ការចោលសំរាមចូលក្នុងទន្លេ នៅតែប្រឈមក្នុងការបំពុលបរិស្ថាន
ខេត្តក្រចេះ ៖ ប្រជាពលរដ្ឋរស់នៅក្រុងក្រចេះក៏ដូចជាពលរដ្ឋដែលនៅប៉ែកខាងក្រោមដងទន្លេមមេគង្គ ខ្វាយខ្វល់ពីការបំពុលបរិស្ថាន និងបរិយាកាសក្នុងក្រុង
ខេត្តក្រចេះ ៖ ប្រជាពលរដ្ឋរស់នៅក្រុងក្រចេះក៏ដូចជាពលរដ្ឋដែលនៅប៉ែកខាងក្រោមដងទន្លេមមេគង្គ ខ្វាយខ្វល់ពីការបំពុលបរិស្ថាន និងបរិយាកាសក្នុងក្រុង ដោយសារការចោលសំរាមតាមច្រាំងទន្លេក៏ដូចជាចូលក្នុងទន្លេ និងព្រែកមួយ ពីបងប្អូនពលរដ្ឋដែលតាំងលំនៅតាមច្រាំងទន្លេ ជាពិសេសជនជាតិវៀតណាម។ ការចាក់សំរាមក៏ដូចជាកាកសំណល់ចូលក្នុងទន្លេ និងតាមច្រាំងទន្លេនានាក្នុងក្រុងក្រចេះ បានបង្កជាភាពកខ្វក់ និងបំពុលបរិយាកាស និងបរិស្ថានបានកើតមានធ្ងន់ធ្ងរ ក្នុងអំឡុងរយៈពេលប៉ុន្មានខែចុងក្រោយនេះ បន្ទាប់ពីមានពលរដ្ឋខ្លះពិសេសពលរដ្ឋវៀតណាមមួយចំនួន មិនបានចូលរួមថែរក្សាអនាម័យវេចខ្ចប់សម្រាម់ និងកាកសំណល់ទាំងនោះដាក់តាមឡានដឹកសំរាមនោះទេ ពោលគឺបានវេចខ្ចប់កាកសំណល់សំរាមទាំងនោះ បោះចូលទៅក្នុងទន្លេ និងតាមមាត់ព្រែកនៅខាងក្រោយផ្ទះទៅវិញ។
ក្នុងមួយថ្ងៃៗមានសំរាម និងកាកសំណល់រឹងរាវជាច្រើនត្រូវបានពលរដ្ឋដែលលតាំងលំនៅតាមជួរមាត់ទន្លេ ក្នុងក្រុងក្រចេះ ពិសសសពលរដ្ឋជនជាតិវៀតណាម បានប្រមូលបោះចូលក្នុងទន្លេ បង្កការប៉ះពាល់គុណភាពទឹក និងសុខភាពពលរដ្ឋរស់នៅខ្សែទឹកខាងក្រោម ដែលកំពុងប្រើប្រាស់ទឹកទន្លេ។ ពលរដ្ឋដែលតាំងទីលំនៅតាមជួរមាត់ទន្លេនៅសង្កាត់ក្រគរ ក្រុងក្រចេះ ដែកជាតំបន់មានពលរដ្ឋវៀតណាមរស់នៅច្រើនបានលើកឡើងថា កន្លងមកតំបន់នេះបានកាត់បន្ថយការបំពុលបរិស្ថានដោយសារបោះសំរាមចូលក្នុងទឹកទន្លេដោយសារមានរថយន្តចូលមកប្រមូលសំរាមជាប្រចាំថ្ងៃ។ តែមួយរយៈចុងក្រោយនេះ រថយន្តមិនបានចូលទៅប្រមូលយកសំរាមដែលជាហេតុធ្វើឱ្យពួកគាត់សម្រេចយកសំរាមទាំងអស់នោះបោះចោលក្នុងទន្លេ និងតាមព្រែកអូរនៅក្បែរផ្ទះ បង្កឲ្យមានភាពកខ្វក់គ្មានអនាម័យតាមសហគមន៍ជួរមាត់ទន្លេ។ អាជ្ញាធរបានលើកឡើងឲ្យដឹងថា ដោយសារតែពលរដ្ឋមិនបានបង់ថ្លៃសេវាដល់ក្រុមហ៊ុនអនាម័យក្រុងក្រចេះ ទើបរថយន្តឈប់ចូលទៅប្រមូលយកសំរាមនៅតំបន់នោះ។
តបទៅនឹងស្ថានភាពនេះ ពលរដ្ឋដែលរស់នៅប៉ែកខាងក្រោមដងទន្លេមេគង្គ ក៏ដូចជាពលរដ្ឋដែលចូលរួមអនាម័យបរិស្ថាន បានស្នើឲ្យអាជ្ញាធរមានវិធានទប់ស្កាត់កុំឲ្យស្ថានភាពបំពុលបរិយាកាសដោយសំរាមនេះកាន់តែកើតមានធ្ងន់ធ្ងរថែមទៀត។ ពាក់ព័ន្ធនឹងបញ្ហាខាងលើប្រធានមន្ទីរបរិស្ថានខេត្តក្រចេះ លោក ដួង ឆាយសាវុធ បានអះអាងថា លោកនឹងឱ្យមន្ត្រីរបស់លោកចុះទៅពិនិត្យមើល និងធ្វើការណែនាំដល់ពលរដ្ឋនៅតំបន់នោះ ឲ្យគាត់បានចូលរួមលើកកម្ពស់បរិស្ថានអនាម័យឲ្យបានគ្រប់គ្នា។ ហើយប្រសិនបើពួកគាត់មិនព្រមធ្វើតាមការណែនាំរបស់មន្ត្រីជំនាញទេនោះ លោកនឹងធ្វើការពិន័យ។ លោកប្រធានមន្ទីរបានបន្តថា លោកនឹងសម្របសម្រួលឲ្យលើសេវាប្រមូលសំរាមឲ្យបានសមស្របរវាងក្រុមហ៊ុននិងពលរដ្ឋដើម្បីកុំឲ្យមានការរាំងស្ទះ៕
ចែករំលែកព័តមាននេះ