រាជធានីភ្នំពេញ ៖ គ្រោះថ្នាក់ចរាចររវាងម៉ូតូ និងម៉ូតូ បុកគ្នាបណ្តាលឲ្យរងរបួសធ្ងន់ម្នាក់ និងស្រាលម្នាក់ បែរជាសមត្ថកិច្ចចំនួន៣ខណ្ឌ ដែលមានព្រំប្រទល់នៅជាប់គ្នា បានចុះទៅដល់កន្លែងកើតហេតុ បានរុញដាក់គ្នាទៅវិញទៅមក ជិត២ម៉ោង ទើបសមត្ថកិច្ចសម្រេចវាស់វែងយកទៅទុកនៅអធិការដ្ឋានខណ្ឌមានជ័យ ដែលហេតុការណ៍នេះកើតឡើងនៅវេលាម៉ោង០៩យប់ ថ្ងៃទី១២ ខែកក្កដា ឆ្នាំ២០១៧ ជិតអគ្គិសនីកម្ពុជា ផ្លូវបេតុងដីថ្មី ភូមិដំណាក់៣ សង្កាត់ស្ទឹងមានជ័យ ខណ្ឌមានជ័យ ។
ប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុ គេបានឃើញបុរសម្នាក់ បានជិះម៉ូតូម៉ាក ហុងដាឌ្រីម ស៊េរីឆ្នាំ២០១៤ បានធ្វើដំណើរតាមផ្លូវបេតុងដីថ្មី ក្នុងទិសដៅពីលិចទៅកើត ខណៈមកដល់ចំណុចកើតហេតុ ក៏ស្រាប់តែមានបុរសម្នាក់ បានបើកម៉ូតូបង្កម៉ាក ហុងដាឌ្រីម ស៊េរីឆ្នាំ២០០៩ ពណ៌ខ្មៅ បានធ្វើដំណើរតាមផ្លូវបេតុងដីថ្មី ក្នុងទិសដៅបញ្ច្រាសទិសគ្នា ពីកើតទៅលិច ក្នុងល្បឿនលឿន លុះមកដល់ចំណុចកើតហេតុ បានរេចង្កូតចូលទៅផ្លូវម្ខាងទៀត ជ្រុលទៅបុកនឹងម៉ូតូ ហុងដាឌ្រីម ស៊េរីឆ្នាំ២០១៤ ពេញទំហឹង បណ្ដាលឲ្យម៉ូតូ ហុងដាឌ្រីម ស៊េរីឆ្នាំ២០១៤ រងការខូចខាត បាក់បែកផ្នែកខាងមុខ ចំណែកអ្នកបើកម៉ូតូរងរបួស រលាត់ដៃជើងស្រាល ។ ដោយឡែកខាងម៉ូតូ ហុងដាឌ្រីម ស៊េរីឆ្នាំ២០០៩ រងរបួសបែកក្បាលហូរឈាមសន្លប់ស្ដូកស្ដឹង ។ ភ្លាមៗនោះត្រូវរថយន្តសង្គ្រោះបានមកដឹកយកទៅសង្គ្រោះនៅគ្លីនិកសួគ៌ា ចំណែកម៉ូតូវៀចខាងមុខ និងបាក់ក្បាំងចំហៀងខាងឆ្វេង ។
ក្នុងហេតុការណ៍នេះដែរ សមត្ថកិច្ចមូលដ្ឋាន ចំនួនបីខណ្ឌ បានចុះទៅដល់កន្លែងកើតហេតុ រួចហើយបានរុញច្រានរឿងទឹកដីដាក់គ្នាទៅវិញទៅមក ដោយសមត្ថកិច្ចខណ្ឌមានជ័យថា កើតហេតុនៅទឹកដីខណ្ឌដង្កោ លុះសមត្ថកិច្ចខណ្ឌដង្កោ មកដល់ បានថាទឹកដីខណ្ឌពោធិ៍សែនជ័យ លុះដល់ពេលសមត្ថកិច្ចខណ្ឌពោធិ៍សែនជ័យមកបានថា កើតហេតុនៅទឹកដី ខណ្ឌមានជ័យវិញ ។ បន្ទាប់ពីជជែកវែកញែករឿងទឹកដីអស់រយៈពេលជិះ២ម៉ោងរួចមក ។
ក្រោយពេលកើតហេតុសមត្ថកិច្ចជំនាញខណ្ឌមានជ័យ បានបានសម្រេចចិត្តវាស់វែងយកម៉ូតូទាំងពីរគ្រឿង ទៅរក្សាទុកនៅអធិការដ្ឋាននគរបាលខណ្ឌមានជ័យ ដើម្បីរង់ចាំធ្វើការដោះស្រាយ ៕
ចែករំលែកព័តមាននេះ