ភ្នំក្រឡាពស់ ឬក្រឡាពុះ ត្រូវបានក្រសួងបរិស្ថានកំពុងរៀបចំដាក់ជាតំបន់ការពារធម្មជាតិ ដោយតំបន់នេះមានសក្តានុពលធនធានធម្មជាតិជីវៈចម្រុះ សត្វកម្រងាយរងគ្រោះ និងជាប្រភព
ខេត្តស្ទឹងត្រែង ៖ ភ្នំក្រឡាពស់ ឬក្រឡាពុះ ត្រូវបានក្រសួងបរិស្ថានកំពុងរៀបចំដាក់ជាតំបន់ការពារធម្មជាតិ ដោយតំបន់នេះមានសក្តានុពលធនធានធម្មជាតិជីវៈចម្រុះ សត្វកម្រងាយរងគ្រោះ និងជាប្រភពទឹកដ៏សំខាន់ផងដែរ។
បើតាមលោក ផៃ ប៊ុនឈឿន រដ្ឋលេខាធិការប្រចាំការក្រសួងបរិស្ថាន ធ្លាប់បានប្រាប់ឲ្យដឹងនាពេលកន្លងទៅថា ការសិក្សាបង្កើត តំបន់ការពារធម្មជាតិភ្នំក្រឡាពស់នេះ ដោយមើលឃើញពីសក្តានុពលធនធានធម្មជាតិ ជីវៈចម្រុះដ៏ច្រើនសម្បូរបែប និងមានការណែនាំចង្អុលបង្ហាញពីលោក សាយ សំអាល់ រដ្ឋមន្ត្រីក្រសួងបរិស្ថាន ព្រមទាំងមានការគាំទ្រពីសំណាក់លោក ស្វាយ សំអ៊ាង អភិបាលនៃគណៈអភិបាលខេត្តស្ទឹងត្រែង និងអាជ្ញាធរមូលដ្ឋានផងដែរ។
លោក ផៃ ប៊ុនឈឿន បន្តថា នេះជាការពង្រីកវិសាលភាពនៃការអភិរក្ស និងជាការលើកថែ រក្សាការពារ និងលើកកម្ពស់ប្រព័ន្ធអេកូឡូស៊ី។ ហើយតាមរយៈការសិក្សាតំបន់ភ្នំក្រឡាពស់នេះ គឺជាតំបន់មួយដែលត្រូវការពារជាចាំបាច់ ដោយសារតំបន់នេះ មានប្រភពទឹក មានប្រភេទជីវះចម្រុះជាច្រើន និងមានស្រទាប់ព្រៃឈើក្រាស់ផងដែរ។
លោក ស្វាយ សំអ៊ាង អភិបាលខេត្តស្ទឹងត្រែង ក៏បានបង្ហាញពីការគាំទ្រយ៉ាងពេញទំហឹងចំពោះការត្រៀមបង្កើតតំបន់ការពារធម្មជាតិភ្នំក្រឡាពស់នេះ ដោយបានលើកឡើងថា តំបន់ភ្នំក្រឡាពស់នេះ ជាតំបន់សម្បូរទៅដោយធនធានធម្មជាតិដែលគួតែអភិរក្ស ថែរក្សាការពារធនធានធម្មជាតិនេះ ដើម្បីការពារធម្មជាតិជីវៈចម្រុះ និងដើម្បីជាសក្តានុពលទេសចរណ៍ធម្មជាតិ។ ប្រសិនបើយើងមិនការពារតំបន់នេះទេ យើងនឹងជួបបញ្ហាឈមដោយការកា.ប់ទន្ទ្រានព្រៃឈើ បរបាញ់សត្វ បាត់បង់ធនធានធម្មជាតិ និងបាត់បង់សក្តានុពលទេសចរណ៍ ជាពិសេសតំបន់ក្រឡាពស់ជាប្រភពទឹកដ៏សំខាន់ផងដែរ។
លោកអភិបាលខេត្តរំលឹកថា កន្លងមក អាជ្ញាធរបានបង្កើតក្រុមការងារចុះទៅទប់ស្កាត់ និងបង្ក្រាបបទល្មើសផ្សេងៗក្នុងតំបន់នេះផងដែរ ប៉ុន្តែនៅមិនទាន់បានអនុវត្តច្បាប់ពេញលេញនៅឡើយទេ ប៉ុន្តែក្រោយពេលតំបន់ភ្នំក្រឡាពស់នេះ ដាក់បញ្ជូលជាតំបន់ការពារធម្មជាតិ អាជ្ញាធរខេត្ត និងអនុវត្តទៅតាមច្បាប់ចំពោះអ្នកប្រព្រឹត្តបទល្មើស និងខិតខំផ្សព្វផ្សាយដល់ប្រជាពលរដ្ឋឲ្យបានដឹង និងចូលរួមថែរក្សាការពារទាំងអស់គ្នា។
យោងតាមរការបង្ហាញរបស់ក្រុមការងារនាយកដ្ឋានតំបន់ការពារធម្មជាតិដីគោកខាងកើតទន្លេមេគង្គ នៃអគ្គនាយកដ្ឋានតំបន់ការពារធម្មជាតិ ក្រសួងបងរិស្ថានកន្លងមក ក្រសួងបរិស្ថានធ្លាប់បានចុះមកសិក្សាជាច្រើនលើកមកហើយ ដើម្បីត្រៀមដាក់ជាតំបន់ការពារធម្មជាតិក្រសួងបរិស្ថាន។ តំបន់ភ្នំក្រឡាពស់ ជាប្រភេទព្រៃស្រោង និងមានផ្ទៃក្រឡា១១០៦៥១ហិកតា ស្ថិតនៅក្រុងភូមិសាស្ត្រស្រុកសេសាន និងស្រុកសៀមប៉ាង មានទន្លេសេកុងផងដែរ៕
ចែករំលែកព័តមាននេះ