ភ្នំពេញ៖ រដ្ឋសភា បានលើកជាសំណូមពរដល់ក្រសួងព័ត៌មាន ធ្វើការសិក្សាពិនិត្យ​លទ្ធភាពក្នុង​ការបង្កើតកម្មវិធីទូរទស្សន៍របស់សភាដាច់ដោយឡែក ក្នុងគោលបំណង​ផ្សព្វផ្សាយ​ទៅកាន់​សាធារណជន​ឱ្យបាន​ជ្រួតជ្រាប​នូវកិច្ច​ការងារសភា ជាពិសេស​ក្នុងក្របខណ្ឌ​ក្រុមសមាជិក​សភាវ័យ​ក្មេង ក្នុងភាពជាតំណាងរបស់ប្រជាពលរដ្ឋ ជាម្ចាស់​ឆ្នោត។

ខ្លឹមសារខាងលើនេះ ជាលទ្ធផល​នៃកិច្ចប្រជុំរវាង​គណៈកម្មការកិច្ចការបរទេស សហប្រតិបត្តិការ​អន្តរជាតិ ឃោសនាការ និងព័ត៌មាន នៃរដ្ឋសភា​ ជាមួយ​នឹងក្រសួងព័ត៌មាន នៅវិមានរដ្ឋសភា នាព្រឹកថ្ងៃទី២៥ ខែមករា ឆ្នាំ២០២៣។

សេចក្តីប្រកាស លើកឡើងថា គណៈកម្មការជំនាញរដ្ឋសភា និងក្រសួងព័ត៌មាន ក៏បានលើកឡើង​នូវគំរូជាឧទាហរណ៍ អំពីប៉ុស្តិ៍ទូរទស្សន៍សភានៃបណ្តា​ប្រទេសជឿនលឿនមួយចំនួនទាំងនៅអាស៊ី និងអឺរ៉ុប។ រដ្ឋសភា ក៏បានស្នើដល់​ក្រសួងព័ត៌មាន ធ្វើការពិចារណា ក្នុងការផ្តល់​មេដាយ​ឆ្នើម ជូន​អ្នកសារព័ត៌មាន​កម្ពុជាណា ដែលបានការទទួលស្គាល់​នូវ​គុណតម្លៃពីរដ្ឋសភា និងបានជ្រើសរើស ក្រោមការពិនិត្យ​វាយតម្លៃអំពី​គុណសម្បត្តិ និងការខិតខំ​បំពេញការងារទៅតាមវិជ្ជាជីវៈ​របស់ខ្លួន ដោយក្រសួងព័ត៌មាន៕