រាជធានីភ្នំពេញ ៖ លោកឧត្តមសេនីយ៍ត្រី ហ៊ុន សុរិទ្ធី ស្នងការរងទទួលផែនអន្តោប្រវេសន៍ នៃស្នងការដ្ឋាននគរបាលខេត្តព្រះសីហនុ បានឱ្យដឹងថា ៖ នៅវេលាម៉ោង១០និង៣០នាទីព្រឹក ថ្ងៃទី២១ ខែសីហា ឆ្នាំ២០១៧ កន្លងមកនេះ ដោយមានការពង្រឹងចង្អុលបង្ហាញ និងអនុវត្តទៅតាមបទបញ្ជាដ៏ម៉ឺងម៉ាត់ពីលោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ ក្នុងការរក្សាសន្តិសុខ សណ្តាប់ធ្នាប់សាធារណៈ បង្ការទប់ស្កាត់ និងបង្ក្រាបរាល់បទល្មើស ដើម្បីធានាសុវត្ថិភាពជូនដល់ប្រជាពលរដ្ឋ ក៏ដូចជាភ្ញៀវទេសចរណ៍ជាតិអន្តរជាតិ ។
ហើយនៅវេលាម៉ោងខាងលើ កម្លាំងនគរបាលការិយាល័យស៊ើបអង្កេត និងអនុវត្តនីតិវិធី នៃផែនអន្តោប្រវេសន៍ ដឹកនាំដោយលោកឧត្តមសេនីយ៍ត្រី ហ៊ុន សុរិទ្ធី ដោយមានកិច្ចសម្របសម្រួលពីលោក លឹម ប៊ុនហេង ព្រះរាជអាជ្ញារង នៃអយ្យការអមសាលាដំបូងខេត្តព្រះសីហនុ បានឆ្មក់ចូលបង្ក្រាបទីតាំងលេងល្បែងភ្នាល់ខុសច្បាប់តាមប្រព័ន្ធអ៊ីនធើណេត (GAME ONLINE ) មួយកន្លែង ដែលមានទីតាំងស្ថិតនៅចំណុចផ្ទះជួលមួយកន្លែងក្នុងក្រុម៣ ភូមិ២ សង្កាត់លេខ៣ ក្រុងខេត្តព្រះសីហនុ ។ លោក ហ៊ុន សុរិទ្ធី បានឲ្យដឹងបន្ថែមទៀតថា នៅក្នុងប្រតិបត្តិការឆ្មក់ចូលបង្ក្រាបទីតាំងខាងលើ សមត្ថកិច្ចការិយាល័យខាងលើបានធ្វើការឃាត់ខ្លួនជនជាតិចិនបានចំនួនម្នាក់ មានឈ្មោះ វ៉ាង ជូ ( Wang Chao ) សញ្ជាតិចិន អាយុ៣០ឆ្នាំ ជាបុគ្គលិកបម្រើការអ៊ីនធើណេតល្បែងស៊ីសង តាមប្រព័ន្ធអនឡាញនៅក្នុងទីតាំងខាងលើ ។
ដោយឡែកជនជាតិចិនចំនួន៥នាក់ផ្សេងទៀត បាននឹងកំពុងតែរត់គេចខ្លួន ហើយសមត្ថកិច្ចជំនាញបាននឹងកំពុងតែបន្តស្វែងរកអត្តសញ្ញាណ ឈានទៅដល់ការឃាត់ខ្លួនឲ្យខាងតែបាន ដើម្បីយកមកផ្តន្ទាទោសទៅតាមផ្លូវច្បាប់ ។
លោកឧត្តមសេនីយ៍ត្រី ហ៊ុន សុរិទ្ធី បានបន្តឲ្យដឹងទៀតថា ៖ នៅក្នុងកិច្ចការបង្ក្រាបក្នុងទីតាំងខាងលើនេះ សមត្ថកិច្ចដកហូតវត្ថុតាងបម្រើការសម្រាប់ល្បែងភ្នាល់ខុសច្បាប់តាមប្រព័ន្ធអ៊ីនធើណេតមានដូចជា ៖ ១.Laptop ចំនួន៣គ្រឿង, ស៊ីមកាតទូរស័ព្ទសម្រាប់ប្រើប្រាស់មួយចំនួន, Flash សម្រាប់ផ្ទេរប្រាក់ចូលចេញមួយចំនួនធំ, និងរថយន្ត Lexus RX300 ចំនួន២គ្រឿង ។
នៅចំពោះមុខសមត្ថកិច្ច ជនជាតិចិនដែលឃាត់ខ្លួនបាន សារភាពថា ៖ ពួកគេពិតជាបានមកលួចបើកលេងល្បែងភ្នាល់តាមអ៊ីនធើណេតប្រព័ន្ធអនឡាញ ដែលមានទីតាំងខាងលើនេះពិតប្រាកដមែន ។ ក្រោយពេលឃាត់ខ្លួនជនជាតិចិន ដែលសមត្ថកិច្ចឃាត់ខ្លួនបានខាងលើ និងវត្ថុតាង ត្រូវបានកម្លាំងនគរបាលជំនាញផែនអន្តោប្រវេសន៍ នៃស្នងការដ្ឋាននគរបាលខេត្តព្រះសីហនុ កសាងសំណុំរឿងបញ្ជូនខ្លួនទៅសាលាដំបូងខេត្តព្រះសីហនុ នារសៀលថ្ងៃទី២១ ខែសីហា ឆ្នាំ២០១៧ ដើម្បីចាត់ការទៅតាមនីតិវិធីច្បាប់ ។ និងបន្តស្រាវជ្រាវរកជនជាតិចិន៥នាក់ផ្សេងទៀត ដែលកំពុងរត់គេចខ្លួន ដើម្បីឈានដល់ការឃាត់ខ្លួន យកមកផ្តន្ទាទោសទៅតាមច្បាប់ ៕
ចែករំលែកព័តមាននេះ