រាជធានីភ្នំពេញ ៖ បុរសម្នាក់បាក់.ក ផុងលលាដ៍ក្បាលស្លាប់ និងម្នាក់ទៀតរងរបួសធ្ងន់ ខណៈពេលជិះម៉ូតូមកពីស្រុកកំណើតនៅខេត្តព្រៃវែង មកភ្នំពេញវិញ ក្នុងល្បឿនជ្រុលទៅបុករថយន្តដឹកស៊ីម៉ងត៍ ជាប់ផុងនៅតាមចិញ្ចើមផ្លូវពេញទំហឹង កាលពីវេលាម៉ោង១០និង៣៥នាទីយប់ ថ្ងៃទី២៣ ខែកក្កដា ឆ្នាំ២០១៧ នៅតាមបណ្តោយផ្លូវជាតិ៤ មុខកន្លែងសាច់ក្រកអាំង ស្ថិតក្នុងភូមិគល់ សង្កាត់កន្ទោក ខណ្ឌពោធិ៍សែនជ័យ ។
ជនរងគ្រោះដែលស្លាប់មានឈ្មោះ ទិន ទី ភេទប្រុស អាយុ២១ឆ្នាំ មុខរបរបើកបររថយន្ត ស្នាក់នៅម្តុំបែកចាន មានស្រុកកំណើតនៅភូមិក្រាំងក្អុក ឃុំកំពង់សឹង ស្រុកព្រះស្តេច ខេត្តព្រៃវែង ជិះគ្នា២នាក់ ម៉ូតូម៉ាក CBR ពណ៍ខ្មៅ ពាក់ស្លាកលេខ ភ្នំពេញ ១DE-០៦៩១ ។ តាមប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុ រថយន្តមួយគ្រឿងម៉ាក ហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ ៣D-៧៦២១ ជារថយន្តដឹកស៊ីម៉ងត៍ពេញរបស់ក្រុមហ៊ុនរាជសីហ៍ឡូជីស្ទិក RS បានបើកពីកើតទៅលិច មកដល់ចំណុចខាងលើបានអែបឈប់ទិញបាយហូប ស្រាប់តែផុតកង់រថយន្តជាប់ទៅមុខលែងរួច អ្នកបើកបរ និងព្រូក៏បានដាក់សញ្ញាសម្គាល់ប្រមាណ៣០ម៉ែត្រពីកន្លែងឈប់ និងបានបើកភ្លើងបំភ្លឺតិចៗ រួចហើយទៅតដែលជាប់ផុងចតនៅក្បែរលើចិញ្ចើមផ្លូវ ដោយព្រូរថយន្តចុះទៅទិញបាយ ចំណែកតៃកុងរថយន្តនៅលើរថយន្តបម្រុងចុះទៅកល់កង់រថយន្ត ស្រាប់តែមានជនរងគ្រោះជិះម៉ូតូម៉ាក CBR តាមផ្លូវជាតិ៤ ក្នុងទិសដៅពីកើតទៅលិច ក្នុងល្បឿនយ៉ាងលឿន ទើបនឹងមកពីលេងស្រុកកំណើតនៅខេត្តព្រៃវែង ខណៈមកដល់ចំណុចកើតហេតុបានបើកទៅបុកពីក្រោយរថយន្តពេញទំហឹង បណ្តាលឲ្យជនរងគ្រោះទាំង២នាក់ម្នាក់បាក់.ក ផុងលលាដ៍ក្បាលស្លាប់ភ្លាមៗនៅនឹងកន្លែង និងមិត្តភក្តិម្នាក់ទៀតរងរបួសធ្ងន់ ត្រូវរថយន្តក្លីនិកសុធារិទ្ធបែកចានដឹកទៅសង្គ្រោះ ។
ក្រោយកើតហេតុ តៃកុងរថយន្ត និងព្រូរត់គេចខ្លួនបាត់ស្រមោល នៅសល់តែជនរងគ្រោះនៅកន្លែងកើតហេតុ ចំណែកសពត្រូវបានប្រជាពលរដ្ឋនៅកន្លែងកើតហេតុ យកទូរស័ពនៅក្នុងហោប៉ៅ ទូរស័ព្ទប្រាប់សាច់ញាតិមកមើល និងទទួលយកទៅធ្វើបុណ្យតាមប្រពៃណី នៅស្រុកកំណើត ។ ចំណែករថយន្ត និងម៉ូតូទាំង២គ្រឿង ត្រូវសមត្ថកិច្ចវាស់វែងយកទៅរក្សាទុកនៅការិយាល័យចរាចរណ៍ជើងគោក នៃស្នងការនគរបាលរាជធានីភ្នំពេញ ៕
ចែករំលែកព័តមាននេះ