ក្មេងទំនើង២នាក់ដែលរពឹសដៃគប់កញ្ចក់រថយន្តគេ ពេលនេះត្រូវតុលាការសម្រេចហើយ
- កំពត
កម្លាំងនគរបាលស្រុកដងទង់បានរាយការណ៍មកថា មានកម្មភាពអុកឡុកនៅតាមតំបន់ជាប់ផ្លូវជាតិលេខ៣ បង្កឡើងដោយក្មេងទំនើងចំនួន
ខេត្តកំពត ៖ រសៀលថ្ងៃទី២១ ខែកុម្ភៈ ឆ្នាំ២០២៣កន្លងទៅ សាលាដំបូងខេត្តបានបញ្ជូនក្មេងទំនើង២នាក់ដាក់ពន្ធនាគារ ដោយចោទប្រកាន់ពីបទហិ.ង្សាដោយចេតនា ប្រព្រឹត្តកាលពីថ្ងៃទី១៨ ខែកុម្ភៈ ឆ្នាំ២០២៣ វេលាម៉ោងប្រមាណ៤និង៣០នាទីរសៀល នៅតាមផ្លូវជាតិលេខ៣ ចន្លោះបង្គោលគីឡូម៉ែត្រលេខ១១៦-១១៧ ស្ថិតក្នុងភូមិត្រពាំងរាំង ឃុំអង្គរមាសស្រុកដងទង់ ។
យោងតាមប្រភពព័ត៌មានពីការិយាល័យនគរបាលព្រហ្មទណ្ឌកម្រិតស្រាលខេត្ត បានឲ្យដឹងថា
នៅថ្ងៃទី១៨ ខែកុម្ភៈ ឆ្នាំ២០២៣ កម្លាំងនគរបាលស្រុកដងទង់បានរាយការណ៍មកថា មានកម្មភាពអុកឡុកនៅតាមតំបន់ជាប់ផ្លូវជាតិលេខ៣ បង្កឡើងដោយក្មេងទំនើងចំនួន៧នាក់ជិះម៉ូតូ៤គ្រឿង បានយកដុំថ្មគប់កញ្ចក់រថយន្តអ្នកដំណើរតាមផ្លូវជាតិលេខ៣ ស្ថិតក្នុងភូមិ ឃុំខាងលើ ។
ក្រោយពីទទួលបានសេចក្តីរាយការណ៍នេះ កម្លាំងនគរបាលការិយាល័យព្រហ្មទណ្ឌកម្រិតស្រាលខេត្ត ដឹកនាំដោយលោកវរសេនីយ៍ឯក លក ញ៉ាវ ស្នងការរងនគរបាលខេត្ត ទទួលផែនព្រហ្មទណ្ឌ បានចុះទៅដល់កន្លែងកើតហេតុ ចាប់ឃាត់ខ្លួនក្មេងទំនើងបាន២នាក់ នាំមកស្នងការដ្ឋាននគរបាលខេត្តដើម្បីសាកសួរ ។
នៅចំពោះមុខសមត្ថកិច្ច ក្មេងទំនើងទាំង២នាក់ឆ្លើយថា ពួកគេពិតជាធ្វើសកម្មភាពអុកឡុក និងគប់កញ្ចក់រថយន្តអ្នកដំណើរប្រាកដមែន ។ ទាំង២នាក់នេះ ម្នាក់ឈ្មោះ រឹម ដារ៉ុន ភេទប្រុស អាយុ១៧ឆ្នាំ និងម្នាក់ទៀតឈ្មោះ ចាន់ រស្មី ភេទប្រុស អាយុ១៥ឆ្នាំ ។ ពួកគេមានទីលំនៅក្នុងភូមិល្អាង ឃុំល្អាង ស្រុកដងទង់ ។
សមត្ថកិច្ចឲ្យដឹងទៀតថា ជនឈ្មោះ ចាន់ រស្មី កាលពីឆ្នាំ២០២១ ធ្លាប់ត្រូវបានសាលាដំបូងកោះហៅឲ្យចូលខ្លួនពាក់ព័ន្ធនឹងករណីហិ.ង្សាលើអ្នកដទៃ ព្រមទាំងបានចុះកិច្ចសន្យាតម្កល់ទុកនៅសាលាដំបូងម្តងហើយ ដោយគ្រាន់តែធ្វើការអប់រំហើយដោះលែងឲ្យមានសេរីភាពវិញ ៕
ចែករំលែកព័តមាននេះ