រាជធានីភ្នំពេញ ៖ រដ្ឋមន្ត្រីក្រសួងអប់រំ យុវជន និងកីឡា ឯកឧត្តម ហង់ ជួនណារ៉ុន បានសម្រេចឲ្យផ្លាស់ប្តូរទីកន្លែងបម្រើការងាររបស់បុគ្គលិកអប់រំ ឆ្លងរាជធានី-ខេត្ត…
រាជធានីភ្នំពេញ ៖ រដ្ឋមន្ត្រីក្រសួងអប់រំ យុវជន និងកីឡា ឯកឧត្តម ហង់ ជួនណារ៉ុន បានសម្រេចឲ្យផ្លាស់ប្តូរទីកន្លែងបម្រើការងាររបស់បុគ្គលិកអប់រំ ឆ្លងរាជធានី-ខេត្ត តាមសហព័ទ្ធជាមន្ត្រីរាជការ ។
យោងតាមសេចក្តីជូនដំណឹង ស្តីពីការផ្លាស់ប្ដូរទីកន្លែង បម្រើការងាររបស់បុគ្គលិកអប់រំ ឆ្លងរាជធានី-ខេត្ត តាមសហព័ទ្ធជាមន្ត្រីរាជការរបស់ក្រសួងអប់រំ យុវជន និងកីឡា នៅថ្ងៃទី៨ ខែកុម្ភៈ ឆ្នាំ២០២៣ លើកឡើងថា សូមបុគ្គលិកអប់រំ ដែលបានដាក់ពាក្យស្នើសុំផ្លាស់ប្ដូរទីកន្លែង បម្រើការងារឆ្លងរាជធានី ខេត្ត ថា ក្រសួងបានប្រជុំផ្ទៃក្នុង កាលពីថ្ងៃទី០៣ ខែកុម្ភៈ ឆ្នាំ២០២៣ និងបានសម្រេចជាគោលការណ៍ពាក់ព័ន្ធសំណើផ្លាស់ប្តូរទីកន្លែង បម្រើការងាររបស់បុគ្គលិកអប់រំឆ្លងរាជធានី ខេត្ត តាមសហព័ទ្ធជាមន្ត្រីរាជការបាន ឯកភាពជាគោលការណ៍ ឲ្យមានការផ្លាស់ប្ដូរទីកន្លែងបម្រើការងាររបស់បុគ្គលិកអប់រំ ឆ្លងរាជធានី ខេត្ត តាមសហព័ទ្ធ (ប្តីឬប្រពន្ធ) ជាមន្ត្រីរាជការ ក្នុងឆ្នាំ២០២២ ស្របតាមគោលការណ៍ច្បាប់។
ចំពោះការផ្លាស់ចូលអង្គភាពថ្នាក់កណ្តាល ស្នើសុំប្រធានអង្គភាពបញ្ជាក់អំពីភារកិច្ច ដែលត្រូវប្រគល់ជូន និងស្របតាមបេសកកម្មរបស់អង្គភាព ដោយពិនិត្យលើគុណវុឌ្ឍីរបស់សាមីជន និងបំណែងចែកភារកិច្ច ក្នុងអង្គភាព ។
ក្រសួងថា ចំពោះការផ្លាស់ចូលរាជធានីភ្នំពេញ ត្រូវអនុញ្ញាតឲ្យទៅកន្លែង ដែលខ្វះគ្រូ ប្រធានមន្ទីរអប់រំ យុវជន និងកីឡា រាជធានីភ្នំពេញ ត្រូវបញ្ជាក់ថា បុគ្គលិកអប់រំ ត្រូវបានពង្រាយទៅកន្លែងដែលខ្វះ និងមានការយល់ព្រមទទួលពីនាយកសាលាសាមី ។ ចំពោះការផ្លាស់ចូលខេត្តនានា ត្រូវមានរបាយការណ៍បញ្ជាក់ពីប្រធានមន្ទីរអប់រំ យុវជន និងកីឡា ខេត្តថា ត្រូវបានពង្រាយទៅកន្លែងខ្វះគ្រូ។
ជាមួយគ្នានោះដែរ ក្រសួងនឹងបន្តកែលម្អលក្ខខណ្ឌ នៃការផ្ទេរបុគ្គលិកអប់រំ ដើម្បីដោះស្រាយបញ្ហាខ្វះគ្រូនៅតាមគ្រឹះស្ថានសិក្សាមួយចំនួន ។
ក្រសួងថា សេចក្តីដូចបានជម្រាបជូនខាងលើ សូមបុគ្គលិកអប់រំដែលបានដាក់ពាក្យស្នើសុំ និងអង្គភាពពាក់ព័ន្ធ ជ្រាបជាព័ត៌មាន និងមានចំណាត់ការបន្ត តាមការគួរ៕
ចែករំលែកព័តមាននេះ