នារសៀលថ្ងៃទី០១ ខែមករា ឆ្នាំ២០២៣ មន្ត្រីរាជការ អាជ្ញាធរមូលដ្ឋាន គណៈគ្រប់គ្រងសាលា លោកគ្រូ អ្នកគ្រូ និងសិស្សានុសិស្ស បានជួបជុំគ្នាច្រើនកុះករ ក្នុងពិធីចែកប័ណ្ណសរសើរដល់សិស្សពូកែ នៃសាលាបឋមសិក្សា និងវិទ្យាល័យសម្តេចព្រះមហាសង្ឃរាជ បួរ គ្រី ប្រចាំឆ្នាំ
រាជធានីភ្នំពេញ ៖ នារសៀលថ្ងៃទី០១ ខែមករា ឆ្នាំ២០២៣ មន្ត្រីរាជការ អាជ្ញាធរមូលដ្ឋាន គណៈគ្រប់គ្រងសាលា លោកគ្រូ អ្នកគ្រូ និងសិស្សានុសិស្ស បានជួបជុំគ្នាច្រើនកុះករ ក្នុងពិធីចែកប័ណ្ណសរសើរដល់សិស្សពូកែ នៃសាលាបឋមសិក្សា និងវិទ្យាល័យសម្តេចព្រះមហាសង្ឃរាជ បួរ គ្រី ប្រចាំឆ្នាំ២០២១-២០២២ ក្រោមអធិបតីភាពសម្តេចព្រះមង្គលទេពាចារ្យ វង្ស អានេតា សម្តេចព្រះសង្ឃនាយករង នៃគណៈធម្មយុត្តិកនិកាយ នៃព្រះរាជាណាចក្រកម្ពុជា ព្រះមេគណគណៈធម្មយុត្តិកនិកាយខេត្តកណ្តាល និងជាព្រះនាយកក្តាប់រួមនៃសាលាបឋមសិក្សា និងវិទ្យាល័យសម្តេចព្រះមហាសង្ឃរាជ បួរ គ្រី ។
វត្តមានភ្ញៀវកិត្តិយសចូលរួមមាន លោកជំទាវឧកញ៉ាជោតិវតី មហាឧបាសិកាពុទ្ធសាសនូបត្ថម្ភក៍ យិន ផាន្នី ថុង អ៊ុយប៉ាង ទីប្រឹក្សាផ្ទាល់សម្តេចព្រះអភិសិរីសុគន្ធា មហាសង្ឃរាជាធិបតីឧទ្ទេសបណ្ឌិត បួរ គ្រី សម្តេចព្រះមហាសង្ឃរាជនៃគណៈធម្មយុត្តិកនិកាយ នៃព្រះរាជាណាចក្រកម្ពុជា ។
ពិធីដ៏មហោឡារិកនេះ ក៏មានការចូលរួមពីសំណាក់លោកជំទាវ ធម្មហត្ថា មហាឧបាសិកាជាពុទ្ធសាសនូបត្ថម្ភក៍ សៀម សេងហាន ប៉ែនអ៊ាន ទីប្រឹក្សាផ្ទាល់ សម្តេចព្រះអភិសិរីសុគន្ធាមហាសង្ឃរាជាធិបតីកិត្តិឧទ្ទេសបណ្ឌិត បូរ គ្រី សម្តេចព្រះមហាសង្ឃរាជនៃគណៈធម្មយុត្តិកនិកាយនៃព្រះរាជាណាចក្រកម្ពុជា ។ លោកជំទាវធម្មរក្ខិតាមហាពុទ្ធសាសនូបត្ថម្ភក៍ ឆាយ ស៊ីណា ជីវកេង ទីប្រឹក្សាផ្ទាល់ សម្តេចព្រះអភិសិរីសុគន្ធាមហាសង្ឃរាជាធិបតីកិត្តិឧទ្ទេសបណ្ឌិត បួរ គ្រី សម្តេចព្រះមហាសង្ឃរាជនៃគណៈធម្មយុត្តិកនិកាយនៃព្រះរាជាណាចក្រកម្ពុជា ។ លោក ជា ហ្គារូដា នាយកប្រតិបត្តិ និងលោកស្រី ថុង សុវណ្ណរង្សី អភិបាលនៃមជ្ឍមណ្ឌលសារព័ត៌មានកោះសន្តិភាព និងសហការី ក៏បានចូលរួមផងដែរ ។
យោងតាមរបាយការរបស់នាយកសាលាបានឲ្យដឹងថា សម្រាប់ផ្នែកបឋមសិក្សា មានសិស្សានុសិស្សចំនួន៣.០២៨នាក់ ស្រី១.៤៦១នាក់ និងវិទ្យាល័យមានសិស្សានុសិស្សចំនួន១.២៨៩នាក់ ស្រី៦១៤នាក់ ។ សរុបរួមចំនួន៤.៣១៧នាក់ ស្រី២.០៧៥នាក់ ។ លោកគ្រូ អ្នកគ្រូ មានចំនួន១៥១នាក់ ស្រី៨៣នាក់ ។
ចំណែកសិស្សានុសិស្សចូលរួមក្នុងកម្មវិធីមានចំនួន២.៥៣៦នាក់ ស្រី១.២៤៤នាក់ ក្នុងនោះសិស្សានុសិស្សដែលត្រូវទទួលបានប័ណ្ណសរសើរប្រចាំឆ្នាំសិក្សា មានចំនួន២៤៣នាក់ ស្រី១៦៣នាក់ ។
ដោយសារយោងទៅការខិតខំប្រឹងប្រែងរៀនសូត្ររបស់សិស្សានុសិស្ស អស់រយៈពេលពេញ១ឆ្នាំកន្លងផុតមក លោកជំទាវឧកញ៉ា គណៈអធិបតី លោក លោកស្រី ដែលបានចូលរួម ក៏បាននាំយកនូវសៀវភៅ ប៊ិច ខ្មៅដៃ និងថវិកាផ្ទាល់ខ្លួនមួយចំនួន ប្រគេនព្រះសង្ឃ ជូនលោកគ្រូ អ្នកគ្រូ និងចែកជូនបងប្អូនកូនក្មួយសិស្សានុសិស្សទាំងអស់ផងដែរ ។ ដើម្បីឲ្យកាន់តែមានភាពស្និទ្ធស្នាលថែមទៀតនោះ លោកជំទាវ ឧកញ៉ាជោតិវតី មហាឧបាសិកាជាពុទ្ធសាសនូបត្ថម្ភក៍ យិន ផាន្នី ថុងអ៊ុយប៉ាង ទីប្រឹក្សាផ្ទាល់ សម្តេចព្រះអភិសិរីសុគន្ធាមហាសង្ឃរាជាធិបតីឧទ្ទេសបណ្ឌិត បួរ គ្រី បានឡើងថ្លែងមតិសំណេះសំណាល ថ្វាយប្រគេនព្រះសង្ឃគ្រប់ព្រះអង្គ ជូនលោកគ្រូ អ្នកគ្រូ សិស្សានុសិស្ស ដែលមានវត្តមាននៅក្នុងពេលនោះ ។
លោកជំទាវឧកញ៉ា បានសំណូមពរចំពោះបងប្អូនកូនក្មួយដែលកំពុងពេញវ័យសិក្សា ឲ្យខិតខំបន្តការសិក្សា ប្រឹងរៀនឲ្យបានពូកែទៅមុខទៀត ចៀសវាងឲ្យផុតពីការសេពគប់មិត្តភក្តិមិនល្អ ដើរឲ្យឆ្ងាយពីគ្រឿងញៀន ធ្វើជាសិស្សគំរូដើម្បីឲ្យក្លាយទៅ”ទំពាំងស្នងឬស្សី” ។ ចុងបញ្ចប់នៃកម្មពិធីសំណេះសំណាលនេះ គណៈអធិបតីបានប្រគល់ប័ណ្ណសរសើរប្រគេន និងជូនលោកគ្រូ អ្នកគ្រូ សិស្សានុសិស្ស រួចបានថតរូបទុកជាអនុស្សាវីយ៍ប្រកបដោយសេចក្ដីរីករាយក្រៃលែងផងដែរ ៕
ចែករំលែកព័តមាននេះ