ខេត្តបាត់ដំបង ៖ គ្រឿងចក្រប្រភេទ «សាស័រ» មួយគ្រឿង ដែលមន្ត្រីគយនិងឈ្មួញទុច្ចរិតអះអាងថា បានជួលពីប្រទេសថៃ ក្នុងរយៈពេលមួយខែ សម្រាប់យកមករុញ ឬចូកដំឡូងលើកដាក់រថយន្ត ពេលនេះកំពុងសំងំលាក់ខ្លួន នៅក្នុងឃ្លាំងស្ដុកកសិផលមួយ
ខេត្តបាត់ដំបង ៖ គ្រឿងចក្រប្រភេទ «សាស័រ» មួយគ្រឿង ដែលមន្ត្រីគយនិងឈ្មួញទុច្ចរិតអះអាងថា បានជួលពីប្រទេសថៃ ក្នុងរយៈពេលមួយខែ សម្រាប់យកមករុញ ឬចូកដំឡូងលើកដាក់រថយន្ត ពេលនេះកំពុងសំងំលាក់ខ្លួន នៅក្នុងឃ្លាំងស្ដុកកសិផលមួយកន្លែងក្នុងស្រុកភ្នំព្រឹក មិនទាន់ត្រឡប់ទៅប្រទេសកំណើតវិញទេ បើទោះជាហួសសុពលភាពនៃរយៈពេលជួលពីប្រទេសថៃក្ដី ។ គេកំពុងសង្ស័យថា មន្ត្រីគយនិងអ្នកធានានាំចូលគ្រឿងចក្រនេះ ព្យាយាមបិទបាំងគេចវេសមិនចង់បង់ពន្ធស្របច្បាប់ ខណៈពេលនេះត្រូវបានបែកធ្លាយ ។
បើតាមមន្ត្រីព្រំដែនម្នាក់បាននិយាយថា គ្រឿងចក្រប្រភេទ «សាស័រ» នោះ ត្រូវបាននាំចូលនៅម៉ោងជាង៧យប់ថ្ងៃទី០៣ មិថុនា ២០១៧ តាមច្រកតំបន់ «អូររំដូល» ស្រុកភ្នំព្រឹក ។ ដែលធានាដោយថៅកែទិញ-លក់កសិផលដ៏ល្បីម្នាក់ ឈ្មោះរោង សារឹម ជាមន្ត្រីយោធា រស់នៅភូមិវាលវង់ ឃុំតាស្ដា ស្រុកសំពៅលូន ។ ប្រភពដដែលបន្តថា រឿងនេះ អាចជាការឃុបឃិតគ្នា រវាងមន្ត្រីគយ និងរដ្ឋាករប្រចាំច្រកតំបន់ «អូររំដូល» ជាមួយនិងឈ្មោះរោង សារឹម ក្នុងការបន្លំនាំចូលគ្រឿងចក្រនេះ ដើម្បីគេចពីការបង់ពន្ធជូនរដ្ឋ ក្រោមលេសធានាស្របច្បាប់ជួលពីថៃ រយៈពេល១ខែយកមករុញ ឬចូកដំឡូងមី ។ ប៉ុន្តែមន្ត្រីព្រំដែនខាងលើបានប្រាប់ថា ពេលនេះកិច្ចសន្យាធានានោះ ហួសសុពលភាពជាងកន្លះខែហើយ តែគេមិនឃើញលោកគយនិងលោកសារឹម បញ្ជូនគ្រឿងចក្រនេះត្រឡប់ទៅប្រទេសថៃវិញនៅឡើយទេ ហើយពេលនេះគ្រឿងចក្រនោះ ក៏កំពុងសម្ងំលាក់ខ្លួននៅតាមឃ្លាំងស្ដុកកសិផល នៅជិតព្រំដែនខ្មែរ-ថៃនោះនៅឡើយដែរ ។
កោះសន្តិភាពមិនអាចសុំការបំភ្លឺពីលោករោង សារឹម ជាថៅកែទិញ-លក់កសិផល និងជាអ្នកធានាគ្រឿងចក្រនាំចូលពីប្រទេសថៃ នោះបានទេនាព្រឹកថ្ងៃទី១៩ កក្កដា នេះ ។ ប៉ុន្តែនៅថ្ងៃដដែល លោកយ៉ែម ខេមរ៉ាត់ ប្រធានការិយាល័យគយ និងរដ្ឋាកប្រចាំច្រកតំបន់ «អូររំដូល»ស្រុកភ្នំព្រឹក បានបំភ្លឺប្រាប់អ្នកសារព័ត៌មានថា ពិតជាមាននាំចូលគ្រឿងចក្រប្រភេទ «សាស័រ» ដូចខាងលើនេះមែន ។ ហើយលោកបានរាយការណ៍ជូនទៅអគ្គនាយកគយ និងរដ្ឋាករួចហើយ ។ លោកបានបញ្ជាក់យ៉ាងខ្លីដូច្នេះថា ពេលនេះម្ចាស់គ្រឿងចក្រនោះ កំពុងបំពេញបែបបទបង់ពន្ធតាមផ្លូវច្បាប់ហើយ។
ជុំវិញការបំភ្លឺរបស់ប្រធានគយដែលអះអាងថា ម្ចាស់គ្រឿងចក្របានចេញមុខបង់ពន្ធនេះ មន្ត្រីនានាបានលើកឡើងបែបចំអកថា តាមពិតរឿងគ្រឿងចក្រនេះ មន្ត្រីគយនិងម្ចាស់គ្រឿងចក្របានព្យាយាមបិទបាំង តែក្រោយពីបែកធ្លាយ ហើយអ្នកសារព័ត៌មានតាមសួរដេញដោល ទើបមន្ត្រីខិលខូចទាំងនេះ ជម្រុញឱ្យម្ចាស់ចេញមុខបង់ពន្ធស្របច្បាប់តែម្ដងទៅ ។
ចែករំលែកព័តមាននេះ