លិចទូក នៅស្ទឹងត្រែង រកឃើញស.ព ៣នាក់ តែបន្តបាត់ខ្លួនម្នាក់!
- ស្ទឹងត្រែង
ខេត្តស្ទឹងត្រែង៖ កាលពីថ្ងៃទី១៤ ខែកុម្ភៈ ឆ្នាំ២០២៣ ប្រជាពលរដ្ឋមួយគ្រួសារ មានក្មេងចាស់ ចំនួន ៨នាក់ បានធ្វើដំណើរតាមទូកតូចមួយគ្រឿង ចេញពីភូមិកោះកី…
ខេត្តស្ទឹងត្រែង៖ កាលពីថ្ងៃទី១៤ ខែកុម្ភៈ ឆ្នាំ២០២៣ ប្រជាពលរដ្ឋមួយគ្រួសារ មានក្មេងចាស់ ចំនួន ៨នាក់ បានធ្វើដំណើរតាមទូកតូចមួយគ្រឿង ចេញពីភូមិកោះកី…
ខេត្តស្ទឹងត្រែង៖ កាលពីថ្ងៃទី១៤ ខែកុម្ភៈ ឆ្នាំ២០២៣ ប្រជាពលរដ្ឋមួយគ្រួសារ មានក្មេងចាស់ ចំនួន ៨នាក់ បានធ្វើដំណើរតាមទូកតូចមួយគ្រឿង ចេញពីភូមិកោះកី ឃុំកោះស្នែង ស្រុកបុរីអូរស្វាយសែនជ័យ ឆ្លងកាត់ទន្លេមេគង្គ ដើម្បីទៅប្រកបមុខរបរ នៅភូមិខាំផាន់ សង្កាត់សាមគ្គី ក្រុង ស្ទឹងត្រែង។ លុះមកដល់ចំណុចកន្ទុយកោះហាន ក្នុងឃុំកោះស្នែង ក៏បានលិចទូក ហើយមនុស្ស ៤នាក់ រួចផុតពីគ្រោះថ្នាក់ និងបាត់ខ្លួនមនុស្ស ៤នាក់។
រហូតដល់ថ្ងៃទី១៦ ខែកុម្ភៈនេះ សាកស.ពចំនួន ៣នាក់ ត្រូវបានរកឃើញ និងម្នាក់ទៀត កំពុងត្រូវកម្លាំងសមត្ថកិច្ច បន្តស្វែងរក។
ដើម្បីចូលរួមរំលែកទុក្ខ និងរំលែកការលំបាករបស់ក្រុមគ្រួសារជនរងគ្រោះ លោក ស្វាយ សំអ៊ាង អភិបាលខេត្តស្ទឹងត្រែង និងជាប្រធានសាខាកាកបាទក្រហមកម្ពុជាខេត្ត បានដឹកនាំសមាជិក សមាជិកា អជ្ញាធរមូលដ្ឋាន បាននាំយកអំណោយសប្បុរសធម៌ ជាសម្ភារៈ និងបច្ច័យទៅជូនគ្រួសារសព នាព្រឹកថ្ងៃទី១៦ ខែកុម្ភៈនេះ។
ក្នុងឱកាសនោះ លោកអភិបាលខេត្ត បាននាំនូវប្រសាសន៍របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ចូលរួមសោកស្តាយ និងរំលែកទុក្ខយ៉ាងក្រៀមក្រំបំផុត ជាមួយក្រុមគ្រួសារសព ដែលត្រូវបាត់បង់ សាច់ញាតិក្នុងពេលតែមួយ។
ដើម្បីចូលរួមសោកស្តាយ និងរំលែកទុក្ខយ៉ាងក្រៀមក្រំបំផុត ជាមួយក្រុមគ្រួសារសពរងគ្រោះ សាខាកាកបាទក្រហមកម្ពុជាខេត្តស្ទឹងត្រែង បាននាំយកនូវសម្ភារៈ គ្រឿងឧបភោគបរិភោគ រួមមានអង្ករ១០០គីឡូក្រាម ត្រីខ២យួ មី៤កេស ឃីត២ ទឹកត្រី២យួ ទឹកស៊ីអ៊ីវ២យួ ទឹកសុទ្ធ ៤យួ និងទទួលបាននូវថវិការពីសាកាកបាទក្រហមកម្ពុជាចំនួន ២លានរៀល ថវិកាសាលាខេត្តចំនួន ២លានរៀល ថវិការបស់សាលាក្រុងចំនួន ១លានរៀល និងថវិកាផ្ទាល់ខ្លួនរបស់លោកឧត្តមសេនីយ៍ទោ អ៊ូត ស៊ីវុត្ថា ស្នងការនគបាលខេត្ត ចំនួន ១លានរៀល ជូនក្រុមគ្រួសារសព។
ទន្ទឹមនឹងនេះ លោកអភិបាលខេត្ត ក៏បានផ្តល់នូវថវិកាចំនួន ៣លានរៀល ជូនក្រុមកងកម្លាំង និងប្រជាការពារ ដែលបានប្រឹងប្រែង ស្វែងរកស.ពជនរងគ្រោះផងដែរ។
លោក ស្វាយ សំអ៊ាង ប្រធានសាខាកាកបាទក្រហមកម្ពុជាខេត្ត បានមានប្រសាសន៍ អំពាវនាវដល់ប្រជាពលរដ្ឋ ដែលរស់នៅតាមដងទន្លេ និងធ្វើដំណើរតាមផ្លូវទឹក ត្រូវបង្កើនការប្រុងប្រយ័ត្នឲ្យបានខ្ពស់ និងត្រូវនាំគ្នាប្រើប្រាស់អាវពោងការពារ ដើម្បីសុវត្ថិភាព ក្នុងការធ្វើដំណើរ។ ម៉្យាង ប្រជាពលរដ្ឋត្រូវប្រុងប្រយ័ត្នឲ្យបានកាន់តែខ្លាំងបន្ថែមទៀត និងមិនគួរធ្វើដំណើរតាមផ្លូវទឹក អំឡុងពេលដែលអាកាសធាតុ មិនល្អ ដែលអាចនាំឲ្យមានគ្រោះថ្នាក់ដល់អាយុជីវិត ដោយប្រការណាមួយ ដែលមើលមិនឃើញ៕
ចែករំលែកព័តមាននេះ