ភ្នំពេញ៖ ក្នុងពេល​ចៅ​ស្រីច្បងរបស់សម្តេច បានទទួលសញ្ញាបត្រ​ ថ្នាក់បរិញ្ញាបត្រ នៅថ្ងៃទី១៧ ខែមករា ឆ្នាំ២០២៣ នេះ សម្តេចតេជោ ហ៊ុន សែន បានបង្ហើប​ពីបំណងប្រាថ្នារបស់សម្តេច ដែលចង់​ឱ្យចៅៗរបស់សម្តេច រៀនយ៉ាងទាបបំផុត ត្រឹមបរិញ្ញាបត្រ​ជាន់ខ្ពស់ ឬថ្នាក់អនុបណ្ឌិត​។

អមដោយរូបថតលោកស្រី ហ៊ុន ម៉ាណា អបអរ​​កូនស្រី ដែលទទួលបានសញ្ញាបត្រ​បរិញ្ញា នាយប់ថ្ងៃទី១៧ ខែមករានេះ សម្តេចតេជោ ហ៊ុន សែន បានសរសេរថា «ថ្ងៃនេះ ចៅស្រីច្បងទទួលសញ្ញាបត្រថ្នាក់បរិញ្ញាបត្រ ជាមួយការអបអរសាទរពីជីដូន ជីតា និងក្រុមគ្រួសារ។ មិនទាន់ចប់ទេចៅ បរិញ្ញាបត្រជាន់ខ្ពស់ (អនុបណ្ឌិត) ទាបបំផុត និងគោលដៅ គឺថ្នាក់បណ្ឌិត»។

សម្តេចតេជោ ហ៊ុន សែន ​បានបន្ថែមថា «​ការ​ចង់​បានរបស់ជីដូនជីតា គឺចៅទាំងអស់ ត្រូវតែមានបរិញ្ញាបត្រជាន់ខ្ពស់​ ទាប​បំផុត និងថ្នាក់បណ្ឌិត ជាគោលដៅខ្ពស់បំផុត។ នេះជាការកំណត់គោលដៅ​នៃគ្រួសារ ដែលសាមីខ្លួន ចៅម្នាក់ៗ និងឪពុកម្តាយពួកគេ ត្រូវខិតខំ ក្រោមការតម្រង់ទិសពីខ្ញុំផ្ទាល់ ដែលជាមេគ្រួសារ»។

តាមខ្លីបវិដេអូ ដែល​សម្តេចតេជោ ហ៊ុន សែន បានបង្ហោះផ្សព្វផ្សាយតាមបណ្តាញសង្គម ចៅស្រី​ច្បងរបស់សម្តេច ដែលឡើងទទួលសញ្ញាបត្របរិញាបត្រ នាថ្ងៃទី១៧មករានេះ ឈ្មោះ ធីតា ហ៊ុន សែន រៀននៅមហាវិទ្យាល័យ King’s College ក្នុងទីក្រុងឡុងដ៍ ចក្រ​ភពអង់គ្លេស៕