ឆេះអគារកាស៊ីណូនៅព្រែកចាក ផ្អើលឈុល
- កំពត
ខេត្តកំពត ៖ កាស៊ីណូនៅច្រកទ្វារព្រំដែនព្រែកចាក ស្ថិតក្នុងភូមិលកព្រែកចាក ជិតព្រំដែន
ខេត្តកំពត ៖ កាស៊ីណូនៅច្រកទ្វារព្រំដែនព្រែកចាក ស្ថិតក្នុងភូមិលកព្រែកចាក ជិតព្រំដែនវៀតណាម ក្នុងឃុំឫស្សីស្រុកខាងលិច ស្រុកកំពង់ត្រាច បានរងគ្រោះដោយអគ្គិភ័យកាលពីវេលាម៉ោងប្រមាណ៩និង៣០នាទីព្រឹកថ្ងៃទី២៧ ខែកុម្ភៈ ឆ្នាំ២០២៣ ។ ប៉ុន្តែជាសំណាងល្អ ភ្លើងបានរលត់ទៅវិញ ដោយបានរថយន្តពន្លត់អគ្គិភ័យជាច្រើនគ្រឿងទៅជួយអន្តរាគមន៍បាញ់ទឹកពន្លត់ ។
កាស៊ីណូដែលឆេះនេះមានយីហោ «កាស៊ីណូខ្ញុំ» ដែលសម្បូរទៅដោយជនបរទេសចូលលេង ពិសេសជនជាតិវៀតណាម ។ នៅពេលកើតមានគ្រោះអគ្គិភ័យនេះ គេឃើញវត្តមានលោក អូន ខន អភិបាលស្រុកកំពង់ត្រាច និងលោកឧត្តមសេនីយ៍ទោ ច័ន្ទ មធុរិទ្ធ ស្នងការនគរបាលខេត្ត ទៅពិនិត្យផ្ទាល់ដល់ទីកន្លែងផងដែរ ។
បើតាមសន្តិសុខនៅកាស៊ីណូខាងលើ និយាយ ថា ការឆេះអគារកាស៊ីណូនេះមិនមែនជាអគារកំពុងលេងល្បែងនោះទេ គឹឆេះអគារផ្សេងដាច់ពីកាស៊ីណូ ។ ប៉ុន្តែអគារដែលឆេះនោះក៏មានការគ្រប់គ្រងពីក្រុមហ៊ុនកាស៊ីណូដែរ ហើយបច្ចុប្បន្ននៅជាន់ទី៥លើគេបំផុតនោះ កំពុងធ្វើការជួសជុលនិងតុបតែងឱ្យស្អាតសម្រាប់ទទួលភ្ញៀវ ។
ប្រភពដដែលនិយាយទៀតថា ការឆេះហុយផ្សែងខ្មួលទៅលើអាកាសមានរយៈពេលជិត១ម៉ោង និងមានរថយន្តពន្លត់អគ្គិភ័យរបស់នគរបាលស្រុកកំពង់ត្រាចទៅបាញ់ទឹកពន្លត់ និងរថយន្តបាញ់ស៊ីម៉ង់ត៍ដែលមានដៃវែងក៏បានបាញ់ទឹកទៅដល់បន្ទប់ដែលឆេះនោះ រហូតភ្លើងរលត់ទៅវិញ ។ បន្ទាប់មកទៀត ក៏មានរថយន្តពន្លត់អគ្គិភ័យរបស់ស្នងការដ្ឋាននគរបាលខេត្តចំនួន៤គ្រឿង រួមនឹងរថយន្តពន្លត់អគ្គិភ័យរបស់ស្រុកកំពង់ត្រាច និងស្រុកបន្ទាយមាស រួមទាំងរថយន្តពន្លត់អគ្គិភ័យរបស់ស្រុកដំណាក់ចង្អើរ ខេត្តកែប និងទាហាការពារព្រំដែន រួមជាមួយនគរបាលប៉ុស្តិ៍ច្រកទ្វារព្រំដែនអន្តរជាតិព្រែកចាកបានជួយអន្តរាគមន៍ ។
លោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្ត មានប្រសាសន៍ថា ការឆេះអគារកាស៊ីណូនេះមិនបានបង្កឱ្យមានគ្រោះថ្នាក់ដល់អាយុជីវិតនរណាម្នាក់ឡើយ ។ ទោះបីជាបែបណា មូលហេតុនាំឱ្យមានអគ្គិភ័យនេះ ភ្លាមៗនោះនៅមិនទាន់ដឹងច្បាស់នៅឡើយទេ ព្រោះជាបន្ទប់នៅជាន់ទី៥ ដែលកំពុងតុបតែងលម្អត្រៀមដំណើរការក៏ស្រាប់តែឆេះ ។
ជុំវិញករណីខាងលើនេះដែរ មានការសន្និដ្ឋានផ្សេងៗគ្នាពាក់ព័ន្ធនឹងការឆេះនេះ ដោយអ្នកខ្លះថាមកពីផ្ទុះហ្គាស និងអ្នកខ្លះថាមកទុស្សេខ្សែភ្លើ.ង ព្រោះគ្មាននណាបានដឹង និងឃើញទេ លុះឃើញមានផ្សែងហ៊ុយចេញក្រៅទៅហើយ ទើបនាំគ្នាដឹងថាឆេះ ៕
ចែករំលែកព័តមាននេះ