ខេត្តសៀមរាប ៖ មន្ត្រីជាន់ខ្ពស់ក្រសួងបរិស្ថាន បានបញ្ជាក់ថា មជ្ឈមណ្ឌលស្រាវជ្រាវ និងអភិរក្សកេសរកូល (អ័រគីដេ) សុខ អាន ភ្នំគូលែន កំពុងបានប្រែក្លាយជាការបែងចែក តំបន់អភិវឌ្ឍន៍ ដូចជាការរៀបចំហេដ្ឋរចនាសម្ព័ន ការសិក្សាស្រាវជ្រាវ ការអប់រំផ្សព្វផ្សាយ ការរៀបចំចិញ្ចឹមសត្វ និងកិច្ចសហការជាមួយដៃគូ និងយន្តការអភិវឌ្ឍន៍ ។
ថ្លែងប្រាប់ ក្រុមអ្នកសារព័ត៌មាន ដែលបានធ្វើដំណើរបំពេញទស្សនៈកិច្ចទៅកាន់មជ្ឈមណ្ឌលស្រាវជ្រាវ និងអភិរក្សកេសរកូល សុខ អាន ភ្នំគូលែន នៅរសៀលថ្ងៃទី៧ ខែកុម្ភៈ ឆ្នាំ២០២៣ លោកស្រី ចាន់ សុម៉ាលី អនុលេខាធិការក្រសួងបរិស្ថាន បានឱ្យដឹងថា មជ្ឈមណ្ឌលនេះបានបង្កើតឡើងនៅឆ្នាំ២០១៩ ហើយមានទំហំផ្ទៃដីសរុប ២,០២០ហិកតា ។
លោកស្រី បានថ្លែងបញ្ជាក់ថា សម្រាប់គោលបំណងសំខាន់ នៃការបង្កើតមជ្ឈមណ្ឌលនេះ មានទិសដៅចំនួន៤សំខាន់ៗ គឺ៖
ទី១ ផ្តោតទៅលើការសិក្សាស្រាវជ្រាវ
ទី២ គឺការថែរក្សាអភិរក្ស ប្រភេទកេរសកូលព្រៃ និងរុក្ខជាតិនានារបស់កម្ពុជាឱ្យគង់វង្ស
ទី៣ គឺធ្វើការអប់ រំផ្សព្វផ្សាយដើម្បីឱ្យប្រជាពលរដ្ឋយល់ដឹងសម្បត្តិវប្បធម៌ជាតិ ដ៏សម្បូរបែបនៅកម្ពុជា
និងទី៤ គឺគោលបំណងធ្វើយ៉ាងណា យើងអាចផ្សារភ្ជាប់នូវសេដ្ឋកិច្ច និងការអភិរក្ស ។
ការបង្កើតមជ្ឈមណ្ឌលនេះ ក៏ជាទីកន្លែងមួយសម្រាប់កម្សាន្ត និងក៏ជាទីកន្លែងអាចជួយឱ្យប្រជាពលរដ្ឋគាត់រកការងារចំណូលបន្ថែមទៀតផងដែរ ។ មានន័យថា គោលដៅ នៃការបង្កើតមជ្ឈមណ្ឌលនេះ មិនត្រឹមមតែសម្រាប់កិច្ចការពារទេ ប៉ុន្តែនៅសម្រាប់ការអភិវឌ្ឍន៍សេដ្ឋកិច្ចរបស់ប្រទេសជាតិយើង ។
លោកស្រី ចាន់ សុម៉ាលី ដែលទទួលបន្ទុកមជ្ឈមណ្ឌលស្រាវជ្រាវ និងអភិរក្ស កេសកូល សុខ អាន ភ្នំគូលែន មានប្រសាសន៍ ដោយបញ្ជាក់បន្ថែមទៀតថា ក្រោយទទួលការអនុញ្ញាតរបស់រាជរដ្ឋាភិបាល ឱ្យបង្កើតមជ្ឈមណ្ឌលនេះមក ក្រសួងបរិស្ថាន បានរៀបចំនូវផែនការមេ ចំនួន១៦តំបន់។ ក្នុងចំណោមទាំង១៦តំបន់នេះ ក្រៅពីតំបន់រដ្ឋបាល តំបន់ចំណត និងតំបន់អាងស្តុកទឹក គឺយើងនៅមានតំបន់អភិរក្ស និងតំបន់សម្រាប់អភិវឌ្ឍន៍ ក្នុងនេះមានតំបន់សំខាន់ៗ ដូចជាតំបន់ថែរក្សាពូជរុក្ខជាតិក្នុងស្រុក តំបន់សម្រាប់អភិវឌ្ឍន៍តំបន់ទេសចរណ៍ធម្មជាតិ ដែលក្នុងនេះ យើងអាចបង្កើតជាតំបន់បោះជំរុំ សម្រាប់ចូលដើរកម្សាន្ត ក្នុងព្រៃធម្មជាតិ។ ក្រៅពីនេះ ក៏មានតំបន់សិក្សាស្រាវជ្រាវដំបូងគេនៅកម្ពុជា ហើយក៏ជាតំបន់មួយត្រូវបានចាត់ទុកសំខាន់ជាងគេពីព្រោះថា ជាទីកន្លែង សម្រាប់សិក្សាស្រាវជ្រាវ ក្នុងនេះយើងក៏គ្រោងបង្កើតជាបណ្តាល័យ បង្កើតទីកន្លែងសម្រាប់តាំងពិព័រណ៍ ឱ្យប្រជាពលរដ្ឋចូលមើលកម្សាន្ត ការសិក្សាស្រាវជ្រាវ ហើយពិសេសការបង្កើតជាធនាគារពូជ ដោយក្នុងនោះយើងនឹងប្រមូលជាពូជរុក្ឋជាតិ និងសត្វក្នុងស្រុករបស់ប្រទេសកម្ពុជាយើង មកថែរក្សាការពារនៅទីកន្លែងប្រមូលផ្តុំនេះតែម្តង ។
លោកស្រី ក៏បានលើកឡើង ដោយបញ្ជាក់ប្រាប់ពីមជ្ឈមណ្ឌលស្រាវជ្រាវ និងអភិរក្សកេសកូល សុខ អាន ភ្នំគូលែននេះ ដែរថា នៅថ្ងៃខាងមុខ គេគ្រោងនឹងបង្កើតសម្រាប់ដំណើរកម្សាន្តតាមព្រៃ ដែលជាដំណើរកម្សាន្ត បានបង្កប់នូវអត្ថន័យអប់រំ ដោយក្នុងនេះ យើងនឹងបោះនូវឆ្លាកសញ្ញាផ្សេងៗ នៃរុក្ឋជាតិនីមួយៗ ដើម្បីឱ្យប្រជាពលរដ្ឋបានចូលកម្សាន្តសប្បាយ ហើយបានយល់ពីផលប្រយោជន័ធម្មជាតិនីមួយៗទាំងនេះផងដែរ ។
ជាមួយគ្នានោះដែរ លោកស្រីថា ទាក់ទិនក្នុងលគោលំបណងសំខាន់មួយទៀត ដែលក្រសួងបរិស្ថានគ្រោងនឹងបង្កើតឡើងដែរ គឺតំបន់សម្រាប់ចិញ្ចឹមសត្វ និងការធ្វើកសិកម្មអភិរក្ស ដែលរក្សាបាននូវគុណភាពដី និងមិនប្រើជីគីមីប៉ះពាល់ដល់ដី និងសុខភាពមនុស្សយើង។
គួរបញ្ជាក់ថាមជ្ឈមណ្ឌលស្រាវជ្រាវ និងអភិរក្សកេសកូល សុខ អាន ភ្នំគូលែន ស្ថិតនៅក្នុងស្រុកបន្ទាយស្រី ខេត្តសៀមរាប ពោលគឺស្ថិតនៅជើងភ្នំគូលែន ក្បែរច្រកចូលឡើងទៅលើរមណីយដ្ឋានខ្នងភ្នំគូលែន៕
ចែករំលែកព័តមាននេះ