រាជធានីភ្នំពេញ ៖ រថយន្តបែនដឹកខ្សាច់មួយគ្រឿង ខណៈកំពុងបើកបរលើផ្លូវខ្នងប្រឡាយ ដែលមានទំហំផ្លូវតូច ហើយដោយកង់រថយន្តជាន់មាត់ប្រឡាយ ធ្វើឱ្យទប់ទម្ងន់អត់បានស្រុតបាក់ដី បណ្ដាលឱ្យក្រឡាប់ធ្លាក់ចូលក្នុងទឹកប្រឡាយទាំងកំរោលតែម្ដង
រាជធានីភ្នំពេញ ៖ រថយន្តបែនដឹកខ្សាច់មួយគ្រឿង ខណៈកំពុងបើកបរលើផ្លូវខ្នងប្រឡាយ ដែលមានទំហំផ្លូវតូច ហើយដោយកង់រថយន្តជាន់មាត់ប្រឡាយ ធ្វើឱ្យទប់ទម្ងន់អត់បានស្រុតបាក់ដី បណ្ដាលឱ្យក្រឡាប់ធ្លាក់ចូលក្នុងទឹកប្រឡាយទាំងកំរោលតែម្ដង ប៉ុន្តែសំណាងល្អ មិនបណ្ដាលឱ្យមានគ្រោះថ្នាក់ដល់អ្នកបើកបរ និងអ្នកដំណើរឡើយ ។ ហេតុការណ៍នេះ បង្កការភ្ញាក់ផ្អើលឡើង កាលពីវេលាម៉ោង១០ និង៣០ព្រឹកថ្ងៃទី២០ កក្កដា ស្ថិតក្នុងភូមិព្រៃព្រីងខាងជើង សង្កាត់ចោមចៅ ខណ្ឌពោធិ៍សែនជ័យ ។
ប្រភពឱ្យដឹងទៀតថា រថយន្តដឹកខ្សាច់នេះ មានពាក់ស្លាកលេខភ្នំពេញ3D-9766 ហើយអ្នកបើកបរ មិនត្រូវស្គាល់ឈ្មោះទេ បានរងរបួសស្រាល ចំណែករថយន្តនេះរងការខូចខាតខ្លះៗដែរ ។ បើតាមពលរដ្ឋថា នៅមុនពេលកើតហេតុ ពួកគាត់ឃើញរថយន្តមួយគ្រឿងនោះ បើកបរធ្វើដំណើរក្នុងទិសដៅពីលិចទៅកើត ដោយបានដឹកខ្សាច់ពេញក្នុងទ្រុង មានទម្ងន់ប្រហែលជាង១០តោន ។
ចំណែកផ្លូវនោះវិញ ជាផ្លូវខ្នងប្រឡាយដែលគេទើបចាក់ថ្មីគ្មានគ្រឹះ គ្មានចិញ្ចើមត្រឹមត្រូវនោះឡើយ មិនតែប៉ុណ្ណោះផ្លូវខាងលើនិងរថយន្តបែន១គ្រឿងនេះ មានទំហំស្ទើរតែប៉ុនគ្នា ហើយកង់ឆ្វេងរថយន្តនេះបានជាន់បបេះលើមាត់ប្រឡាយថែមទៀតផង ។ លុះពេលទៅដល់ត្រង់ចំណុចកើតហេតុ ក៏បាក់ដីមាត់ប្រឡាយ បណ្ដាលឲ្យផុងកង់ក្រឡាប់ធ្លាក់ចូលទៅក្នុងប្រឡាយទឹកតែម្ដង។
ចែករំលែកព័តមាននេះ