ក្រសួងការបរទេសរុស្ស៊ី៖ រុស្ស៊ីកំពុងស្វែងរកកម្រិតថ្មី នៃទំនាក់ទំនងជាមួយចិន
រុស្ស៊ី-ចិន ៖ ក្រសួងការបរទេសរុស្ស៊ី បានលើកឡើងកាលពីថ្ងៃទី៣០ ខែមករា ថា ខ្លួនចង់យកទំនាក់
រុស្ស៊ី-ចិន ៖ ក្រសួងការបរទេសរុស្ស៊ី បានលើកឡើងកាលពីថ្ងៃទី៣០ ខែមករា ថា ខ្លួនចង់យកទំនាក់ទំនងជាមួយចិន ទៅកាន់កម្រិតថ្មីមួយទៀត ហើយកំពុងទន្ទឹងរង់ចាំកិច្ចពិភាក្សាទល់មុខជាមួយនឹងថ្នាក់ដឹកនាំរបស់ទីក្រុងប៉េកាំង ខណៈដែលកាសែតរុស្ស៊ីបានរាយការណ៍ថា អ្នកការទូតកំពូលរបស់ចិន នឹងធ្វើទស្សនកិច្ចមកកាន់ទីក្រុងមូស្គូ នៅក្នុងខែកុម្ភៈ ឆាប់ៗខាងមុខនេះ។
យោងតាមប្រភពពីទីភ្នាក់ងារសារព័ត៌មាន Reuters បានរាយការណ៍ថា ក្រសួងការបរទេសរុស្ស៊ី បានលើកឡើងយ៉ាងដូច្នេះថា «យើងជឿជាក់ថា សក្តានុពលសម្រាប់កិច្ចសហប្រតិបត្តិការទ្វេភាគី «រុស្ស៊ី-ចិន» គឺនៅវែងឆ្ងាយ និងគ្មានទីបញ្ចប់»។
ប្រភពដដែលបន្តថា រុស្សីមានគោលបំណង ដើម្បីសម្រេចបានគោលដៅទំហំពាណិជ្ជកម្មដែលមានតម្លៃ ២០០ពាន់លានដុល្លាររវាងប្រទេសទាំងពីរមុនកាលកំណត់ និងដើម្បីធ្វើឱ្យកាន់តែស៊ីជម្រៅលើទំនាក់ទំនងរបស់ខ្លួន ជាមួយនឹងទីក្រុងប៉េកាំង។ ភាពជាដៃគូគ្មានដែនកំណត់ កាន់តែស៊ីជម្រៅរវាងមហាអំណាចទាំងពីរ ដែលកំពុងកើនឡើងនៃប្រទេសចិន និងធនធានធម្មជាតិរបស់រុស្ស៊ី កំពុងត្រូវបានសម្លឹងមើលដោយប្រទេសលោកខាងលិច ជាមួយនឹងក្តីបារម្ភមួយចំនួន បើទោះបីជាវាមិនច្បាស់ថា ភាពជាដៃគូមានភាពស៊ីជម្រៅខ្លាំងប៉ុណ្ណាក៏ដោយ។
ប្រទេសចិន បានបដិសេធការថ្កោលទោស ចំពោះសកម្មភាពលុកលុយរបស់រុស្ស៊ីលើអ៊ុយក្រែន ដែលទីក្រុងមូស្គូចាត់ទុកសង្គ្រាមនេះថា ជាប្រតិបត្តិការយោធាពិសេស។ ជាក់ស្តែង បន្ទាប់ពីលោកខាងលិចដាក់ទណ្ឌកម្មធ្ងន់ធ្ងរបំផុតក្នុងប្រវត្តិសាស្ត្រទំនើបលើរុស្ស៊ី ដោយសារសង្គ្រាមនៅអ៊ុយក្រែន លោកប្រធានាធិបតី Vladimir Putin បាននិយាយថា រុស្ស៊ីកំពុងងាកទៅរកអាស៊ី ហើយជាពិសេសគឺចិន បន្ទាប់ពីរាប់សតវត្សនៃការសម្លឹងមើលទៅលោកខាងលិចថា ជាផ្នែករឹងនៃកំណើនសេដ្ឋកិច្ច បច្ចេកវិទ្យា និងសង្គ្រាម។
យោងតាមកាសែត Vedomosti របស់រុស្ស៊ី បានរាយការណ៍ថា ប្រធានការទូតចិន លោក Wang Yi គ្រោងនឹងធ្វើទស្សនកិច្ចនៅទីក្រុងមូស្គូ នៅក្នុងខែកុម្ភៈ។ ទោះយ៉ាងណា គោលបំណងនៃដំណើរទស្សនកិច្ចរបស់លោក Wang គឺមិនច្បាស់លាស់នោះទេ ប៉ុន្តែប្រហែលជាទាក់ទងនឹងការរៀបចំ សម្រាប់ដំណើរទស្សនកិច្ចនាពេលខាងមុខ ទៅកាន់ប្រទេសរុស្ស៊ី របស់ប្រធានាធិបតីចិន លោក Xi Jinping៕ (ដកស្រង់ចេញពី Reuters)
ចែករំលែកព័តមាននេះ