ម្ចាស់អាជីវកម្មលក់គ្រឿងសមុទ្រទាំងអស់នៅតំបន់ត្រឡោកបែក ត្រូវអាជ្ញាធរឱ្យបញ្ឈប់ជាបន្ទាន់ ដោយទុកពេល៣ខែ
- ភ្នំពេញ
រាជធានីភ្នំពេញ ៖ ទីតាំងលក់គ្រឿងសមុទ្រទាំងអស់ នៅតាមផ្លូវលេខ ៥៨៩ ក្នុងមូលដ្ឋានសង្កាត់ទឹក
រាជធានីភ្នំពេញ ៖ ទីតាំងលក់គ្រឿងសមុទ្រទាំងអស់ នៅតាមផ្លូវលេខ ៥៨៩ ក្នុងមូលដ្ឋានសង្កាត់ទឹកល្អក់ទី១ ខណ្ឌទួលគោក ត្រូវអាជ្ញាធរអោយបញ្ឈប់ការប្រកបអាជីវកម្មទាំងស្រុងដោយអោយផ្លាស់ប្តូរ ទីតាំងអាជីវកម្មទៅកន្លែងថ្មីដែលមានលក្ខណៈស្តង់ដាសមស្រប ដោយមិនប៉ះពាល់លើចិញ្ចើមផ្លូវ និងទ្រូងផ្លូវសាធារណៈ ដោយទុករយៈពេល៣ខែ ។ នេះបើតាមសេចក្តីជូនដំណឹងរបស់រដ្ឋបាលខណ្ឌ ទួលគោក ដែលត្រូវបានលោក ជា ពិសី អភិបាលខណ្ឌទួលគោក បានបង្ហោះនៅក្នុងបណ្តាញសង្គមជាសាធារណៈកាលពីថ្ងៃទី២៣ ខែមករា ឆ្នាំ ២០២៣ ម្សិលមិញនេះ ។
ការបញ្ឈប់អាជីវកម្មលក់គ្រឿងសមុទ្រនៅទីតាំងខាងលើនេះ ត្រូវបានគេអោយដឹងថា មិនតែចំពោះ ក្នុងខណ្ឌទូលគោកនោះទេ សូម្បីតែក្នុងសង្កាត់ទឹកថ្លាខណ្ឌសែនសុខ ក៍ត្រូវបានបញ្ឈប់អាជីវកម្មដែរ ។
តាមសេចក្តីជួនដំណឹងរបស់រដ្ឋបាលខណ្ឌទួលគោក ចុះថ្ងៃទី២០ ខែមករា ឆ្នាំ ២០២៣ បានអោយដឹងថា រដ្ឋបាលខណ្ឌទួលគោកសូមជម្រាបជូននដល់បងប្អូនប្រជាពលរដ្ឋជាម្ចាស់អាជីវកម្មលក់គ្រឿង សមុទ្រនៅតាមផ្លូវលេខ៥៩៨ ក្នុងភូមិ ទី១៦សង្កាត់ទឹកល្អក់ទី១ ខណ្ឌទួលគោកទាំងអស់ មេត្តាជ្រាបថា ដើម្បីចូលរួមសហការរក្សាសណ្តាប់ធ្នាប់តាមដងផ្លូវ និងការប្រើប្រាស់ចិញ្ចើមផ្លូវសាធារណៈអោយមានរបៀបរៀបរយ ក្នុងន័យដោះស្រាយបញ្ចៀសកកស្ទះចរាចរណ៍ កាត់បន្ថយការគ្រោះថ្នាក់ចរាចរណ៍និងលើកម្ពស់សោភណ្ឌភាពរាជធានីភ្នំពេញ រដ្ឋបាលខណ្ឌទួលគោកស្នើសុំអោយអស់លោក លោកស្រីម្ចាស់អាជីវកម្មទាំងអស់ខាងលើ បញ្ឈប់ជាបន្ទាន់ក្នុងការប្រកបអាជីកម្មលក់គ្រឿងសមុទ្ររំលោ.ភលើចិញ្ចើមផ្លូវ និងទ្រូងផ្លូវ ឬតសំយាបដំបូលផ្ទះរំលោ.ភលើចិញ្ចើមផ្លូវសាធារណៈ ព្រមទាំងធ្វើការផ្លាស់ប្តូរទីតាំងអាជីវកម្មទៅកន្លែងថ្មីដែលមានលក្ខណះស្តង់ដា សមស្របដោយមិនប៉ះពាល់លើចិញ្ចើមផ្លូវ និងទ្រូងផ្លូវសាធារណៈ ដោយទុករយះពេលអោយចំនួន ៣ខែ(បីខែ)ចាប់ពីថ្ងៃទី២៣ខែមករា ឆ្នាំ ២០២៣ រហូតដល់ថ្ងៃទី២១ខែមេសា ឆ្នាំ២០២៣ជាកំហិត ។
ក្នុងលិខិតនោះ ក៍បានអោយដឹងទៀតថា ក្នុងករណី លោក លោកស្រី មិនអនុវត្តតាមខ្លឹមសារសេចក្តីជូនដំណឹងខាងលើនេះ រដ្ឋបាលខណ្ឌទួលគោក នឹងមានវិធានការចុះរុះរើ និងដកហូតដោយមិនទទួលខុសត្រូវរាល់ការបាត់បង់ខូចខាតទ្រព្យសម្បត្តិ និងសម្ភារៈផ្សេងៗដែលមាននៅទីតាំងនោះឡើយ ។ ករណីមានការរារាំងរឹងរូសមិនស្តាប់ តាមការណែនាំរដ្ឋបាលខណ្ឌទួលគោក នឹងអនុវត្តវិធាការរដ្ឋបាលតាមផ្លូវច្បាប់។
តាមប្រភពពីលោកប៉ិច សុខឃឿន ចៅសង្កាត់ទឹកល្អក់ទី១ បានអោយដឹងថា ការបញ្ឈប់ការធ្វើអាជីវកម្មលក់គ្រឿងសមុទ្រទាំងស្រុង ដោយសារមានហេតុផលចំនួន២យ៉ាងគឺ ចំណុចទី១-បញ្ហាសណ្តាប់ ធ្នាប់ ពួកគាត់លក់ក្នុងផ្ទះមែន តែពេលទទួលពីម៉ូយ និងបោះអោយម៉ូយ ធ្វើអោយបាត់បង់សណ្តាប់សាធារណៈចាប់ពីវេលាម៉ោងប្រមាណ៥ទៀបភ្លឺ រហូតដល់ម៉ោងប្រមាណ៧ទៅ៧និង៣០ព្រឹក និងចំណុចទី២-ទាក់ទងនឹងបញ្ហាក្លិន និងការលាងគ្រឿងសមុទ្រ បណ្តាលអោយទឹកហូរលើដងផ្លូវបណ្តាលអោយខូចខាតផ្លូវ ទើបសាសាខណ្ឌបានជួនដំណឹងបញ្ឈប់អាជីវកម្មតែម្តង។
លោកចៅសង្កាត់ទឹកល្អក់ទី១ បានអោយដឹងទៀតថា ការបញ្ឈប់អាជីវកម្មលក់គ្រឿងសមុទ្រ ធ្វើតែក្នុងខណ្ឌទួលគោកនោះទេ តែផ្លូវម្ខាងទៀតនៅក្នុងសង្កាត់ទឹកថ្លា ខណ្ឌសែនសុខ គាត់ពុំបានដឹងច្បាស់នោះទេ ព្រោះអាជីករនោះ ពួកគាត់មានដីឡូតិ៍លក់នៅខាងក្នុង ។
លោក ម៉ូវ ម៉ានិត អភិបាលខណ្ឌសែនសុខ បានអោយយដឹងថាអាជីវកម្ម លក់ដូរគ្រឿងសមុទ្រនៅក្នុងមូលដ្ឋានខណ្ឌសែនសុខក៍ត្រូវបានបញ្ឈប់អាជីវកម្ម ទាំងស្រុង ដូចគ្នា នឹងក្នុងមូលដ្ឋានខណ្ឌទួលគោកដែរ។
ទោះបីជាយ៉ាងណា នៅព្រឹកថ្ងៃទី២៤ ខែមករា ឆ្នាំ២០២៣ កោះសន្តិភាពបានចុះសាកសួរអាជីវកលក់គ្រឿងសមុទ្រ ពួកគាត់ពុំទាន់បានដឹងពីគោលការណ៍បញ្ឈប់អាជីវកម្ម របស់ពួកគាត់ឡើយ ។
តាមអាជីវករលក់គ្រឿង សមុទ្រនៅក្នុងសង្កាត់ទឹកល្អក់ទី១ម្នាក់ បានអោយដឹងថា ពួកគាត់ពុំទាន់បានដឹងពីសេចក្តិជួនដំណឹងអោយពួកគាត់បញ្ឈប់អាជីវកម្មឡើយ តែកន្លងមក មានអាជ្ញាធរ សង្កាត់ខណ្ឌបានចុះទៅរៀបចំសណ្តាប់ធ្នាប់ណែនាំអោយគាត់លក់ដូរចូលក្នុង ចៀសវាងធ្វើអោយបាត់បង់សណ្តាប់ធ្នាប់សាធារណៈ។
លោកស្រីម្ចាស់អាជីកម្មលក់គ្រឿងសមុទ្រ យីហោស្រីពៅ ពិភពបង្កង់ ដែលមានទីតាំងនៅតាមផ្លូវលេខ ៥៩៨ សង្កាត់ទឹកថ្លា បានអោយដឹងថា គាត់ពុំទាន់ទទួលបាននូវសេចក្តីជូនដំណឹងអោយពួកគាត់បញ្ឈប់អាជីវកម្មលក់ដូរគ្រឿងសមុទ្រឡើយ ។ កន្លងមក គាត់បានលក់ដូរ តែខាងក្នុងផ្ទះ មិនបង្កអោយបាត់បង់សណ្តាប់ធ្នាប់សាធារណៈនោះឡើយ ។
គួរបញ្ជាក់ថា នៅតាមសងខាងផ្លូវលេខ ៥៩៨ (តំបន់ត្រឡោកបែក)សង្កាត់ទឹកល្អក់ទី១ ខណ្ឌទួលគោកនិងសង្កាត់ទឹកថ្លា ខណ្ឌសែនសុខ រាជធានីភ្នំពេញ ជាទីប្រជុំជនអាជីវករ លក់ចែកចាយ បោះដុំគ្រឿង សមុទ្រដ៍ធំនៅក្នុងរាជធានីភ្នំពេញ ហើយ ពេលនោះ ត្រូវបានអាជ្ញាធរ គ្រោងនឹងបញ្ឍប់អាជីវកម្ម លក់ដូររបស់ពួកគាត់នៅពេលខាងមុខនោះ ៕
ចែករំលែកព័តមាននេះ