កូរ៉េខាងជើង-កូរ៉េខាងត្បូង ៖ ប្រទេសកូរ៉េខាងជើងនៅតែធ្វើមិនដឹងមិនឮសំណើរបស់កូរ៉េខាងត្បូង ដែលអំពាវនាវឱ្យមានការចរចាគ្នាខាងយោធានាថ្ងៃទី២១ កក្កដា រវាងកូរ៉េទាំង២ ដែលនេះជាសញ្ញាបរាជ័យការប៉ុនប៉ងលើកដំបូងឱ្យមានការចរចារបស់ប្រធានាធិបតីកូរ៉េខាងត្បូង លោក MOON JAE IN ។
ក្រុងព្យុងយ៉ាងពុំបានឆ្លើយតបសំណើកាលពីថ្ងៃទី១៧ កក្កដា របស់កូរ៉េខាងត្បូង ដែលចង់កាត់បន្ថយការប្រទូស្តរ៉ាយគ្នានៅតំបន់ព្រំដែនរវាងកូរ៉េទាំង២ ។
កាលពីខែឧសភា លោក MOON JAE IN បានឡើងកាន់តំណែងជាមួយការសន្យាបើកការចរចាជាមួយកូរ៉េខាងជើង ហើយនាំរបបនេះឈានទៅបញ្ឈប់កម្មវិធីនុយក្លេអ៊ែរ និងបាលី ស្ទិក ។ ថ្ងៃទី៤ កក្កដា ក្រុងព្យុងយ៉ាងប្រកាសពីការបាញ់សាកល្បងដោយជោគជ័យ មីស៊ីលបាលីស្ទិករំលងទ្វីបដែលអាចផ្ទុកក្បាលគ្រាប់នុយក្លេអ៊ែរ ។
អ្នកនាំពាក្យក្រសួងការពារជាតិកូរ៉េខាងត្បូង លោក MOON SANG អះអាងនាថ្ងៃទី២១ កក្កដា ក្នុងសន្និសីទសារព័ត៌មានមួយថា ការចរចាដែលបានស្នើពុំអាចមានឡើយ ដោយសារគ្មានចម្លើយរបស់កូរ៉េខាងជើង ។ លោកថា សំណើនៅតែជាធរមាន ហើយស្នើឱ្យក្រុងព្យុងយ៉ាងឆ្លើយតប ។ នេះជាភារកិច្ចចាំបាច់ និងបន្ទាន់មួយ ដើម្បីសន្តិភាព និងស្ថេរភាពនៅឧបទ្វីបកូរ៉េ ដើម្បីស្តារការចរចាឡើងវិញនៅតំបន់ហាមមិនឱ្យមានកងទ័ព ហើយសម្រាលភាពតានតឹងខាងយោធា រវាងកូរ៉េទាំង២ ៕
ចែករំលែកព័តមាននេះ