ភ្នំពេញ៖ សម្តេចតេជោ ហ៊ុន សែន បានលើកឡើងថា ការសម្រេចបិទវិទ្យុ​ VOD គឺជាការបិទវិទ្យុ ដែលមិនគោរព​ក្រមសីលធម៌មួយ ហើយការបិទវិទ្យុនេះ វាមិនធ្វើឱ្យស្លា.ប់​សេរីភាព​សារព័ត៌មាន​នៅកម្ពុជានោះទេ។ ផ្ទុយទៅវិញ វានឹងជួយពង្រឹង​ដល់ការអនុវត្តច្បាប់ និងវិជ្ជាជីវៈសារព័ត៌មាន​នៅកម្ពុជា។

ការលើកឡើងរបស់ប្រមុខរាជរដ្ឋាភិបាលដូច្នេះ តបនឹង​មតិ​យោបល់​របស់​អ្នកស្រី កាន់ វិច្ឆិកា ដែលជាអ្នកសារព័ត៌មាន នៅវិទ្យុសំឡេងសហរដ្ឋអាមេរិក VOA និងជាអតីតអ្នកសារព័ត៌មាន​របស់វិទ្យុសំឡេងប្រជាធិបតេយ្យ VOD។

អ្នកស្រី កាន់ វិច្ឆិកា ដែលជាស្ត្រីអ្នកកាសែតដ៏ក្លាហាន ក្នុងវិស័យ​សារព័ត៌មានកម្ពុជា បានសរសេរបញ្ចេញមតិ Comment នៅលើហ្វេសប៊ុករបស់សម្តេចតេជោ ហ៊ុន សែន ថា «ពាក្យសូមអធ្យាស្រ័យ គឺជាការសុំទោសហើយសម្តេច។ ឬពួកគាត់ គួរតែសរសេរ​លិខិតមួយទៀត ដោយដាក់ថា សុំទោស? ក្នុងនាមក្មួយជាអ្នកសារព័ត៌មានម្នាក់ ក្មួយពិតជារំពឹង​ថា វិទ្យុ VOD នៅអាចបន្តការងារបាន ដើម្បីធ្វើ​ជាកញ្ចក់ឆ្លុះបញ្ចាំង​អំពីបញ្ហាក្នុងសង្គម។ វិជ្ជាជីវៈ​សារព័ត៌មាន គួរត្រូវបានពង្រឹង​ឱ្យ​មានការចូលរួមទាំងអស់គ្នា។ ការបិទ​វិទ្យុ VOD នឹងអាច​ធ្វើ​ឱ្យ​វិស័យ​សារព័ត៌មាននៅកម្ពុជា កាន់តែមានភាពចុះខ្សោយ។ ក្មួយសង្ឃឹមថា សម្តេច នឹងអាច​ពិចារណាសម្រាប់ពួកគាត់​»។​

ឆ្លើយតបនឹងការលើកឡើងរបស់​អ្នកស្រី កាន់ វិច្ឆិកា ដូច្នេះ សម្តេចតេជោ ហ៊ុន សែន បាន​សរសេរថា «អ្នកយល់តាម​របៀបអ្នក។ ពាក្យអធ្យាស្រ័យ និងពាក្យសុំទោស វាខុសគ្នា។ បិទវិទ្យុ​មិនគោរព​ក្រមសីលធម៌មួយ វាមិនធ្វើ​ឱ្យស្លាប់​សេរីភាពសារព័ត៌មាននៅកម្ពុជា​នោះទេ។ ផ្ទុយទៅវិញ វានឹងជួយ​ពង្រឹង​ដល់​ការអនុវត្តច្បាប់ និងវិជ្ជាជីវៈសារព័ត៌មាន នៅកម្ពុជា»។​

សូមរម្លឹកថា នៅយប់ថ្ងៃទី១២ ខែកុម្ភៈនេះ សម្តេចតេជោ ហ៊ុន សែន បានសម្រេច​ឲ្យក្រសួង​ព័ត៌មាន លុបចោលអាជ្ញាប័ណ្ណ​​វិទ្យុវីអូឌី (VOD) ចាប់ពីពេលនេះតទៅ និងត្រូវបញ្ចប់ការផ្សាយ នៅត្រឹមម៉ោង ១០ព្រឹក ថ្ងៃ១៣ ខែកុម្ភៈ ឆ្នាំ២០២៣ ជាកំហិត។

នៅលើហ្វេសប៊ុកផ្លូវការ សម្តេចតេជោ ហ៊ុន សែន បានសរសេរថា «តើការប្រើពាក្យសោកស្តាយ និងសូមអធ្យាស្រ័យ វាជំនួសឲ្យពាក្យសុំទោសបានដែរ ឬទេ? សម្រាប់ខ្ញុំ មិនអាចទទួលយក​បាន​ឡើយ។ តើការបកស្រាយបំភ្លឺនៅទីនេះ មានចេតនាទម្លាក់កំហុសឲ្យមន្ត្រីរាជរដ្ឋាភិបាល​មែនទេ? ទុកជូនឯកឧត្តម ផៃ ស៊ីផាន ពិនិត្យលទ្ធភាព ប្តឹងទៅតុលាការ»។

សម្តេចតេជោ ហ៊ុន សែន បន្ថែមថា «ខ្ញុំកាន់តំណែងក្នុងរដ្ឋរយៈពេលជាង ៤៤ឆ្នាំហើយ ក្នុងនោះ តំណែងនាយករដ្ឋមន្ត្រីរយៈពេលជាង ៣៨ឆ្នាំ ខ្ញុំពិតជាយល់ដឹងល្មមគ្រប់គ្រាន់នូវពាក្យពេចន៍ ដែលត្រូវបានប្រើរាប់ទាំងពាក្យសំដីវាគ្មិនមួយចំនួន ដែលចូលមកសម្ភាស ក្នុងរឿងផ្លូវច្បាប់​ទាក់ទង​ដល់ការផ្តល់ជំនួយដល់ប្រទេសទួកគី ដែលវាគ្មិនខ្លះ ព្យាយាមវាយទាំងឪ វាយទាំងកូន ដែលកូននោះ គឺ ហ៊ុន ម៉ាណែត ដែលគាត់ពុំបានដឹងរឿងអ្វីសោះ។ តើនេះឬ ជាវិជ្ជាជីវៈ ដែលអស់លោក ចង់ផ្សាយដោយអចេតនានោះ?»។

សម្តេចតេជោ ហ៊ុន សែន បន្តថា «ដើម្បីកុំឲ្យវែងឆ្ងាយ ខ្ញុំសម្រេចមិនទទួលយកការសំដែង​ការសោក​ស្តាយ និងសូមការអធ្យាស្រ័យ ជំនួសឲ្យការសុំទោសរបស់អស់លោក ដែលជា​សេចក្តី​ថ្លៃថ្នូរ និងកិត្តិយសរបស់អស់លោកនោះឡើយ។ ក្នុងនាមរាជរដ្ឋាភិបាល ដែលត្រូវការពារ​កិត្តិយស​​របស់ខ្លួន ខ្ញុំសម្រេចបញ្ចប់រឿងនេះ ដោយឲ្យក្រសួងព័ត៌មានលុបចោលអាជ្ញាប័ណ្ណ​​វិទ្យុវីអូឌី (VOD) ចាប់ពីពេលនេះតទៅ និងត្រូវបញ្ចប់ការផ្សាយ នៅត្រឹមម៉ោង 10.00នាទី ថ្ងៃ១៣ កុម្ភះ ២០២៣ ជាកំហិត»។

សម្តេចតេជោ ហ៊ុន សែន បន្ថែមថា «សូមសាលារាជធានីភ្នំពេញ និងស្ថាប័នពាក់ព័ន្ធ ​ជួយ​ការពារ​សណ្តាប់ធ្នាប់ និងទ្រព្យសម្បត្តិនៃវិទ្យុនេះ ឲ្យបានគង់វង្ស។ យើងបិទតែការផ្សាយគ្រប់ប្រភេទ​នៃវិទ្យុនេះ​ប៉ុណ្ណោះ តែយើងមិនប៉ះពាល់ទ្រព្យសម្បត្តិរបស់គេទេ។ សូមមិត្តភក្តិបរទេស ដែលផ្តល់​លុយឲ្យវិទ្យុនេះ បង្វិលលុយទៅប្រទេសវិញ ឬជួយទៅប្រទេសផ្សេង។ សូមបុគ្គលិក ដែលធ្វើការ​នៅវិទ្យុនេះ ស្វែងរកការងារធ្វើនៅកន្លែងផ្សេងទៀត»៕