CAMSOC ប្រកាសទទួលយកអ្នកស្ម័គ្រចិត្តជាផ្លូវការ សម្រាប់ត្រៀមព្រឹត្តិការណ៍ស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣
- ភ្នំពេញ
រាជធានីភ្នំពេញ ៖ ឯកឧត្តមបណ្ឌិត ថោង ខុន រដ្ឋមន្ដ្រីក្រសួងទេសចរណ៍ និងជាអនុប្រធាន
រាជធានីភ្នំពេញ ៖ ឯកឧត្តមបណ្ឌិត ថោង ខុន រដ្ឋមន្ដ្រីក្រសួងទេសចរណ៍ និងជាអនុប្រធានអចិន្ដ្រៃយ៍នៃគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ និងអាស៊ានប៉ារ៉ាហ្គេម លើកទី១២ ឆ្នាំ២០២៣ បានដាក់ក្ដីសង្ឃឹមថា កម្ពុជា នឹងបានទទួលនូវការចុះឈ្មោះរបស់អ្នកស្ម័គ្រចិត្តជាច្រើន ដើម្បីចូលរួមបំពេញការងារក្នុងកិច្ចការស៊ីហ្គេមរបស់ជាតិ ឱ្យទទួលបានជោគជ័យ។
ការបង្ហើបពីក្តីសង្ឃឹមបែបនេះរបស់ឯកឧត្តមបណ្ឌិត ថោង ខុន ត្រូវបានធ្វើឡើងនៅក្នុងសន្និសីទសារព័ត៌មាន ប្រកាសទទួលយកអ្នកស្ម័គ្រចិត្តជាផ្លូវការ សម្រាប់ត្រៀមព្រឹត្តិការណ៍ស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣ ក្រោមអធិបតីភាពផ្ទាល់របស់ឯកឧត្តម និងឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា(ស.ស.យ.ក)កាលពីរសៀលថ្ងៃទី០១ ខែកុម្ភៈ ឆ្នាំ២០២៣។
តាមខ្លឹមសារ ដែលត្រូវបានលើកឡើងក្នុងសន្និសារព័ត៌មាន កាលពីរសៀលថ្ងៃទី០១ កុម្ភៈ គឺគណៈកម្មាធិការជាតិ CAMSOC ត្រូវការអ្នកស្ម័គ្រចិត្តប្រមាណ ៧០០០នាក់ ដើម្បីបម្រើដល់ព្រឹត្តិការណ៍ស៊ីហ្គេម-អាស៊ានប៉ារ៉ាហ្គេម ដែលមានប្រតិភូប្រមាណពី៧ ទៅ៨ពាន់នាក់ចូលរួម ហើយឯកឧត្តមបណ្ឌិត ថោង ខុន បានដាក់ក្ដីសង្ឃឹមថា នឹងបានទទួលនូវការចុះឈ្មោះរបស់អ្នកស្ម័គ្រចិត្ត ទៅតាមតម្រូវការនេះ។
តើធ្វើដូចម្តេចដើម្បីក្លាយជាអ្នកស្ម័គ្រចិត្តសម្រាប់ព្រឹត្តិការណ៍កីឡាស៊ីហ្គេម-អាស៊ានប៉ារ៉ាហ្គេម ២០២៣?
គណៈកម្មការស្ម័គ្រចិត្ត នៃគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ និងអាស៊ានប៉ារ៉ាហ្គេម លើកទី១២ ឆ្នាំ២០២៣ នៅថ្ងៃទី០១ ខែកុម្ភៈ ឆ្នាំ២០២៣ បានប្រកាសទទួលអ្នកស្ម័គ្រចិត្តជាផ្លូវការ ដើម្បីជាផ្នែកមួយនៃដំណើរឆ្ពោះទៅព្រឹត្តិការណ៍ជាប្រវត្តិសាស្ត្រនេះ ។ ក្នុងឱកាសដែលកម្ពុជាត្រូវចាប់ផ្ដើមមុនសម្រាប់ការទទួលធ្វើជាម្ចាស់ផ្ទះ កីឡាអាស៊ីអាគ្នេយ៍ លើកទី៣២ លើ៣៦ប្រភេទកីឡា បូកកីឡាសម្ដែង ១ប្រភេទ តម្រូវការអ្នកស្ម័គ្រចិត្ត ត្រូវបានរំពឹងថា នឹងជ្រើសរើសចំនួន ៦.៩៦៣នាក់ ដូច្នេះការចូលរួមគឺជាចំណែកដ៏សំខាន់ក្នុងការធ្វើឱ្យព្រឹត្តិការណ៍ដំណើរការទៅយ៉ាងរលូន។
អំពីអ្នកស្ម័គ្រចិត្ត ៖ អ្នកស្ម័គ្រចិត្តត្រូវបានបែងចែកជា ៣កម្រិត រួមមាន៖ ថ្នាក់ដឹកនាំ ជនបង្គោល និងអ្នកស្ម័គ្រចិត្តទូទៅ ។ ក្នុងតម្រូវការអ្នកស្ម័គ្រចិត្តប្រមាណ ៧.០០០នាក់ គណៈកម្មការបានបើកទូលាយជូនដល់សាធារណជនចូលរួមព្រមទាំងផ្ដល់នូវ៥០កន្លែងដល់អ្នកស្ម័គ្រចិត្តជាជនជាតិបរទេស ។ លើសពីនេះក៏ត្រូវការអ្នកស្ម័គ្រចិត្ត នៅខេត្តសៀមរាប ចំនួន ១០០នាក់ ខេត្តព្រះសីហនុ ចំនួន ១០០នាក់ ខេត្តកែប ៥០នាក់ និងខេត្តកំពត ៥០នាក់។
ការចូលរួមស្ម័គ្រចិត្ត ៖ អ្នកស្ម័គ្រចិត្តត្រូវមានលក្ខណៈសម្បត្តិដូចខាងក្រោម:
អាយុចាប់ពី ១៨ឆ្នាំឡើងទៅ (គិតត្រឹមថ្ងៃទី០១ ខែមករា ឆ្នាំ២០២៣)
មានពេលវេលាគ្រប់គ្រាន់
មានសុខភាពល្អ ដើម្បីបំពេញការងារ
មានឆន្ទៈ និងទំនួលខុសត្រូវខ្ពស់ក្នុងការងារ
មានអាកប្បកិរិយាស្លូតបូត និងសុភាពរាបសា
លើកទឹកចិត្តចំពោះជនមានពិការភាព គ្រូបង្វឹកកីឡា អតីតកីឡាករ កីឡាការិនី
ចេះភាសាអង់គ្លេស (សម្រាប់អ្នកស្ម័គ្រជាអ្នកសម្របសម្រួល LO)
អ្នកស្ម័គ្រចិត្តត្រូវមានឯកសារតម្រូវ ៖
រូបថត (ទំហំ ៤គុណ៦) អត្តសញ្ញាណប័ណ្ណ ឬលិខិតឆ្លងដែន និងជីវប្រវត្តិសង្ខេប
ឆ្លងកាត់ការចុះឈ្មោះតាមអនឡាញ (Online Registration) និងត្រូវឆ្លងកាត់កិច្ចសម្ភាសន៍ ព្រមទាំងចូលរួមវគ្គបណ្ដុះបណ្ដាលភារកិច្ចដែលអ្នកស្ម័គ្រចិត្តនឹងធ្វើពេលព្រឹត្តិការណ៍។
វិធី និងដំណាក់កាលនៃការបំពេញពាក្យជាអ្នកស្ម័គ្រចិត្ត ៖ បើកទទួលចុះឈ្មោះពីថ្ងៃទី០១ ខែកុម្ភៈ ដល់ថ្ងៃទី០១ ខែមីនា ឆ្នាំ២០២៣ ដោយចូលទៅកាន់ https://cambodia2023.com/km/volunteer-register
ការបំពេញពាក្យស្នើសុំត្រូវបានកំណត់ជា ៣ដំណាក់កាល ហើយបេក្ខភាពដែលបំពេញពាក្យស្នើសុំបានជោគជ័យ នឹងទទួលបានសារបញ្ជាក់នៅលើ Telegram ឬនៅលើ E-mail។
បន្ទាប់ពីត្រូវបានជ្រើសរើស បេក្ខជននឹងត្រូវឆ្លងកាត់សម្ភាសន៍ ស្របតាមស្ដង់ដាដាក់ពិន្ទុដែលកំណត់ (ចំនួន៦ផ្នែក) ដើម្បីធានានូវតម្លាភាព ។ ចំពោះការងារដែលមានតម្រូវការជំនាញកម្រិតខ្ពស់ នឹងមានការចូលរួមសម្ភាសន៍ពីគណៈកម្មការជំនាញ។
ការប្រកាសលទ្ធផល ៖ បេក្ខជនដែលបានជាប់នឹងទទួលបានសារបញ្ជាក់ពីជោគជ័យក្នុងការក្លាយខ្លួនទៅជាអ្នកស្ម័គ្រចិត្ត សម្រាប់ព្រឹត្តិការណ៍កីឡា និងបន្តចូលរួមវគ្គបណ្ដុះបណ្ដាលដែលបានរៀបចំដោយគណៈកម្មការ តាមរយៈ Telegram និង E-mail។
ការបណ្ដុះបណ្ដាលអ្នកស្ម័គ្រចិត្ត ៖ ការបណ្ដុះបណ្ដាលអ្នកស្ម័គ្រចិត្ត ត្រូវបានបែងចែកជា ២កម្រិតរួមមាន៖ ១-កម្រិតថ្នាក់ដឹកនាំនិងជនបង្គោល និង២-កម្រិតអ្នកស្ម័គ្រចិត្តទូទៅ។
កម្រិតថ្នាក់ដឹកនាំ និងជនបង្គោល មានរយៈពេល ៣ថ្ងៃ ស្មើនឹង ១៨ម៉ោង ខណៈកម្រិតអ្នកស្ម័គ្រចិត្តទូទៅ មានរយៈពេល ២ថ្ងៃ ស្មើនឹង ១៣ម៉ោងកន្លះ។
អត្ថប្រយោជន៍អ្នកស្ម័គ្រចិត្តទទួលបាន៖
អាវយឺត ចំនួន ២, ខោ ចំនួន ២, មួក ចំនួន ១, កាតាប ចំនួន ១, លិខិតថ្លែងអំណរគុណ និងការផ្គត់ផ្គង់អាហារ ដោយបានគិតគូរដល់បងប្អូនខ្មែរអ៊ិស្លាម និងអ្នកមានប្រតិកម្មអាហារផ្សេងៗ ៕
ចែករំលែកព័តមាននេះ