ADផ្ទាំងផ្សព្វផ្សាយពាណិជ្ជកម្ម

Picture

បង្ក្រាប​បទល្មើស​ឆក់​ត្រី​២​កន្លែង​ផ្សេង ឃាត់ខ្លួន​មនុស្ស​៣​នាក់

1 ឆ្នាំ មុន
  • កំពង់ចាម

ក្រុម​ជនល្មើស​នេសាទ​ចំនួន​២​ក្រុម​ត្រូវ​បាន​កម្លាំង​សមត្ថកិច្ច​បង្ក្រាប​បានជា​បន្តបន្ទាប់ ក្នុង​នោះ​មាននៅ​ក្រុង​សួង និង​ស្រុក​ក្រូចឆ្មារ ដោយ​ឃាត់ខ្លួន​មនុស្ស​ចំនួន​៣​នាក់ រួម​នឹង

ខេត្ត​ត្បូងឃ្មុំ ៖ ក្រុម​ជនល្មើស​នេសាទ​ចំនួន​២​ក្រុម​ត្រូវ​បាន​កម្លាំង​សមត្ថកិច្ច​បង្ក្រាប​បានជា​បន្តបន្ទាប់ ក្នុង​នោះ​មាននៅ​ក្រុង​សួង និង​ស្រុក​ក្រូចឆ្មារ ដោយ​ឃាត់ខ្លួន​មនុស្ស​ចំនួន​៣​នាក់ រួម​នឹង​ឧបករណ៍​ឆក់​ត្រី​ចំនួន​២​គ្រឿង​ផង​ដែរ ហើយ​ត្រូវ​បាន​បញ្ជូន​មក​កាន់​អធិការដ្ឋាន​នគរបាល​ដើម្បី​សួរនាំ​។

លោក​វរសេនីយ៍ឯក ឈ​ន សុ​ធន់ អធិការ​នគរបាល​ក្រុង​សួង បាន​ប្រាប់​ឲ្យ​ដឹង​នៅ​ថ្ងៃ​ទី​១៣ ខែមករា ឆ្នាំ​២០២៣​នេះ​ថា ដោយ​អនុវត្ត​តាម​ការ​ណែនាំ​របស់​លោក​ឧត្តមសេនីយ៍ទោ ម៉ុ​ន មាគ៌ា ស្នងការ​នគរបាល​ខេត្ត ឱ្យ​កម្លាំង​សមត្ថកិច្ច​យកចិត្តទុកដាក់​បង្ក្រាប​បទល្មើស​គ្រប់​ប្រភេទ​នៅ​ក្នុង​មូលដ្ឋាន​របស់​ខ្លួន ធ្វើ​យ៉ាងណា​រក្សា​ឲ្យ​បាន​ភូមិ​-​ឃុំ​មាន​សុវត្ថិភាព​។

អធិការ​នគរបាល​ក្រុង​សួង​បាន​បន្ត​ថា ហើយ​កាលពី​វេលា​ម៉ោង​១១​និង​២៥​នាទី​យប់ ថ្ងៃ​ទី​១២ ខែមករា កម្លាំង​ប៉ុស្តិ៍​នគរបាល​រដ្ឋបាល​វិហារ​លួង ដឹកនាំ​ដោយ​លោក​អនុសេនីយ៍ទោ កៃ សុផល នាយ​ប៉ុស្ដិ៍ (​ស្ដីទី​) បាន​ចុះ​បង្ក្រាប​ឧបករណ៍​នេសាទ​ខុសច្បាប់ (​ដែក​ឆក់​) នៅ​ចំ​ណុ​វាលស្រែ ស្ថិត​ក្នុងភូមិ​ប្រ​ស្រែ​ក្រោម សង្កាត់​វិហារ​លួង ក្រុង​សួង ខេត្ត​ត្បូងឃ្មុំ​។

លោក​អធិការ​នគរបាល​ក្រុង​សួង បន្ត​ថា ការ​បង្ក្រាប​ខាងលើ ដកហូត​បាន​វត្ថុ​តាង​រួម​មាន ៖ ១-​ដុំ​ឆក់ ចំនួន​១​គ្រឿង និង​២- អា​គុយ ចំនួន​១​។ សមត្ថកិច្ច​យើង​ក៏​បាន​ឃាត់​ជនល្មើស​បាន​ចំនួន​០៣​នាក់ ដោយ​មាន ៖ ១- ឈ្មោះ សត់ ឈឿ​ន ភេទ​ប្រុស អាយុ​៣៧​ឆ្នាំ រស់នៅ​ភូមិ​វាល​ចារ សង្កាត់​វិហារ​លួង ក្រុង​សួង ខេត្ត​ត្បូងឃ្មុំ (​អ្នក​ឆក់​)​។ ២- ឈ្មោះ ស្រេ​ន ស្រ៊​ន ភេទ​ប្រុស អាយុ​៤១​ឆ្នាំ រស់នៅ​ភូមិ​វាល​ចារ សង្កាត់​វិហារ​លួង ក្រុង​សួង ខេត្ត​ត្បូងឃ្មុំ (​អ្នក​ចាប់​ត្រី​)​។ និង​៣- ឈ្មោះ ហាន ហៀ​ប ភេទ​ប្រុស អាយុ​៤៦​ឆ្នាំ រស់នៅ​ភូមិ​វាល​ចារ សង្កាត់​វិហារ​លួង ក្រុង​សួង ខេត្ត​ត្បូងឃ្មុំ (​អ្នក​ចាប់​ត្រី​)​។

លោក​អធិការ​នគរបាល​ក្រុង​សួង​បន្ត​ទៀត​ថា មុន​នឹង​ឈាន​ដល់​ការ​ចាប់ខ្លួន​ក្រុម​បទល្មើស​ឆក់​ត្រី​ទាំងនេះ គឺ​ត្រូវ​បាន​ប្រជាពលរដ្ឋ​នៅ​ក្នុង​មូលដ្ឋាន​រាយការណ៍​មក​សមត្ថកិច្ច ទើប​សមត្ថកិច្ច​រៀបចំ​កម្លាំង ដើម្បី​តាម​ឃ្លាំមើល ហើយ​ក៏​ឃើញ​ជនសង្ស័យ​ទាំង​៣​នាក់​នេះ​ដើរ​ឆក់​ត្រី​តាម​អូរ​ត្រពាំង​មែន ហើយ​ក៏​ត្រូវ​បាន​សម្រេច​ឃាត់ខ្លួន និង​បាន​ហៅ​អាណាព្យាបាល​មក​ធានា​នៅ​ចំពោះ​មុខ​ច្បាប់​មិន​ឲ្យ​មាន​ជា​លើក​ទី​២​បន្ត​ទៀត​នោះ​ទេ បើ​ពុំនោះ​ទេ នឹង​ចាត់ការ​តាម​ច្បាប់​។

ចំណែក​លោក​វី​រៈ​សេនីយ៍​ឯក សួ​ស ស៊ា​ង​លី អធិការ​នគរបាល​ស្រុក​ក្រូចឆ្មារ បាន​ប្រាប់​ឲ្យ​ដឹង​ដែរ​ថា នៅ​ថ្ងៃ​ទី​១១ ខែមករា ឆ្នាំ​២០២៣ វេលា​ម៉ោង​០៤​និង​៣៥​នាទី នៅ​ចំណុច​បឹង​ក្រោយ​ភូមិ​ទី​៣ ឃុំ​ទ្រា ស្រុក​ក្រូចឆ្មារ កម្លាំង​ជំនាញ​នៃ​អធិការដ្ឋាន​នគរបាល​ស្រុក​ក្រូចឆ្មារ បាន​ចុះ​ល្បាត​ក្នុង​មូលដ្ឋាន ហើយ​ក៏​បាន​ជួប​ប្រទះ​ក្រុម​អ្នកនេសាទ​ខុសច្បាប់ (​ឆក់​ត្រី​) ប៉ុន្តែ​ពេល​ឃើញ​សមត្ថកិច្ច​យើង​ភ្លាម ក្រុម​អ្នក​ឆក់​ខាងលើ​នេះ ក៏​បាន​នាំ​គ្នា​រត់គេច​ខ្លួន​អស់ ដោយ​បន្សល់​ទុក​តែ​ឧបករណ៍​ឆក់​មួយ​ចំនួន រួម​មាន​៖ អា​គុយ​ចំនួន​១, ដង​ឈើ​ជាប់​ដែក​សម្រាប់​ឆក់​ចំនួន​២ និង​ដុំ​ឆក់​ចំនួន​១​ផង​ដែរ​។

បច្ចុប្បន្ន​ឧបករណ៍​ឆក់​ខាងលើ ត្រូវ​បាន​កម្លាំង​សមត្ថកិច្ច​យក​មក​រក្សា​ទុក​នៅ​អធិការដ្ឋាន​នគរបាល​ស្រុក​ក្រូចឆ្មារ​។ ហើយ​បើ​តាម​រយៈ​ភ្លើង​ពិល​បញ្ចាំង​ពី​ចម្ងាយ គឺ​ឃើញ​ក្រុម​សង្ស័យ​ឆក់​ត្រី​ពេល​យប់​មាន​គ្នា​ចំនួន​៥​នាក់​បាន​រត់គេច​ខ្លួន​បាត់​អស់​។

ជាមួយ​គ្នា​នោះ សមត្ថកិច្ច​អំពាវនាវ​ដល់​ពលរដ្ឋ សូម​មេត្តា​បញ្ឈប់​សកម្មភាព​ឆក់​ត្រី​ដោយ​ខុសច្បាប់ ប្រសិនបើ​ស្រាវជ្រាវ​ឃើញ ឬ​តាម​ចាប់​បាន​នោះ នឹង​មិន​អត់ឱន​ឲ្យ​នោះ​ទេ ត្រូវ​តែ​ចាត់ការ​តាម​នីតិវិធី​ច្បាប់​។

អត្ថបទសរសេរ ដោយ

កែសម្រួលដោយ