រាជធានីភ្នំពេញ ៖ បុរសជាជាងសំណង់ម្នាក់បានស្លាប់ ក្រោយពេលប្អូនថ្លៃប្រុសបញ្ជូនទៅសង្គ្រោះបន្ទាន់ដល់មន្ទីរពេទ្យមិត្តភាពខ្មែរសូវៀត ដោយសារតែចរន្តអគ្គិសនីឆក់ ខណៈពេលដែលគាត់ដោះដូរព្រីភ្លើងដែលបែកចេញដាក់ព្រីថ្មី ហើយគាត់មានការធ្វេសប្រហែសភ្លេចដកឌូយផ្ដាច់ចរន្តភ្លើងចេញសិន ។
ដែលហេតុការណ៏នោះបានកើតឡើងកាលពីវេលាម៉ោង០៨ព្រឹក ថ្ងៃទី៣ ខែសីហា ឆ្នាំ២០១៧ នៅក្នុងឃ្លាំងកំពុងសាងសង់មួយដែលមានទីតាំងស្ថិតនៅក្នុងខណ្ឌពោធិ៍សែនជ័យ រាជធានីភ្នំពេញ ។
បុរសម្នាក់ឈ្មោះ ស្រុន វ៉ា ដែលត្រូវជាប្អូនថ្លៃរបស់បុរសរងគ្រោះបានឲ្យដឹងថា ៖ បងថ្លៃរបស់ខ្លួនដែលរងគ្រោះដោយចរន្តអគ្គិសនីឆក់ស្លាប់នេះឈ្មោះ ថន សៀងហៃ អាយុ៤៣ឆ្នាំ មុខរបរជាងសំណង់ ស្នាក់នៅផ្ទះជួល ស្ថិតនៅក្នុងភូមិត្រពាំងថ្លឹង សង្កាត់ចោមចៅ ។
នៅមុនពេលកើតហេតុខាងលើ ខ្លួន និងបងថ្លៃបានធ្វើការនៅចម្ងាយប្រហែល៥ម៉ែត្រពីគ្នា ប៉ុន្តែខណៈនោះ បងថ្លៃបានដោះព្រីភ្លើង ដែលបែកចោល និងបានតព្រីថ្មី ដោយគាត់ភ្លេចដកឌូយផ្ដាច់ភ្លើងចេញជាមុនសិនទេ ទើបត្រូវចរន្តអគ្គិសនីឆក់ បណ្ដាលឲ្យរងរបួសធ្ងន់ធ្ងរ ។
ចំណែកខ្លួនក៏មិនបានឃើញផ្ទាល់ភ្នែកដែរ ព្រោះរវល់ធ្វើការ រហូតដល់ឮបងថ្លៃស្រែកឲ្យជួយ ទើបរត់ទៅមើល ឃើញគាត់ដួលដេកទៅលើដីរបួសធ្ងន់ធ្ងរបាត់ទៅហើយ ។
ប្រភពដដែលបានបន្តថា ខណៈនោះ ខ្លួនបានរត់ទៅដកឌូយភ្លើងចេញ និងបាននាំយកបងថ្លៃទៅកាន់មន្ទីរពេទ្យមិត្តភាពខ្មែរសូវៀត ដើម្បីសង្គ្រោះបន្ទាន់ភ្លាមៗដែរ ប៉ុន្តែពេលទៅដល់ ត្រូវក្រុមគ្រូពេទ្យប្រាប់ថា បងគាត់ស្លាប់បាត់ទៅហើយ ។
បន្ទាប់មក បានរាយការណ៏ជូននគរបាលឲ្យចុះទៅពិនិត្យមើល និងធ្វើកោសល្យវិច្ឆ័យនៅក្នុងមន្ទីរពេទ្យនោះតែម្ដង ហើយនគរបាលបានប្រាប់ថា បងគាត់ពិតជាស្លាប់ដោយសារចរន្តអគ្គិសនីឆក់មែន ក្រោយមកសាកសពត្រូវបានដឹកទៅកាន់ស្រុកកំណើត នៅក្នុងភូមិព្រែកក្របៅ ឃុំពាមរក៏ ស្រុកពាមរក៏ ខេត្តព្រៃវែង ដើម្បីធ្វើបុណ្យតាមប្រពៃណី ៕
ចែករំលែកព័តមាននេះ