រាជធានីភ្នំពេញ ៖ ចាងហ្វាងគេហទំព័រមួយដែលមានឈ្មោះថា «កម្ពុជាតេជោសន្តិភាព» កាលពីព្រឹកថ្ងៃទី៣០ ខែធ្នូ ឆ្នាំ២០២២ បានចូលខ្លួនទៅបំភ្លឺនៅចំពោះមុខស្ថាប័នអយ្យការអមសាលាដំបូងរាជធានីភ្នំពេញហើយ ពាក់ព័ន្ធករណីមន្ត្រីយោធាម្នាក់ប្តឹងចោទប្រកាន់ពាក់ព័ន្ធពីបទ.ហិ.ង្សាដោយចេតនាមានស្ថានទម្ងន់ទោស «ដោយប្រើអាវុធ» បទ.គំរា.មកំហែងថានឹងសម្លា.ប់ និងបទ. កំហែងយក ដែលប្រព្រឹត្តនៅផ្ទះសំណាក់ក្នុងរាជធានីភ្នំពេញ។
តាមប្រភពព័ត៌មានបានបង្ហើបឲ្យដឹងថា តំណាងអយ្យការបានធ្វើការសាកសួរជនសង្ស័យត្រង់ចំណុចសំខាន់ៗ តាមពាក្យបណ្តឹងរបស់ជនរងគ្រោះ ប៉ុន្តែដោយការផ្តល់ចម្លើយនៅមានភាពស្រពិចស្រពិលមិនទាន់ច្បាស់លាស់ជាច្រើន តំណាងអយ្យការក៏បានលើកពេលបន្តការសាកសួរទៅថ្ងៃទី៩ ខែមករា ឆ្នាំ២០២៣ ខាងមុខទៀត ហើយក៏បានអនុញ្ញាតិជនសង្ស័យវិលទៅវិញ ។
ចំណែកជនសង្ស័យដែលគេស្គាល់ថា ជាចាងហ្វាងគេហទំព័រឈ្មោះ «កម្ពុជាតេជោសន្តិភាព» មានឈ្មោះ ស៊ិន ឡូត ពេលចេញពីសាលាដំបូងវិញ បានរៀបរាប់ប្រាប់បណ្តាញព័ត៌មានថា ថ្ងៃនេះ តុលាការបានកោះហៅលោកឲ្យចូលឆ្លើយបំភ្លឺលើបណ្តឹងពីភាគីម្ខាងទៀតដែលគេប្តឹង ។ លោក ស៊ិន ឡូត បន្តថា អ្វីគ្រប់យ៉ាង «តុលាការពិតជាមានសុភវិនិឆ័យ និងផ្តល់នូវអ្វីដែលយើងមានមតិយោបល់ក្នុងពេលដែលយើងសវនាការ» ។
សូមជម្រាបថា យោងតាមដីកាកោះលើកទី១នេះ ចេញដោយលោក ហេង ផេង ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ កាលពីថ្ងៃទី១៦ ខែវិច្ឆិកា ឆ្នាំ២០២២ តម្រូវឈ្មោះ ស៊ិន ឡូត ភេទប្រុស អាយុ៣៦ឆ្នាំ មានទីលំនៅភូមិខ សង្លាត់ច្រាំងចំរេះ២ ខណ្ឌឬស្សីកែវ មុខរបរជាចាងហ្វាងគេហទំព័រ (កម្ពុជាតេជោសន្តិភាព) និងជាម្ចាស់ផ្ទះសំណាក់មង្គលលាភ ចូលខ្លួនទៅឆ្លើយបំភ្លឺលើបណ្តឹងរបស់មន្ត្រីយោធាម្នាក់ ដែលបានប្តឹងចូលទៅស្ថាប័នអយ្យការ ដោយកំណត់មិនឲ្យលើសពីថ្ងៃទី៣០ ខែវិច្ឆិកា ឆ្នាំ២០២២ នោះឡើយ ។
ដើមចមនៃពាក្យបណ្តឹងបានបញ្ជាក់ថា លោក ឆឹង វីរៈមុនីរ៉េត ដែលអះអាងថា ជាជនរងគ្រោះ កាលពីវេលាម៉ោងប្រមាណ៥និង៣០នាទីល្ងាច ថ្ងៃទី២៧ ខែកក្ដដា ឆ្នាំ២០២២ បានណាត់គូស្នេហ៍ ដើម្បីទៅជួបគ្នានៅផ្ទះសំណាក់មួយឈ្មោះ «មង្គលលាភ» ដែលមានទីតាំងស្ថិតនៅភូមតាងួន ផ្លូវទ័ពអាកាស សង្កាត់កាកាប ខណ្ឌពោធិ៍សែនជ័យ រាជធានីភ្នំពេញ នៅក្បែរព្រលានយន្តហោះអន្តរជាតិភ្នំពេញ។
ពេលជនរងគ្រោះទៅដល់មាននារីម្នាក់ទំនងជាម្ចាស់ផ្ទះសំណាក់ បានហុចសោរបន្ទប់ឲ្យភ្ញៀវ ដែលបន្ទប់នោះស្ថិតនៅជាន់ខាងលើ លុះពេលបានសោរហើយជនរងគ្រោះក៏ឡើងចូលទៅកន្លែងសមរម្យ តែដោយសារបន្ទប់នោះអត់មានទឹកបរិសុទ្ធសម្រាប់ប្រើប្រាស់ ជនរងគ្រោះក៏បានស្រែកប្រាប់ម្ចាស់ផ្ទះសំណាក់ថា «សុំទឹកសុទ្ធ១ដបផង» ព្រោះក្នុងបន្ទប់នេះអត់មានទឹកផឹកទេ។ ពេលនោះស្ត្រីដែលជាម្ចាស់ផ្ទះសំណាក់ក៏បានឆ្លើយតបថា «ចាំបន្តិចគាត់យកទៅឲ្យ» ហើយជនរងគ្រោះក៏ចូលងូតទៅងូតទឹកទៅ។
បន្ទាប់ពីងូតទឹករួច ជនរងគ្រោះបានចេញមកវិញ ក៏ឃើញទឹកសុទ្ធ១ដបនៅមាត់ទ្វារបន្ទប់បម្រុងយកផឹក ក៏ស្រាប់លេចមុខបុរសម្នាក់បានដកកាំភ្លើ.ងខ្លីមិនស្គាល់ម៉ាក បាញ់ចំនួន១គ្រាប់ បណ្តាលឲ្យជនរងគ្រោះមានការភិតភ័យយ៉ាងខ្លាំង និងបានច្រានទ្រូងធ្វើការគំរា.មកំហែង ហើយរុញឲ្យចូលទៅក្នុងបន្ទប់ ហើយក៏បានយកដែកថ្នាំងអំពៅប្រហែល៧តឹកវា.យសន្ធាប់ផ្ទួនៗទៅលើជនរងគ្រោះធ្វើឲ្យជនរងគ្រោះយកដៃរង តែត្រូវជននោះចាប់បោ.កក្បាលទៅឥដ្ឋការ៉ូ បង្កឲ្យមានរបួសស្នាមជាំដៃជើង និងជាំភ្នែកទាំងសងខាង ហើយថែមទាំងស្រែកគំរា.មមិនឲ្យតដៃទៀតផង ។
ពាក្យបណ្តឹងបានបញ្ជាក់ទៀតថា ពេលជនដៃដល់បានវា.យទៅលើជនរងគ្រោះ ស្ត្រីម្នាក់ដែលជាម្ចាស់ផ្ទះសំណាក់ក៏នៅទីនោះដែរ ហើយពួកគេថែមទាំងថតវីដេអូរដោយចោទប្រកាន់ថា ជនរងគ្រោះប៉ុនប៉ងចាប់រំលោ.ភប្រពន្ធគេ។ ដោយឃើញទង្វើយ៉ាងដូច្នេះ ជនរងគ្រោះបានព្យាយាមរកមធ្យោបាយ ដើម្បីរត់គេចខ្លួនឲ្យផុតពីអំពើហិ.ង្សានោះ ខណៈជនដៃដល់មានការធ្វេសប្រហែសក៏បានឡើងជិះម៉ូតូកង់បីចេញពីទីនោះទៅ ដោយបន្សល់ទុកម៉ូតូម៉ាកឡេតមួយគ្រឿងនៅផ្ទះសំណាក់មង្គលលាភនោះ។
ក្នុងពាក្យបណ្ដឹងជនរងគ្រោះបានសំណូមពរឲ្យតំណាងអយ្យការ ធ្វើការចោទប្រកាន់ និងផ្ដន្ទាទោសទៅលើជនដៃដល់ឈ្មោះ ស៊ិន ឡូត និងបក្សពួកតាមផ្លូវច្បាប់ និងទាមទារសំណងជំងឺចិត្តចំនួន៤០លានរៀល ។
ពាក់ពន្ធលើពាក្យបណ្តឹងខាងលើនេះ លោក ស៊ិន ឡូត ដែលរងនូវការចោទប្រកាន់នោះ ក៏បានទូរស័ព្ទប្រាប់បណ្តាញព័ត៌មានក្នុងស្រុកកាលពីថ្ងៃទី៩ ខែធ្នូ ឆ្នាំ២០២២ នេះថា លោកជាអ្នកសារព័តិមាន មិនមានអាវុធប្រើប្រាស់នោះទេ ហើយរឿងហេតុដែលកើតឡើងនៅថ្ងៃនោះដែរ ដោយសារតែគេមានការប៉ុនប៉ងប្រព្រឹត្តអំពើរំលោ.ភបំពានមកលើភរិយារបស់ខ្លួន ដែលក្នុងនាមខ្លួនជាប្ដីមិនអាចទទួលយកបានឡើយ។
លោក ស៊ិន ឡូន បញ្ជាក់ទៀតថា លោកមិនជំទាស់ដីកាកោះរបស់អយ្យការអមសាលាដំបូងរាជធានីភ្នំពេញទេ ដែលពេលនេះលោកបានពឹងពាក់មេធាវីការពារដោយផ្លូវច្បាប់ ដើម្បីដាក់ពាក្យសុំពន្យាពេលក្នុងការឆ្លើយ។
តែយ៉ាងណាក្តីករណីខាងលើនេះ ដើម្បីឲ្យមានភាពស្អាតស្អំទាំងសងខាងវិញនោះ ភាគីទាំងពីរគួតែជួបសន្ទនាគ្នានៅចំពោះមុខស្ថាប័នអយ្យការ ដោយបង្ហាញភស្តុតាងដែលមានរៀងខ្លួនផងដែរ មិនអាចគេចវេសពីដំណោះស្រាយតាមផ្លូវច្បាប់នោះបានឡើយ ។
ចែករំលែកព័តមាននេះ