ចិនបង្កើនការនាំចូលប្រេងបញ្ចុះតម្លៃ ដែលលាយបញ្ចូលគ្នាជាមួយប្រេងរុស្ស៊ី
ចិន-រុស្ស៊ី ៖ យោងតាមប្រភពពីទីភ្នាក់ងារសារព័ត៌មាន Reuters ដែលចេញផ្សាយកាលពីថ្ងៃទី០៣ ខែ
ចិន-រុស្ស៊ី ៖ យោងតាមប្រភពពីទីភ្នាក់ងារសារព័ត៌មាន Reuters ដែលចេញផ្សាយកាលពីថ្ងៃទី០៣ ខែកុម្ភៈ បានឱ្យដឹងថា រោងចក្រចម្រាញ់ប្រេងឯករាជ្យរបស់ប្រទេសចិន កំពុងបង្កើនការនាំចូលប្រេងបញ្ចុះតម្លៃ ដែលលាយបញ្ចូលគ្នាជាមួយប្រេងរុស្ស៊ី ដែលមានតម្លៃទាប ចំពេលមានការខ្វះខាតកូតានាំចូលប្រេងឆៅរបស់រដ្ឋាភិបាល សម្រាប់ក្រុមហ៊ុនមួយចំនួន។
ការដាក់ទណ្ឌកម្មរបស់លោកខាងលិច ជុំវិញការលុកលុយរបស់រុស្ស៊ីលើអ៊ុយក្រែន រួមទាំងការហាមឃាត់ ដែលចាប់ផ្តើមពីថ្ងៃទី០៥ ខែកុម្ភៈតទៅ ហើយនិងការកំណត់តម្លៃផលិតផលចម្រាញ់ បានកំពុងជំរុញឱ្យការនាំចេញប្រេងរបស់រុស្ស៊ី បង្វែរគោលដៅឆ្ពោះទៅភាគខាងកើត ពោលទៅតំបន់អាស៊ី តាមរយៈការបញ្ចុះតម្លៃដ៏គួរឱ្យទាក់ទាញ ចាប់តាំងពីឆ្នាំមុនមកម្ល៉េះ ដែលមមាញឹកខ្លាំង នៅមជ្ឈមណ្ឌលផ្ទេរពីកប៉ាល់ទៅកប៉ាល់នៃប្រទេសម៉ាឡេស៊ី និងក្រុមហ៊ុន Fujairah របស់អារ៉ាប់រួម ចាប់តាំងពីត្រីមាសទី២ នៃឆ្នាំ ២០២២។ ដោយពាណិជ្ជករបានលាយប្រេងរុស្ស៊ី ជាមួយនឹងប្រេងផ្សេងទៀត ហើយធ្វើម៉ាកយីហោប្រទេសដើមរបស់ប្រេងឡើងវិញ ដើម្បីគេចពីការហាមប្រាម នៅក្រោមទណ្ឌកម្ម។
ជាក់ស្តែង តាមរយៈការបញ្ចុះតម្លៃដ៏ពិសេសរបស់រុស្ស៊ី គឺជាឱកាសមាស និងជួយកែលម្អ សម្រាប់ក្រុមហ៊ុនចម្រាញ់ប្រេងឯករាជ្យចិន ដើម្បីជំនួសប្រេងឆៅ ដែលក្រុមហ៊ុនមួយចំនួន មិនអាចនាំចូលដោយគ្មានកូតា។ ពាណិជ្ជកម្មនេះ ក៏ផ្តល់មធ្យោបាយដ៏សំខាន់ ដើម្បីទទួលបានប្រេងរុស្ស៊ីទៅកាន់ទីផ្សារ និងនាំមកនូវចំណូលនាំចេញ ដែលទីក្រុងម៉ូស្គូ ត្រូវការជាចាំបាច់។
នាយកប្រតិបត្តិ ដែលមានក្រុមហ៊ុនចម្រាញ់ប្រេងឯករាជ្យក្នុងខេត្ត Shandong ភាគខាងកើតប្រទេសចិន បាននិយាយថា ក្រុមហ៊ុនបានធ្វើពាណិជ្ជកម្មប្រេងជាមួយរុស្ស៊ី ចាប់តាំងពីខែធ្នូ មកម្ល៉េះ។ នាយកប្រតិបត្តិ ដែលសុំមិនបញ្ចេញឈ្មោះរូបនោះ បានបន្ថែមថា ក្រុមហ៊ុនចម្រាញ់ប្រេង មិនបានទទួលកូតាប្រេងឆៅរបស់រដ្ឋាភិបាលសម្រាប់ឆ្នាំមុន ហើយការទិញប្រេង ដែលដំណើរការភាគច្រើន ដើម្បីផលិតប្រេងម៉ាស៊ូត និងប្រេងសាំង។
ប្រភពមួយបានលើកឡើងថា ធុងប្រេងដែលលាយបញ្ចូលគ្នាទាំងនោះ ត្រូវបានគេជួញដូរលើកចុងក្រោយ នៅក្នុងតម្លៃប្រហែល៥ដុល្លារ ដល់តម្លៃប្រេងឆៅនៃសន្ទស្សន៍ ICE Brent តាមមូលដ្ឋានដែលខេត្ត Shandong បានចែកចាយ។
ទិន្នន័យគយផ្លូវការ បានបង្ហាញថា ការនាំចូលប្រេងសរុបរបស់ចិន បានកើនឡើងដល់ប្រហែល ១.៧៦លានតោន នៅក្នុងខែធ្នូ ឆ្នាំ២០២២ ដែលជាចំនួនខ្ពស់បំផុត ចាប់តាំងពីខែកញ្ញា ឆ្នាំ២០២១ ។
តួលេខនេះ ត្រូវបានជំរុញដោយការកើនឡើងនៃការដឹកជញ្ជូនពីម៉ាឡេស៊ី ដល់កម្រិតខ្ពស់ជាងមួយឆ្នាំ ចំនួន ៦២០,០០០តោន ខណៈដែលការនាំចូលប្រចាំខែពីអារ៉ាប់រួម (UAE) បានកើនឡើងដល់ ៤៧១,០០០តោន ដែលជាចំនួនខ្ពស់បំផុតក្នុងរយៈពេល២ឆ្នាំចុងក្រោយ។
ទន្ទឹមនឹងនេះ ការនាំចូលប្រេងដោយផ្ទាល់ពីរុស្ស៊ី បានធ្លាក់ចុះមកត្រឹម ១៨៧,០០០តោន ក្នុងខែធ្នូ ឆ្នាំ២០២២ បន្ទាប់ពីបានឡើងដល់កំពូល ៥៥៤,០០០តោន ក្នុងខែតុលា បើទោះបីការនាំចូលសរុបពីរុស្ស៊ី បានកើនឡើងទ្វេដងពីមួយឆ្នាំទៅមួយឆ្នាំ ដល់ចំនួន ៣,១លានតោន ក្នុងឆ្នាំ ២០២២ យ៉ាងណាក៏ដោយ៕ (ដកស្រង់ចេញពី Reuters)
ចែករំលែកព័តមាននេះ