ខេត្តកណ្តាល ៖ ជាងសំណង់ម្នាក់ ខណៈឡើងរៀបរន្ទាដែកដើម្បីបិទក្បាច់ខ្លោងទ្វារវត្តកំពង់ភ្នំ ស្រាប់តែលើកដែកទៅប៉ះជាមួយនឹងខ្សែភ្លើងស្រា.តដែលនៅចម្ងាយពីខ្លួនប្រហែលជាង១ម៉ែត្រ បណ្តាលឱ្យឆ្លងចរន្តអគ្គិសនីឆក់ធ្លាក់ពីលើខ្លោងទ្វារ ដែលមានកម្ពស់ប្រហែល៥ទៅ៦ម៉ែត្រមកដី និងបានស្លា.ប់ចោលប្រពន្ធ និងកូនតូចៗចំនួន៣នាក់ ក្រោយពេលបញ្ជូនទៅដល់មន្ទីរពេទ្យ ។
ហេតុការណ៍ខាងលើនេះ បង្កឱ្យមានការភ្ញាក់ផ្អើលកាលពីវេលាម៉ោងប្រមាណ៩និង១៥នាទីព្រឹកថ្ងៃទី១៣ ខែកុម្ភៈ ឆ្នាំ២០២៣កន្លងទៅ ស្ថិតនៅភូមិកំពង់ពោធិ៍ ឃុំកំពង់ភ្នំ ស្រុកលើកដែក។ ចំណែកជនរងគ្រោះមានឈ្មោះ ថៃ វីរ: ហៅ ជា អាយុ៣២ឆ្នាំ ជនជាតិខ្មែរ មុខរបរជាងសំណង់ និងមានទីលំនៅក្នុងភូមិ-ឃុំ ខាងលើ ។
បើតាមបុរសម្នាក់ដែលមានឈ្មោះ នឿន វុទ្ធី បានឱ្យដឹងថា មុនពេលកើតហេតុ គឺមានកម្មករចំនួន៣នាក់ រួមទាំងរូបគាត់ផង បាននាំគ្នារៀបរន្ទាដែកដើម្បីឡើងបិទក្បាច់ ដោយរូបគាត់នៅដីចាំហុចដែក រីឯជាងម្នាក់ទៀតឡើងទៅត្រឹមក្រោមប្លង់សេខ្លោងទ្វារ ។ ចំណែកជនរងគ្រោះឡើងទៅលើកំពូលខ្លោងទ្វារ ស្រាប់តែលើកដែកទៅប៉ះជាមួយនឹងខ្សែភ្លើងស្រា.ត បណ្តាលឲ្យឆក់ធ្លាក់មកដីតែម្តង។ ភ្លាមៗនោះ ជាងសំណង់រួមជាមួយកូនជាង ក៏ប្រញាប់ប្រញាល់លើកជនរងគ្រោះដាក់លើរទេះ រួចដឹកយកទៅសង្គ្រោះនៅមន្ទីរពេទ្យ ប៉ុន្តែជាអកុសលនៅពេលទៅដល់ ត្រូវបានគ្រូពេទ្យប្រាប់ថា ជនរងគ្រោះស្លា.ប់បាត់ទៅហើយ ។
ចំណែកក្រុមគ្រួសារជនរងគ្រោះ ក៏បានរៀបរាប់ដែរថា ជនរងគ្រោះមានប្រពន្ធធ្វើការនៅរោងចក្រ និងមានកូនចំនួន៣នាក់គិតទាំងនៅក្នុងផ្ទៃពោះម្តាយជាង២ខែផង។ សព្វថ្ងៃនេះ ជីវភាពគ្រួសារនេះជួបការលំបាកខ្លាំង ហើយជំពាក់លុយគេ ដោយបានប្តីជាអ្នករកលុយសងដោះបំណុល។ ចុះឥឡូវនេះ បើប្តីស្លា.ប់បាត់ទៅហើយ តើឱ្យគ្រួសារនេះសង្ឃឹមអ្វីទៀត កូនៗក៏នៅតូច ហើយកូនម្នាក់មានជំងឺរលាកស្រោមខួរប្រចាំកាយ រីឯប្រពន្ធមានផ្ទៃពោះទៀត?។
ចំណែករឿងដែលធ្វើឱ្យក្រុមគ្រួសារជនរងគ្រោះ ក៏ដូចជាមហាជនហួសចិត្តនោះ គឺខាងម្ចាស់ក្រុមហ៊ុនអគ្គិសនីស្រុកលើកដែក ចិត្តដាច់ណាស់ គ្នាស្លា.ប់បាត់បង់ជីវិតទៅហើយ កុំថាឡើយមកសួរនាំ សូម្បីតែលុយកាក់ចូលរួមរំលែកទុក្ខចូលបុណ្យស.ពក៏គ្មានផង គឺបានព្រះគ្រូចៅអធិការវត្តកំពង់ភ្នំក្នុង ជួយ១០០ដុល្លារ និងគ្រឿងឧបភោគបរិភោគសម្រាប់ធ្វើបុណ្យជូនជនរងគ្រោះ ។
គួរបញ្ជាក់ថា ជុំវិញបញ្ហាខាងលើនេះ លោក អាំ ធូ អធិការនគរបាលស្រុកលើកដែក ក៏បានថ្លែងឱ្យដឹងថា ករណីនេះ មិនមែនជាកំហុសរបស់ខាងអគ្គិសនីទេ គឺជាការធ្វេសប្រហែសរបស់ជនរងគ្រោះ ទើបខាងភ្លើងគេមិនអើពើ។ ទោះបីជាបែបណា មនុស្សស្លា.ប់ទៅហើយ ក្នុងមនោសញ្ចេតនាអាណិតអាសូរ មិនគួរមើលនឹងភ្នែកនោះឡើយ។
គួរបញ្ជាក់ទៀតថា ចំណែកឯភាគីខាងក្រុមហ៊ុនអគ្គីសនីវិញ ភ្នាក់ងារយើងមិនអាចទាក់ទងសុំការបំភ្លឺបាននៅឡើយទេ៕
ចែករំលែកព័តមាននេះ