ការលក់របស់ក្រុមហ៊ុនយក្សបារាំងកើនឡើង ទោះដាំក្បាលចុះនៅចិនយ៉ាងណាក៏ដោយ
បារាំង ៖ ក្រុមហ៊ុនយក្សឯកទេសទំនិញប្រណីតដ៏ធំបំផុតរបស់ពិភពលោក LVMH Moët Hennessy
បារាំង ៖ ក្រុមហ៊ុនយក្សឯកទេសទំនិញប្រណីតដ៏ធំបំផុតរបស់ពិភពលោក LVMH Moët Hennessy Louis Vuitton របស់បារាំង ដែលត្រូវបានគេស្គាល់យ៉ាងច្បាស់ថា LVMH បានរាយការណ៍អំពីការលក់ដ៏ខ្លាំងក្លារបស់ខ្លួន ដែលជំរុញដោយរដូវកាលទិញទំនិញថ្ងៃឈប់សម្រាក។ នេះបើយោងតាមប្រភពពីសារព័ត៌មាន BBC ចេញផ្សាយនៅថ្ងៃទី២៧ ខែមករា ឆ្នាំ២០២៣។
LVMH បានអះអាងថា ពួកគេបានឆ្លងកាត់កំណត់ត្រាឆ្នាំទី២ជាប់គ្នា ជាមួយនឹងប្រាក់ចំណូល និងប្រាក់ចំណេញ បើទោះបីជាមានភាពតានតឹងផ្នែកភូមិសាស្ត្រនយោបាយ និងតម្លៃនៃការរស់នៅខ្ពស់យ៉ាងណាក៏ដោយ។ ការលក់បានឈានដល់ជិត ២៥ពាន់លានដុល្លារ ដែលជាការកើនឡើង ៩% ក្នុងរយៈពេល៣ខែចុងក្រោយនៃឆ្នាំ ២០២២ ឈានចូលឆ្នាំ ២០២៣។
ក្រុមហ៊ុនមើលឃើញថា មានកំណើនការលក់ខ្លាំងនៅអឺរ៉ុប អាមេរិក និងជប៉ុន ដើម្បីទប់ទល់នឹងការខាតបង់ នៅក្នុងប្រទេសចិន ដោយសារតែការបិទខ្ទប់ទប់ស្កាត់ការឆ្លងរីករាលដាលនៃជំងឺកូវីដ-១៩។ នៅអាស៊ី LVMH បានជួបប្រទះនឹងការធ្លាក់ចុះនៃកំណើនការលក់ ២០% ក្នុងរយៈពេល៩ខែដំបូង ខណៈប្រទេសចិន ដែលជាមហាសេដ្ឋកិច្ចធំបំផុតទីពីររបស់ពិភពលោក បានធ្លាក់ចុះទ្វេដងលើគោលនយោបាយ «សូន្យ-កូវីដ» របស់ខ្លួន។
ទោះជាយ៉ាងណាក៏ដោយ ប្រធាន និងជានាយកប្រតិបត្តិ LVMH លោក Bernard Arnault បាននិយាយថា គាត់មានអារម្មណ៍សុទិដ្ឋិនិយមដោយប្រុងប្រយ័ត្ន ចំពោះពន្លកបៃតង នៅក្នុងប្រទេសចិន។ លោកបានថ្លែងនៅក្នុងបទបង្ហាញអំពីប្រាក់ចំណូលរបស់ក្រុមហ៊ុនថា «យើងមានហេតុផលទាំងអស់ ដើម្បីឱ្យមានទំនុកចិត្ត និងពិតជាមានសុទិដ្ឋិនិយមអំពីប្រទេសចិន»។
បុរសជនជាតិបារាំងវ័យ៧៣ឆ្នាំរូបនេះ បានចង្អុលទៅហាង ដែលមានមូលដ្ឋាននៅទីក្រុងម៉ាកាវរបស់ពួកគេ ដែលជាសញ្ញានៃអ្វីដែលអាចកើតមាន ដោយលោកបានបន្តថា អាជីវកម្មវិលមកវិញហើយ ជនជាតិចិនកំពុងចាប់ផ្តើមការទិញរបស់ពួកគេ។
ប្រេនរបស់ក្រុមហ៊ុន LVMH ដែលរួមមាន Tiffany’s, Christian Dior, Sephora, Hennessey និង Moët ខណៈប្រេន Louis Vuitton ធ្វើបានល្អយ៉ាងពិសេសបំផុត ដោយប្រាក់ចំណូលរបស់វាលើសពី ២១.៧ពាន់លានដុល្លារជាលើកដំបូង។
កាលពីពេលថ្មីៗនេះ ស្លាកសញ្ញានេះ បានចាប់ផ្តើមកិច្ចសហការថ្មីជាមួយសិល្បករសហសម័យជប៉ុន លោកស្រី Yayoi Kusama ជាមួយសិល្បៈចម្រុះពណ៌ដ៏ទាក់ទាញបំផុតរបស់លោកស្រី។
ប្រាក់ចំណូលរបស់ LVMH ត្រូវបានមើលឃើញដោយអ្នកវិភាគថា ជាទីផ្សារដ៏ប្រណីតបំផុត។ យោងតាមរបាយការណ៍ពីក្រុមហ៊ុនប្រឹក្សាយោបល់បានបង្ហាញថា ទីផ្សារទំនិញប្រណីតផ្ទាល់ខ្លួន ត្រូវបានព្យាករណ៍ថា នឹងឃើញកំណើនបន្ថែមទៀតយ៉ាងហោចណាស់ ៣-៨% នៅឆ្នាំក្រោយ បើទោះបីជាមានការធ្លាក់ចុះនៃលក្ខខណ្ឌសេដ្ឋកិច្ចពិភពលោកយ៉ាងណាក៏ដោយ។
នៅដើមខែមករានេះ LVMH បានធ្វើការផ្លាស់ប្តូរបុគ្គលិកភាពជាអ្នកដឹកនាំរបស់ខ្លួន ដោយលោក Bernard Arnault ដែលជាមហាសេដ្ឋីលំដាប់ពិភពលោកមួយរូបផងនោះ បានតែងតាំងកូនស្រីរបស់គាត់ គឺលោកស្រី Delphine Arnault វ័យ៤៧ឆ្នាំ ជាប្រធានម៉ូដរបស់ Dior ជំនួសតំណែងលោក Pietro Beccari ដែលបានចូលកាន់តំណែងជានាយកប្រតិបត្តិរបស់ Louis Vuitton ខណៈដែលកូនៗទាំង៥នាក់ របស់លោក Bernard Arnault សុទ្ធមានមុខតំណែងគ្រប់គ្រងនៅប្រេននានាក្នុងក្រុមហ៊ុន LVMH៕
ចែករំលែកព័តមាននេះ