មានគ្រែយក្សចំនួន២គ្រឿងដែលម្ចាស់គ្រែ បានអះអាងថា មានវិញ្ញាណអមនុស្សថែរក្សា ហើយរារាំងមិនឲ្យមនុស្សប្រុសដេកលើគ្រែនេះទេ នៅពេលណាម្ចាស់គ្រែជាមនុស្សប្រុសឡើងដេកគឺ
ខេត្តស្វាយរៀង ៖ មានគ្រែយក្សចំនួន២គ្រឿងដែលម្ចាស់គ្រែ បានអះអាងថា មានវិញ្ញាណអមនុស្សថែរក្សា ហើយរារាំងមិនឲ្យមនុស្សប្រុសដេកលើគ្រែនេះទេ នៅពេលណាម្ចាស់គ្រែជាមនុស្សប្រុសឡើងដេកគឺអមនុស្សថែរក្សាគ្រែតែងតែលងបន្លាចធ្វើជាទាហានដេញបាញ់ម្ចាស់ផ្ទះរត់រកព្រះអាយុទាំងព្រលឹងចុងសក់។
ចំណែកគ្រែយក្ស១គ្រឿងទៀត លងបន្លាចបើកភ្នែកធំៗដាក់ ហើយដេញឲ្យចុះពីលើគ្រែ ដោយប្រាប់ថា «កុំមកដេកកន្លែងយើង» ធ្វើឲ្យម្ចាស់គ្រែភ័យខ្លាចយ៉ាងខ្លាំង លុះព្រឹកឡើងរកគ្រូមកប្រោះព្រំដេញអមនុស្សចេញ តែគ្មានប្រសិទ្ធភាពនោះទេ ក៏និមន្តព្រះសង្ឃមកសូត្រមន្តចម្រើនព្រះបរិត្តលើករាសី ក៏ប៉ុន្តែ២ទៅ៣ថ្ងៃក្រោយមក ម្ចាស់គ្រែឡើងដេកលើគ្រែទៀតក៏ត្រូវអមនុស្សចូលក្នុងរូបកូនស្រីអាយុ៣ឆ្នាំស្រែកដេញឲ្យចុះពីលើគ្រែ ខណៈបុរសរូបនោះចុះពីលើគ្រែហើយ ក៏មានកម្លាំងខ្យល់មកបុកខ្លួនធ្វើឲ្យបុរសម្ចាស់គ្រែភ័យខ្លាចក៏យកគ្រែយក្ស១គ្រឿងនោះទៅប្រគេនព្រះសង្ឃ ព្រះគ្រូចៅអធិការវត្ត បូទុមសុផានារាម ហៅវត្តគយត្របែកតែម្តង។
បើតាមព្រះគ្រូ ព្រហ្មវិយោ រឹក សំបូ ព្រះចៅអធិការវត្ត បូទុមសុផានារាម មានសង្ឃដីកាប្រាប់កោះសន្តិភាព នាល្ងាចថ្ងៃទី២៣ ខែកុម្ភៈ ឆ្នាំ២០២៣នេះថា ពិតជាមានអមនុស្សលងបន្លាចម្ចាស់គ្រែយក្សពិតប្រាកដមែន លងបន្លាចរហូតម្ចាស់គ្រែភ័យខ្លាច ហើយសម្រេចចិត្តដឹកគ្រែនោះមកប្រគេនព្រះសង្ឃ។ គ្រែយក្សមានអមនុស្សគេថែរក្សា គឺមាន០២គ្រឿង នៅក្រុងស្វាយរៀងនេះ។
ព្រះតេជគុណ មានថេរៈដីកាបន្តថា ដោយគ្រែទី១- ជាគ្រែរបស់ឯកឧត្តឧត្តមសេនីយ៍ឯក ព្រំ សាំ ធ្វើការកងយោធាយុទ្ធពលខេមរៈភូមិន្ទនៃក្រសួងការពារជាតិ ដែលមានទីលំនៅភូមិពោធិតាហោ សង្កាត់ពោធិតាហោ ក្រុងស្វាយរៀង។ ហើយឯកឧត្តម បានជាវគ្រែប្រភេទគ្រែយក្ស១គ្រឿងធ្វើអំពីឈើបេង ទំហំ២ម៉ែត្រគុណ១,៨០ម៉ែត្រ កម្រាស់២តឹក យកមកដាក់នៅគេហដ្ឋានរបស់ឯកឧត្តម នៅភូមិពោធិតាហោ។
ព្រះតេជគុណ បន្តថា ហើយនៅពេលដែលឯកឧត្តម និងលោកជំទាវ ចូលសម្រាកលើគ្រែយក្សនោះនាពេលយប់ ខណៈពេលដែលឯកឧត្តមកំពុងសម្រាកលង់លក់ ស្រាប់តែមានហេតុការណ៍ទាហានម្នាក់បានយកកាំភ្លើ.ងមកដេញបាញ់ឯកឧត្តម តែបាញ់ត្រូវបង្អួចកញ្ចក់បែកលាន់ច្រាវ។ ហើយឯកឧត្តមក៏ដាស់លោកជំទាវជាភរិយា រត់គេចចុះមកដី រួចហៅអង្គរក្សឲ្យឡើងទៅលើផ្ទះ រួចប្រាប់ថា «មានមនុស្សឡើងទៅដេញបាញ់ឯកឧត្តមនៅក្នុងបន្ទប់»។ ខណៈនោះក្រុមទាហានអង្គរក្សក៏បានទាញអាវុធរត់ឡើងទៅមើលលើផ្ទះក្នុងបន្ទប់ គឺគ្មានឃើញអ្វីទាំងអស់ សភាពក្នុងបន្ទប់ស្ងាត់ធម្មតា ហើយកញ្ចក់ទូ និងកញ្ចក់បង្អួចគ្មានឃើញបែកនោះទេ គឺនៅល្អធម្មតា។
ព្រះតេជគុណ បន្តទៀតថា ក្រោយមកឯកឧត្តមក៏បានឡើងទៅលើផ្ទះពិនិត្យក្នុងបន្ទប់គេង និងសម្ភារៈលើគ្រែគឺមានសភាពធម្មតាដែរ ទើបធ្វើការសន្និដ្ឋានថា ពិតជាមានខ្មោចលង បន្ទាប់មកក៏និមន្តព្រះសង្ឃ ព្រះគ្រូចៅអធិការវត្តបូទុមសុផានារាម ហៅវត្តគយត្របែក និមន្តទៅសូត្រមន្តចម្រើនព្រះបរិត្ត ប្រោះព្រហ្មលើករាសី ក៏ប៉ុន្តែមុននឹងសូត្រមន្តព្រះគ្រូចៅអធិការឲ្យជាងដោះគ្រែនោះពិនិត្យមើល ហេតុភេទឃើញថា គ្រែនោះ ក្នុងជើងគ្រែជាងយកឈើដែលមានជាប់សំបកមកធ្វើជើងគ្រែ ហើយយកឈើខ្លឹមមកបិទពីលើ ដោយទុកសំបកឈើនៅក្នុងសសរជើងគ្រែ ទើបបង្កឲ្យមានអមនុស្សកើតភេទនៅថែរក្សាគ្រែនេះ។ ក្រោយមកព្រះតេជគុណ ក៏បានឲ្យជាងឆ្កឹះយកសំបកឈើចេញ រួចបិទឈើជើងគ្រែ និងរៀបតម្លើងគ្រែឡើងវិញ ហើយសូត្រមន្តចម្រីនព្រះបរិតលើករាសី រួចឱ្យឯកឧត្តម សម្រាន្តបានសេចក្តីសុខរហូតមក។
ព្រះតេជគុណ មានថេរៈដីកាបន្តបន្តថា ចំពោះគ្រែយក្សទី២ គឺជារបស់វរសេនីយ៍ ឡឹក សុខា មន្ត្រីនគបាលជាតិ នៃស្នងការដ្ឋាននគបាលខេត្តស្វាយរៀង ដែលមានទីលំនៅភូមិស្រះវង្ស សង្កាត់ស្វាយរៀងក្រុងស្វាយរៀង។ ហើយលោកបានទិញគ្រែយក្ស១គ្រឿងនេះ តាមអនឡាញក្នុងតម្លៃ៧,០០០ដុល្លារ កាលពី៥ខែមុន។ គ្រែនេះ គឺជាប្រភេទគ្រែយក្សទំហំ២ម៉ែត្រគុណ១,៨០ម៉ត្រ កម្ពស់ក្បាលគ្រែ១,៨០ម៉ែត្រ ជាប្រភេទឈើបេង កម្រាស់២តឹក សសរជើងគ្រែ៤តឹក បានរៀបតម្លើងដាក់ក្នុងបន្ទប់គេង។
ព្រះតេជគុណ មានដីកាបន្តថា ហើយគ្រែខាងលើនេះមានហេតុភេទចម្លែក បើប្រពន្ធកូនលោកសម្រាន្ត គឺគេងលក់ធម្មតា ក៏ប៉ុន្តែនៅពេលលោកជាប្តីឡើងគេងលើគ្រែដល់កណ្តាលយប់ក៏ឃើញមានស្ត្រី២នាក់ម្តាយកូនមកដេញឲ្យចុះចេញពីលើគ្រែ។ ដោយយល់ថា មានខ្មោចលងក៏ទៅអញ្ជើញលោកគ្រូអាចារ្យឲ្យមកសូត្របណ្តេញអមនុស្សចេញពីគ្រែនោះមួយលើកជាពីលើកនៅតែដដែល ហើយយប់ខ្លះពេលកំពុងដេកជាមួយប្រពន្ធកូន ស្រាប់តែកូនស្រីអាយុ៤ឆ្នាំ ស្ទុះឡើង ហើយស្រែកចង្អុលមុខដេញឪពុកខ្លួនឲ្យចុះចេញពីលើគ្រែ គឺអមនុស្សនោះចូលក្នុងរូបកូនស្រី រួចក្រោកចង្អុលមុខឪពុក ហើយនិយាយថា «ចុះចេញពីគ្រែយើង» បន្ទាប់មកក៏សម្រេចចិត្តរុះរើគ្រែនោះយកចេញពីបន្ទប់ ហើយដឹកយកទៅប្រគេនព្រះគ្រូចៅអធិការវត្តគយត្របែកតែម្តង។ ហើយបើគិតមកដល់បច្ចុប្បន្ននេះ គឺមានរយៈពេលជិត៣ខែមកហើយ។
ព្រះតេជគុណ យុត្តភិរក្ខ័ រឹក សំបូរ រាជាគណៈថ្នាក់កិត្តិយស និងជាព្រះអនុគណក្រុងស្វាយរៀង ព្រះគ្រូចៅអធិការវត្តបូទុមសុផានារាម ហៅគយត្របែក មានថេរៈដីកាអំពីហេតុភេទកើតឡើងនូវអមនុស្សនេះ បើយោងតាមគាពី អភិធម្ម ព្រះពុទ្ធសម្តែងថា បើមានដើមឈើធំៗទំហំមួយអោបឡើងទៅ បើដុះជិតគ្នាបួនដើម ឬគេយកដើមឈើធំនោះ៤ដើមផ្គុំចូលគ្នា គឺអាចកើតមានភេទអមនុស្សឡើង នេះជាធម្មជាតិពិត។ ហើយចំពោះគ្រែ០២គ្រឿង ដែលមានអមនុស្សនៅថែរក្សា គឺមូលហេតុក្រុមជាងសាងគ្រែ យកឈើធំៗមកធ្វើជើងគ្រែ ដោយយកឈើដែលជាប់សំបក មកអាជ្រៀក រួចពុះជ្រៀកកំណាត់ឈើផ្សេងមួយទៀតមកបិទស្រោបពីលើ ដោយមិនបានយកសំបកឈើខាងក្នុងចេញ ហើយអ្នកទិញតាមអនឡាញមិនបានពិនិត្យគ្រែឲ្យបានច្បាស់ ដោយគេតម្លើងរួចលាបថ្នាំមើលទៅថ្មីស្អាតក៏ទទួលយក លុះដល់ពេលឡើងដេក អមនុស្សគេថែរក្សា ជាភេទស្រី ទើបមិនឲ្យមនុស្សប្រុសឡើងដេកលើគ្រែនោះទេ។
ព្រះតេជគុណ បន្តទៀតថា ហើយពេលយកមកដាក់នៅក្នុងកុដដំបូងក៏គ្មានអ្នកណាដេកបានដែរ ក្មេងវត្តទៅដេកលើគ្រែនោះតែងតែលងដេញចេញ ក៏ប៉ុន្តែព្រះតេជ្ជគុណបានឲ្យជាងរុះរើគ្រែនោះយកសំបកឈើនៅខាងក្នុងចេញ ហើយតម្លើងជាថ្មីទុកក្នុងកុដរយៈពេល៣ខែ និងបើកភ្លើងសូត្រធម៌រាល់ថ្ងៃទៅ ទំនងជាអមនុស្សយល់ពីធម៌ ទើបស្លូត។ ហើយនៅប៉ុន្មានថ្ងៃនេះ លោកឲ្យកូនសិស្សមកថ្មីម្នាក់មកដេកលើគ្រែនេះសាកមើល ស្រាប់តែស្ងប់ស្ងាត់ធម្មតា មិនឃើញមានលងទៀតទេ គឺដេកបាន៧យប់មកហើយ គឺបានជាសុខ។
ព្រះតេជគុណបញ្ជាក់ថា ជំនឿអរូបីយ៍ អារក្ស អ្នកតា អមនុស្សគឺពិតជាមាន នៅលើភពផែនដីយើងនេះ ជាពិសេសខ្មែរយើងអ្នកកាន់ប្រតិបត្តិព្រះពុទ្ធសាសនា ក៏មិនចោលព្រហ្មញ្ញសាសនាដែរ មានវត្តគឺមានតូបអ្នកតា និងតូបយាយទេព បើមិនជឿ ក៏កុំប្រមា.ថ៕
ចែករំលែកព័តមាននេះ