អុញ! លោក បាត់ សាក់ ទទួលរងការចោទប្រកាន់ថា រុញរបាស្ពានបើកផ្លូវចូលផ្ទះនៅក្រុងស្វាយរៀង(វីដេអូ)
- សៀមរាប
មហាជនបានរិះគន់ម្ចាស់ដីម្នាក់ ដែលគេស្គាល់ថា ជាមន្ត្រីមន្ទីររ៉ែ និងថាមពល នៃរដ្ឋបាលខេត្តស្វាយរៀង លោក បាត់ សាក់ ថា
មហាជនបានរិះគន់ម្ចាស់ដីម្នាក់ ដែលគេស្គាល់ថា ជាមន្ត្រីមន្ទីររ៉ែ និងថាមពល នៃរដ្ឋបាលខេត្តស្វាយរៀង លោក បាត់ សាក់ ថា
ខេត្តស្វាយរៀង ៖ មហាជនបានរិះគន់ម្ចាស់ដីម្នាក់ ដែលគេស្គាល់ថា ជាមន្ត្រីមន្ទីររ៉ែ និងថាមពល នៃរដ្ឋបាលខេត្តស្វាយរៀង លោក បាត់ សាក់ ថា បានយកគ្រឿងចក្ររុញរបាស្ពាន បាក់ខូចប្រមាណជា៥ម៉ែត្រ ដើម្បីចាក់ដីលុបចំណីផ្លូវ ធ្វើផ្លូវចូលឃ្លាំងរបស់ខ្លួន បង្កឲ្យមហាជនរិះគន់យ៉ាងខ្លាំង។ ករណីនេះ បានកើតឡើងនៅព្រឹកថ្ងៃទី០១ ខែកុម្ភៈ ឆ្នាំ២០២៣ នៅចំណុចគល់ស្ពានទន្លៀងទី២ ផ្នែងខាងកើតតាមបណ្តោយផ្លូវជាតិលេខ១ ស្ថិតនៅក្នុងភូមិស្វាយតឿសង្កាត់ស្វាយតឿ ក្រុងស្វាយរៀង។
ទាក់ទិននឹងករណីខាងលើនេះដែរ លោក ឌី យ៉ាម៉ង់ ប្រធានការិយាល័យភូមិបាលក្រុងស្វាយរៀង បានឲ្យដឹងថា ករណីលោក បាត់ សាក់ ចាក់ដីលើចំណីផ្លូវជាតិលេខ១ ត្រង់ចំណុចគល់ស្ពានទន្លៀងនោះ មន្ត្រីភូមិបាលធ្លាប់បានចុះទៅពិនិត្យរួចហើយ និងបានបាញ់ថ្នាំក្រហមឲ្យចាក់ដីលើចំណីផ្លូវ ដោយចំណីផ្លូវនោះនៅពីមុខដីកម្មសិទ្ធិរបស់គាត់ និងបានធ្វើកិច្ចសន្យាមិនឲ្យចាក់ចូលអូរនោះទេ ត្រូវទុកផ្លូវទឹកឲ្យធំ ចៀសវាងស្ទះផ្លូវទឹក។ ហើយចំពោះករណីយកគ្រឿងចក្ររុញរបាស្ពានបើកផ្លូវចូលឃ្លាំង លោកមិនបានដឹងទេ ចាំលោកចាត់មន្ត្រីឲ្យចុះទៅពិនិត្យ ហើយករណីនេះ សូមឲ្យទាក់ទងទៅខាងអាជ្ញាធរក្រុងស្វាយរៀង ដើម្បីពិនិត្យដោះស្រាយ។
ចំណែកលោក បាត់ សាក់ ប្រធានការិយាល័យធនធានរ៉ែ និងថាមពល នៃមន្ទីររ៉ែ និងថាមពលខេត្ត ដែលចាក់ដី និងជាម្ចាស់ឃ្លាំង បានប្រាប់កោះសន្តិភាពថា លោកសូមបដិសេធការចោទប្រកាន់របស់មហាជន និងអ្នកសារព័ត៌មានមួយចំនួន ដោយចោទប្រកាន់ថា លោក (បាត់សាក់) យកគ្រឿងចក្ររុញរបាស្ពានបើកផ្លូវចូលឃ្លាំង និងចាក់ដីលុបអូរសាធារណៈនោះ មិនពិតទេ។ ការពិត គឺខ្លួនបានចាក់ដីលើចំណីផ្លូវនៅមុខដីជាកម្មសិទ្ធិរបស់ខ្លួន ដោយអាជ្ញាធរ និងមន្ត្រីសុរិយោដីបានបាញ់ថ្នាំក្រហម និងបោះបង្គោលកំណត់ឲ្យចាក់ដី ដូច្នេះមិនបានចាក់ដីលប់អូរសាធារណៈ រំលោ.ភយកធ្វើជាកម្មសិទ្ធិដូចការចោទប្រកាន់នោះទេ។ ហើយចំណែករបាស្ពាន ទន្លៀង គឺរថយន្តសណ្តោង (ត្រៃលឺរ័) ដឹកគ្រឿងចក្រ ជាអ្នកបើកបុកឲ្យបាក់ទេ។
លោក បាត់ សាក់ បានបញ្ជាក់ទៀតថា កាលពីជាង១ខែកន្លងទៅ ខ្លួនបានហៅរថយន្តសណ្តោង (ត្រៃលឺ័រ) ជួលឲ្យមកចូលដឹកទំនិញរោងចក្រនៅក្នុងឃ្លាំងនៅចំណុចកើតហេតុ ស្រាប់តែអ្នកបើកបររថយន្តសណ្ដោង (ត្រៃលឺ័រ) បើកពីភ្នំពេញ លុះមកដល់គល់ស្ពានទន្លៀង ក៏បានបត់ស្តាំចូលឃ្លាំង ប៉ុន្តែបត់មិនផុត ក៏បុកចំរបាស្ពាន បណ្តាលឱ្យបាក់ខូចអស់ប្រមាណ០៥ម៉ែត្រតែម្តង។ បន្ទាប់មក ខ្លួនបានឃាត់អ្នកបើកបរ (ត្រៃលឺរ័) ឲ្យដោះស្រាយជាមួយក្រុមហ៊ុនចិន ដែលជាម្ចាស់គម្រោងជួសជុលថែទាំផ្លូវជាតិលេខ១ មកដោះស្រាយ ហើយបានទារសំណងសម្រាប់ជួសជុលរបាស្ពាន ជាទឹកប្រាក់ចំនួន៥៥០ដុល្លារ តែម្ចាស់ (ត្រៃលឺ័រ) ក៏បានបង់ប្រាក់សងសំណងឲ្យក្រុមហ៊ុនចិនរួចហើយដែរ ក៏ប៉ុន្តែក្រុមហ៊ុនចិន មិនឃើញមកជួសជុល ទើបបង្កឲ្យមហាជន និងអ្នកសារព័ត៌មានមានការយល់ច្រឡំ ដោយគេឃើញរថយន្តបង្កចូលដាក់ទំនិញនៅក្នុងឃ្លាំងរបស់ខ្លួន។
ទោះបីជាយ៉ាងណា មហាជនបានប្រតិកម្មថា នេះគ្រាន់ជាការឆ្លើយដោះសារតែប៉ុណ្ណោះ ហើយមហាជននៅតែទទូច សូមឲ្យអាជ្ញាធរខេត្តចុះពិនិត្យការចាក់ដីលើចំណីផ្លូវជាតិ និងលុបអូរសាធារណៈរបស់រដ្ឋ ដែលបង្កឲ្យស្ទះផ្លូវទឹកពេលរដូវវស្សា និងលិចភូមិអ្នកស្រុក។
ព័ត៌មានបន្ថែមនឹងមានផ្សាយជូននៅលើកាសែតកោះសន្តិភាព៕
ចែករំលែកព័តមាននេះ