បណ្តាអ្នកជួយសង្គ្រោះនាយប់ថ្ងៃទី២៤ មិថុនា បន្តតាមរុករកអ្នកដែលអាចនៅរស់រានមានជីវិតក្នុងគំនរបាក់បែកក្រោយការបាក់ដីដែលកប់ភូមិមួយនៅភាគនិរតីចិន ដែលបណ្តាលឱ្យមនុស្សជាង១០០នាក់បាត់ខ្លួន ។
បណ្តាអ្នកជួយសង្គ្រោះនាយប់ថ្ងៃទី២៤ មិថុនា បន្តតាមរុករកអ្នកដែលអាចនៅរស់រានមានជីវិតក្នុងគំនរបាក់បែកក្រោយការបាក់ដីដែលកប់ភូមិមួយនៅភាគនិរតីចិន ដែលបណ្តាលឱ្យមនុស្សជាង១០០នាក់បាត់ខ្លួន ។
ភូមិដាច់ស្រយាល XINMO កាលពីថ្ងៃទី២៤ មិថុនា វេលាម៉ោង៥និង៤៥នាទីព្រឹកម៉ោងក្នុងស្រុក រងការវាយប្រហារដោយការបាក់ដីចង្កេះភ្នំនៅខេត្តស៊ីឈួន ហើយផ្ទះដល់ទៅ៦២ខ្នងត្រូវដី និងថ្មបាក់កប់ ។
ដោយដកស្រង់សម្តីរបស់បណ្តាភ្នាក់ងារជួយសង្គ្រោះទីភ្នាក់ងារព័ត៌មានចិនស៊ីនហួរាយការណ៍ថា សាកសពមនុស្សយ៉ាងតិច១៥នាក់ កាយទាញយកចេញបាននាវេលាម៉ោង២២ម៉ោងក្នុងស្រុក ។
ចំណែកអាជ្ញាធរមូលដ្ឋាននៃទីក្រុង MAOXIAN តាមបណ្តាញសង្គមរាយការណ៍ថា អ្នកភូមិប្រមាណជា១១២នាក់នៅតែបាត់ខ្លួន ។ ប្តីប្រពន្ធមួយគូ និងកូនខ្ចីរបស់ពួកគេទើបកើតបាន១ខែត្រូវបានជួយសង្គ្រោះ ហើយបញ្ជូនមកមន្ទីរពេទ្យ ។ យោងតាមអាជ្ញាធរថា មនុស្សជិត២.០០០នាក់ត្រូវបានបញ្ជូន ដើម្បីចូលរួមក្នុងប្រតិបត្តិការជួយសង្គ្រោះ ។ ក្នុងចំណោមអ្នកទាំងនេះមានប៉ូលិស ទាហាន និងជនស៊ីវិល ព្រមទាំងអ្នកពន្លត់ភ្លើងអមដោយឆ្កែ តាមជួយរកអ្នកដែលអាចនៅរស់រានមានជីវិត ។
ជនរងគ្រោះទាំងឡាយកប់ក្នុងគំនរដី និងថ្មទម្ងន់ច្រើនសិបតោន ។ ភ្លៀងធ្លាក់យ៉ាងខ្លាំងរយៈពេលប៉ុន្មានថ្ងៃចុងក្រោយនេះនៅតំបន់ភ្នំនោះ ជាប្រភពនៃការបាក់ដី ។
ប្រធានាធិបតីចិន លោកស៊ី ជីនពីង អំពាវនាវឱ្យធ្វើរាល់ការខិតខំប្រឹងប្រែង ដើម្បីកាត់បន្ថយចំនួនអ្នកស្លាប់ និងរបួស ។
លោក WANG YONGBO អ្នកទទួលខុសត្រូវនៃក្រុមជួយសង្គ្រោះមូលដ្ឋានថ្លែងតាមទូរទស្សន៍ថា នេះជាការបាក់ដីយ៉ាងធំបំផុតមួយ ដែលកើតមាននៅទីនោះ បន្ទាប់ពីការរញ្ជួយដីនៅ WENCHUAN កាលពី៩ឆ្នាំមុន ។ ជាខេត្តទី៤របស់ចិនមានប្រជាជនច្រើនបំផុតដល់ទៅ៨០លាននាក់ ខេត្តស៊ីឈួន ស្ថិតនៅជាប់តំបន់ខ្ពង់រាបទីបេ ដែលកាលពីខែឧសភា ឆ្នាំ២០០៨ ជួបប្រទះនឹងការរញ្ជួយដីខ្លាំងមួយជាប្រវត្តិសាស្ត្របណ្តាលឱ្យមនុស្សស្លាប់ដល់ទៅ៨៧.០០០នាក់ នៅតំបន់ WENCHUAN ស្ថិតនៅចម្ងាយប៉ុន្មានសិបគីឡូម៉ែត្រពីភូមិរងគ្រោះដោយការបាក់ដីនាថ្ងៃទី២៤ មិថុនា ។
លោក TAO JIAN ប្រធានការិយាល័យឧតុនិយមមូលដ្ឋានថ្លែងតាមទូរទស្សន៍ចិន CCTV ថា ក្រោយការរញ្ជួយដីនេះភ្នំមានលក្ខណៈផុយស្រួយដោយក្នុងលក្ខខណ្ឌបែបនេះភ្លៀងខ្លាំងល្មមក៏អាចបង្កឱ្យមានគ្រោះមហន្តរាយបាក់ដីយ៉ាងធំមួយដែរ ។
ការបាក់ដីតែងកើតមានញឹកញាប់នៅតាមបណ្តាតំបន់ជនបទ និងតំបន់ភ្នំរបស់ចិន ពិសេសពេលមានភ្លៀងធ្លាក់ខ្លាំង ។ មនុស្ស១២នាក់ស្លាប់កាលពីខែមករា ដោយសារការបាក់ដីហូរភក់ និងថ្មកប់ សណ្ឋាគារមួយនៃខេត្តហ៊ូបី ។ រួចការបាក់ដី និងហូរភក់ពណ៌ក្រហមមួយកាលពីដំណាច់ឆ្នាំ២០១៥ វាយប្រហារតំបន់ឧស្សាហកម្មមួយនៃទីក្រុង SHENZHEN ជាប់ព្រំដែនជាមួយហុងកុង បណ្តាលឱ្យមនុស្សស្លាប់ និងបាត់ខ្លួនជាង៧០នាក់ ៕
ចែករំលែកព័តមាននេះ