ខេត្តសៀមរាប ៖ កម្លាំងការិយល័យបទល្មើសគ្រឿងញៀន នៃកងរាជអាវុធហត្ថខេត្តសៀមរាប ដឹកនាំកម្លាំង ដោយលោកវរសេនីយ៍ទោ ថា ដាលុច ប្រធានមន្ទីរយុត្តិធម៌ នៃកងរាជអាវុធហត្ថខេត្ត បានឱ្យលោកអនុសេនីយ៍ឯក ធាវ ច័ន្ទតារា នាយការិយាល័យបទល្មើសគ្រឿងញៀន នៃកងរាជអាវុធហត្ថខេត្តសៀមរាប ដឹកនាំកម្លាំងក្រោមឱវាទចុះបង្រាបករណី រក្សាទុក ដឹកជញ្ជូន និងជួញដូរដោយខុសច្បាប់នូវសារធាតុញៀន រហូតឈានដល់ធ្វើការឃាត់ខ្លួនបានជនសង្ស័យប្រុសស្រី ចំនួន៣នាក់ រួចយកមកសួរនាំនៅការិយាល័យជំនាញ ដើម្បីរៀបចំសំណុំរឿងបញ្ជូនទៅតុលាការខេត្ត ចាត់ការបន្តទៅតាមនីតិវិធី ។
ហេតុការណ៍ឃាត់ខ្លួនករណីគ្រឿងញៀននេះ ធ្វើឡើងនៅវេលាម៉ោង១២និង០០នាទី រហូតដល់ម៉ោង២២និង៣០នាទីយប់ ថ្ងៃទី០៤ ខែកក្កដា ឆ្នាំ២០១៧ ស្ថិតនៅចំណុចភូមិគ្រួស សង្កាត់ស្វាយដង្គំ ក្រុងសៀមរាប ខេត្តសៀមរាប ។ លោកវរសេនីយ៍ទោ ថា ដាលុច ប្រធានមន្ទីរយុត្តិធម៌ នៃកងរាជអាវុធហត្ថខេត្តសៀមរាប បានប្រាប់ថា ដោយមានការចង្អុលបង្ហាញពីលោកឧត្តមសេនីយ៍ត្រី ប៉ោ វណ្ណនិត មេបញ្ជាការកងរាជអាវុធហត្ថខេត្ត ក្នុងនោះកម្លាំងជំនាញបានធ្វើការឃាត់ខ្លួនជនសង្ស័យប្រុសស្រី ចំនួន៣នាក់មាន ៖ ១.ឈ្មោះ ឡេស ស្មាអែល ភេទប្រុស អាយុ៣៣ឆ្នាំ (ជួញដូរ) មុខរបរលក់ភេជ្ជៈ ស្នាក់នៅផ្ទះជួលភូមិគ្រួស សង្កាត់ស្វាយដង្គំ ក្រុងសៀមរាប ខេត្តសៀមរាប ២.ឈ្មោះ ជា ចាប ភេទស្រី អាយុ៣៧ឆ្នាំ (ប្រើប្រាស់) មុខរបរកូនឈ្នួល ស្នាក់នៅជាមួយជនសង្ស័យខាងលើ និង៣.ឈ្មោះ អ៊ឹង សុផល ភេទស្រី អាយុ៦២ឆ្នាំ មុខរបរនៅផ្ទះ ត្រូវជាម្តាយក្មេក ឡេស ស្មាអែល ។ បន្ទាប់ពីកម្លាំងជំនាញបានឃាត់ខ្លួនជនសង្ស័យ ព្រមទាំងធ្វើការដកហូតបានវត្ថុតាងរួមមាន ៖ ម្សៅក្រាមម៉ាទឹកកក ចំនួន០៥កញ្ចប់ ស្មើនឹង៤៤.៦០ក្រាម ជញ្ជីងថ្លឹងថ្នាំញៀន០១គ្រឿង ទូរសព្ទ័០៣គ្រឿង ។
បច្ចុប្បន្នជនសង្ស័យប្រុសស្រី ទាំង៣នាក់ និងវត្ថុតាង ត្រូវបានអាវុធហត្ថខេត្តកសាងសំណុំរឿង បញ្ជូនទៅសាលាដំបូងខេត្តសៀមរាប នៅថ្ងៃទី០៥ ខែកក្កដា ឆ្នាំ២០១៧ ដើម្បីចាត់ការតាមផ្លូវច្បាប់ ៕
ចែករំលែកព័តមាននេះ