មានរថយន្តយីឌុបធុនយក្សប្រភេទវ៉េអង ដឹកទំនិញគេចពន្ធឆ្លងដែនទៅប្រទេសវៀតណាម តាមច្រករបៀង នៃប៉ុស្តិ៍វរៈការពារព្រំដែនគោកតែក ដោយពុំមានឃើញសមត្ថកិច្ចណាមករំខានឡើយ។ ករណីនេះ
ខេត្តស្វាយរៀង ៖ មានរថយន្តយីឌុបធុនយក្សប្រភេទវ៉េអង ដឹកទំនិញគេចពន្ធឆ្លងដែនទៅប្រទេសវៀតណាម តាមច្រករបៀង នៃប៉ុស្តិ៍វរៈការពារព្រំដែនគោកតែក ដោយពុំមានឃើញសមត្ថកិច្ចណាមករំខានឡើយ។ ករណីនេះ បានកើតឡើងវេលាម៉ោង៦និង៣០នាទីយប់ ថ្ងៃទី១ ខែកុម្ភៈ ឆ្នាំ២០២៣ ស្ថិតនៅភូមិគោកតែក ឃុំចន្ទ្រា ស្រុកចន្ទ្រា។
បើតាមប្រជាពលរដ្ឋដែលរស់នៅក្នុងឃុំចន្ទ្រា បានឲ្យដឹងថា មានរថយន្តយីឌុបធុនយក្សប្រភេទវ៉េអង បានចរាចរណ៍ដឹកទំនិញគេចពន្ធ មានដូចជា ស្ករ.ស និងទំនិញផ្សេងៗជាច្រើនទៀត សង្ស័យជាទំនិញគេចពន្ធ ដែលបានមកផ្ទេរនៅជិតប៉ុស្តិ៍ច្រករបៀងព្រំដែនគោកតែក។ ចំណែកទំនិញជាច្រើនមុខផ្សេងទៀត គេដាក់ក្នុងទៃបិទជិតមិនអាចដឹងថា ជាទំនិញអ្វី? ដោយខ្លះនិយាយថា ជាបាល់ក្រណាត់ និងសម្លៀកបំពាក់គីប។
ហើយប្រជាពលរដ្ឋបានឲ្យដឹងទៀតថា រថយន្តធុនយក្សដឹកទំនិញចំណុះ៣៥តោនទៅ៤៥តោននេះ មកដល់ព្រំដែនក៏បានផ្ទេរទំនិញដាក់លើត្រាក់ទ័រ រួចដឹកឆ្លងដែនទៅប្រទេសវៀតណាមយ៉ាងគគ្រឹក គគ្រេង ហើយឮស្នូរសម្លេងម៉ាស៊ីនយ៉ាងទ្រហឹងជារៀងរាល់យប់ ដោយគ្មានរំខានដល់សមត្ថកិច្ចណាឡើយ ព្រោះគេត្រូវគ្នាអស់ហើយ។
មហាជនក៏បានលើកឡើងទៀតថា រថយន្តដឹកទំនិញធុនយក្សប្រភេទវ៉េអង ទាំងនេះបានចរាចរណ៍បំផ្លាញផ្លូវលំជនបទ ធ្វើឱ្យស្រុតខូចជាបណ្ដើរៗហើយ សូមលោកអភិបាលខេត្ត មេត្តាចុះពិនិត្យមើលផង បើគ្មានវិធានការទប់ស្កាត់ទេ ផ្លូវលំជនបទនឹងត្រូវស្រុតខូចអស់ជាក់ជាមិនខានឡើយ។
ប្រជាពលរដ្ឋបានលើកឡើងទៀតថា រថយន្តធុនយក្សដឹកទំនិញខាងលើនេះ បើកបរបំផ្លាញផ្លូវរាល់ថ្ងៃ ហើយបង្កហុយធូលីដីចូលផ្ទះធ្វើឲ្យប៉ះពាល់ដល់សុខភាពកូនចៅរបស់ពួកគាត់ដែលរស់នៅតាមបណ្តោយផ្លូវនេះ។ ប្រជាពលរដ្ឋមានការសង្ស័យទៀតថា រថយន្តដឹកទំនិញជាទំនិញគេចពន្ធ ដោយគ្មានការបង់ពន្ធចូលរដ្ឋទេ ទើបផ្ទេរដឹកតាមត្រាក់ទ័រនៅពេលយប់ រួចឆ្លងដែនតាមច្រករបៀងគោកតែក ទៅប្រទេសវៀតណាមយ៉ាងរលូន។
ប្រជាពលរដ្ឋបានសំណូមពរទៅអាជ្ញាធរមានសមត្ថកិច្ចជួយទប់ស្កាត់កុំឱ្យមន្ត្រីប៉ុស្តិ៍ការពារព្រំដែនគោកតែក បើកផ្លូវឲ្យឈ្មួញដឹកទំនិញគ្រប់ប្រភេទចេញទៅប្រទេសវៀតណាមនៅពេលយប់ ពីព្រោះត្រាក់ទ័របានបញ្ចេញសម្លេងរំខានដល់ពួកគាត់ក្នុងការសម្រាកនៅពេលយប់។
គួរបញ្ជាក់ថា ទាក់ទិនករណីខាងលើនេះផងដែរ អ្នកសារព័ត៌មានយើងមិនអាចរកការបំភ្លឺពីលោកមេប៉ុស្តិ៍វរការពារព្រំដែន នៃច្រករបៀងគោកតែក បានទេ រហូតមកដល់វេលាម៉ោង៧និង០០នាទីយប់នាថ្ងៃទី១ ខែកុម្ភៈ ឆ្នាំ២០២៣នេះ។
ព័ត៌មានបន្ថែមនឹងមានផ្សាយជូននៅលើកាសែតកោះសន្តិភាព ៕
ចែករំលែកព័តមាននេះ