ខេត្តស្ទឹងត្រែង ៖ នៅមិនដល់២ថ្ងៃទៀតប៉ុណ្ណោះក្នុងថ្ងៃទី១៥ ខែកក្កដា ឆ្នាំ២០១៧ ទំបន់វារីអគ្គិសនីសេសានក្រោម២ និងត្រូវបិទទំនប់ទឹករបស់ខ្លួនដើម្បីធ្វើតេស្តសាកល្បងលើគុណភាពសំណង់ ហើយនឹងត្រូវបិទជាផ្លូវការនៅថ្ងៃទី២៥ ខែកញ្ញា ឆ្នាំ២០១៧ ខាងក្រោមអធិបតីភាពដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។ លោក លី ម៉េងសៀង នាយករងក្រុមហ៊ុនវារីអគ្គិសនីសេសានក្រោម២ថា សំណង់វារីអគ្គិសនីសេសានក្រោម២ ជាសំណង់ផ្គត់ផ្គង់ប្រភពថាមពលអគ្គិសនីដ៏ធំបំផុតនៅប្រទេសកម្ពុជាស្ថិតនៅដងទន្លេសេសាន ឃុំភ្លុក ស្រុកសេសាន ដែលបានផ្តើមសាងសង់ឡើងកាលពីខែមករា ឆ្នាំ២០១៤ ដោយប្រើប្រាស់កម្លាំងពលកម្មសរុបជាងពីរពាន់នាក់ លើទំហំផ្ទៃដី៣៦០០០ហិកតា(បីម៉ឺនប្រាំមួយពាន់ហិកតា) ដោយមានកម្ពស់៨០ម៉ែត្រ ក្នុងនោះកម្ពស់៧៥ម៉ែត្រ ជាកម្ពស់សម្រាប់ទប់ទឹក និងកម្ពស់៥ម៉ែត្រទៀត ជាកម្ពស់សម្រាប់ការពារហានិភ័យពីកម្រិតទឹកខ្ពស់ជ្រុល។
ហើយនៅចុងខែតុលា ឆ្នាំ២០១៧ខាងមុខនេះ វារីអគ្គិសនីសេសានក្រោម២នឹងដំណើរការតួបីនទី១ ដែលអាចផ្តល់ថាមពលបាន៥០(ហាសិប)មេកាវ៉ាត់ម៉ោង ហើយតួបីនបន្តបន្ទាប់ទាំង៨ នៃទំនប់វារិអគ្គិសនីនេះនឹងផ្តល់ថាមពលសរុបចំនួន៤០០(បួនរយ)មេកាវ៉ាត់ម៉ោង នៅចុងឆ្នាំ២០១៨។ បច្ចុប្បន្នទំនប់វារីអគ្គិសនីសេសានក្រោម២ បានដំណើរការសាងសង់សម្រេចបាន៩២ភាគរយទៅហើយ នៅសេសសល់តែបន្តិចទៀតប៉ុណ្ណោះនឹងបញ្ចប់គម្រោងសាងសង់។ ទំនប់វារីអគ្គិសនីសេសានក្រោម២ នៅប៉ែកឦសាននៃប្រទេសកម្ពុជាត្រូវបានរដ្ឋាភិបាលចាត់ទុកថាជាថាមពលអគ្គិសនីដ៏ធំបំផុតដែលអាចផ្តល់ថាមពលទៅបង្គ្រប់តម្រូវការកង្វះខាតទូទាំងប្រទេសកម្ពុជា និងជួយផ្តល់ថាមពលអគ្គិសនីលើគ្រប់វិស័យសេដ្ឋកិច្ចទូទាំងប្រទេសកម្ពុជា។
ដោយមានការគាំទ្រពីរាជរដ្ឋាភិបាលកម្ពុជាលើការវិនិយោគវារីអគ្គិសនីសេសានក្រោម២ ត្រូវបានសាងសង់ឡើងសម្រេចបាន៩២ភាគរយ មកទល់បច្ចុប្បន្នដោយក្រុមហ៊ុនហាយត្រូលែនសិង អិនធើណេស៊ិនណល អ៊ិនឡូជី មកពីប្រទេសចិន មានភាគហ៊ុន៥១ភាគរយ(ហាសិបមួយភាគរយ) ក្រុមហ៊ុនកម្ពុជា រ៉ូយ៉ាល់គ្រុប របស់អ្នកឧកញ៉ា គិត ម៉េង ៣៩ភាគរយ (សាមសិបប្រាំបួនភាគរយ) និងក្រុមហ៊ុន អី វី អិន ដែលមកពីប្រទេសវៀតណាម១០ភាគរយ(ដប់ភាគរយ) ក្នុងទុនវិនិយោគទឹកប្រាក់ជាង៨០០លានដុល្លារ(ប្រាំបីរយលានដុល្លារ) សហរដ្ឋអាមេរិក។ យោងតាមកិច្ចព្រមព្រៀងរវាងក្រុមហ៊ុនវិនិយោគ និងរាជរដ្ឋាភិបាលកម្ពុជាបន្ទាប់ពីដំណើរការអស់រយៈពេល៤០ឆ្នាំ គម្រោងវារីអគ្គិសនីសេសានក្រោម២នេះនឹងត្រូវប្រគល់ជូនរាជរដ្ឋាភិបាលជាអ្នកគ្រប់គ្រងវិញ។ ជាមួយការជោគជ័យដ៏ធំធេងនេះ រដ្ឋាភិបាលរំពឹងទុកវារីអគ្គិសនីសេសានក្រោម២នេះ ផ្តល់ចំណូលពន្ធប្រមាណជា៣០លានដុល្លារក្នុងមួយឆ្នាំៗ។
ទាក់ទងទៅនឹងគម្រោងវារីអគ្គិសនីសេសានក្រោម២នេះដែរ ក្រុមហ៊ុនវិនិយោគបានធ្វើការដោះស្រាយសំណងជូនប្រជាពលរដ្ឋយ៉ាងសាកសមដោយបានរៀបចំដីលំនៅស្ថានដីធ្លីសម្រាប់បង្កបង្កើនផលដំណាំស្រែចម្ការហេដ្ឋារចនាសម្ព័ន្ធរួមមាន ទីផ្សារ ផ្លូវថ្នល់ ទឹក ភ្លើង សាលារៀន មន្ទីរពេទ្យ វត្តអារាម។ល។ មេឃុំស្រែគ លោក សៀក មេគង្គ ឲ្យដឹងថា ការផ្តល់សំណងផលប៉ះពាល់រវាងក្រុមហ៊ុនវិនិយោគវារីអគ្គិសនីសេសានក្រោម២ជូនដល់ប្រជាពលរដ្ឋមានការសមស្របបំផុតតាមការស្នើរបស់ប្រជាពលរដ្ឋ។ លោកចាត់ទុកថាសំណងទាំងនេះប្រសើរជាង៧០ភាគ បើធៀបទៅសំណងគម្រោងផលប៉ះពាល់នៃវារីអគ្គិសនីមួយចំនួននៅក្នុងប្រទេសកម្ពុជា។ លោកមេឃុំបន្តថាទន្ទឹមនេះក៏មានគ្រួសារប្រជាពលរដ្ឋចំនួន២ភូមិប្រមាណជា៩០គ្រួសារទៀតដែលមិនព្រមចាកចេញពីតំបន់លិចទឹក ហើយនៅពេលនេះអាជ្ញាធរឃុំបានផ្សព្វផ្សាយរួចទៅដែរព្រមទាំងរកទីទួលសុវត្ថិភាពដើម្បីពួកគាត់ជ្រក។
លោកថានៅសេសសល់៨៧ខ្នងផ្ទះស្មើ៩១គ្រួសារ ក្នុងភូមិក្បាលរមាស និងភូមិស្រែគពួកគេមិនព្រមលះបង់ការចាកចេញដោយសារទៀមទារសំណងខ្ពស់ពេក ចំនួនពីរម៉ឺនដុល្លារក្នុងមួយគ្រួសារប្រសិនមិនបានចំនួននេះពួកគាត់មិនព្រមចាកចេញឡើយ។ លោកបន្ថែមថា ពួកគាត់មិនដឹងស្តាប់ហេតុផលពីណាមកទេ ពួកគាត់ថាពេលនេះគេបិទទំនប់លិចទឹកសុខចិត្តទៅរស់នៅទីទួលសុវត្ថិភាពសិនរង់ចាំឆ្នាំក្រោយទឹកនឹងស្រកពួកគាត់ត្រលប់ចូលរស់នៅវិញ ទោះបីមានការពន្យល់យ៉ាងណាក៏ពួកគាត់ស្តាប់មិនដែរ៕
ចែករំលែកព័តមាននេះ