្ឋានសំណង់បេតុងលាយស្រេចនេះ បានបង្កឲ្យមានផលប៉ះពាល់ដល់ទ្រព្យសម្បត្តិសាធារណៈ ខូចខាតផ្លូវបេតុងដែលរដ្ឋទើបសាងសង់រួចកាលពីពេលថ្មីៗ ។
ខណៈកំពុងចុះពិនិត្យការអនុវត្តសេចក្តីជូនដំណឹងរបស់រដ្ឋបាលខេត្តមណ្ឌលគិរី គេសង្កេតឃើញថា លោក ហ៊ាង ឆៃលី ម្ចាស់ការដ្ឋានសំណង់បេតុងលាយស្រេច នៅតែទទូចស្នើរសុំទៅអាជ្ញាធរបន្តអាជីវកម្មបន្ថែមរយៈពេល៦០ថ្ងៃ ហើយរុះរើសំណង់ទាំងនោះដោយខ្លួនឯង ដែលផ្ទុយស្រឡះពីសេចក្តីសម្រេចរបស់រដ្ឋបាលខេត្តមណ្ឌលគិរី ដែលចេញកាលពីថ្ងៃទី២២ កុម្ភៈ ២០២៣ ត្រូវតែរើចេញជាកំហិតដាច់ខាតត្រឹមថ្ងៃទី២៨ កុម្ភៈ ២០២៣។
ទោះយ៉ាងណា ដោយសារអាជ្ញាធរមិនទាន់ដាច់ចិត្ត១០០% ក៏បានអនុញ្ញាតដោយពន្យាថ្ងៃរុះរើឲ្យលោក ហ៊ាង ឆៃលី ម្ចាស់ការដ្ឋានសំណង់បេតុងលាយស្រេចក្នុងភូមិចំការតែ សង្កាត់ស្ពានមានជ័យ ក្រុងសែនមនោរម្យ ចាប់ពីថ្ងៃទី០១ មិនា ២០២៣ ដល់ថ្ងៃទី១៤ មេសា ២០២៣។ បើម្ចាស់ការដ្ឋានមិនអនុវត្តកិច្ចសន្យាចុងក្រោយនេះទេ អាជ្ញាធរ និងប្រើប្រាស់វិធានការតាមផ្លូវច្បាប់ គ្មានការលើកលែងជាដាច់ខាត ។
ចែករំលែកព័តមាននេះ