ខេត្តបាត់ដំបង ៖ រយៈពេល៣ឆ្នាំចុងក្រោយនេះ វិស័យសំណង់ផ្ទះល្វែង ហាក់កំពុងលូតលាស់យ៉ាងខ្លាំង ថែមទាំងមានទីផ្សារល្អទៀតផង ។ នេះបើតាមការកត់សម្គាល់របស់មន្ត្រីជំនាញ និងម្ចាស់ក្រុមហ៊ុនវិនិយោគក្នុងស្រុកនានាដែលកំពុងវិនិយោគលើវិស័យនេះយ៉ាងកាក់កបនៅក្នុងខេត្តបាត់ដំបង ។
លោក អ៊ូ ដារី ប្រធានមន្ទីរដែនដីនគរូបនីយកម្ម សំណង់ និងសុរិយោដីខេត្ត បានឲ្យដឹងថា សំណង់ផ្ទះល្វែង និងការពុះដីឡូត៍លក់ បានវិវឌ្ឍន៍ខ្លាំងក្នុងរយៈពេលពី៣ទៅ៣ឆ្នាំចុងក្រោយនេះ ខណៈដែលមានក្រុមហ៊ុនក្នុងស្រុកជិត១០ បាននិងកំពុងវិនិយោគលើវិស័យនេះ នៅក្នុងខេត្តបាត់ដំបងនាបច្ចុប្បន្ន ។
លោក អ៊ូ ដារី បានថ្លែងថា ៖« ការរីកលូតលាស់នៃវិស័យសំណង់ផ្ទះល្វែងនេះ បានបង្ហាញពីការរីកចម្រើនផ្នែកសេដ្ឋកិច្ច រីឯប្រជាពលរដ្ឋក៏មានជីវភាពកាន់តែល្អប្រសើរឡើងដែរ រហូតពួកគេមានលទ្ធភាពទិញផ្ទះល្វែងស្នាក់នៅ និងទិញដីធ្លីសម្រាប់សង់លំនៅឋានសម្រាប់ចែកកូនចៅទៀតផង » ។
ជុំវិញការរីកចម្រើនលើវិស័យសំណង់នេះលោកឧកញ៉ា វែង ម៉ុង ប្រធានក្រុមហ៊ុន«បុរីរំចេក» បានថ្លែងថា បាត់ដំបងជាខេត្តមួយដែលមានសក្ដានុពលខ្លាំងបំផុតផ្នែកសិកម្ម និងឧស្សាហកម្ម ហើយពលរដ្ឋនៅខេត្តនេះ អាចរកចំណូលបានជាមធ្យមប្រចាំថ្ងៃ ។ លោកថា មុនពេលលោកវិនិយោគលើវិស័យសំណង់នៅក្នុងខេត្តដែលមានវ័យចំណាស់មួយនេះ គឺលោកបានសិក្សាយ៉ាងហ្មត់ចត់ទៅលើសេដ្ឋកិច្ច និងពិនិត្យលើជីវភាពរស់នៅរបស់ពលរដ្ឋ ទាំងនៅតាមទីប្រជុំជន និងនៅតាមទីជនបទ ។
លោកឧកញ៉ាបានបញ្ជាក់ថា ៖« នៅខេត្តបាត់ដំបងមានសេដ្ឋកិច្ចល្អប្រសើរជាងបណ្ដាខេត្តដទៃនៅក្នុងប្រទេសកម្ពុជា សូម្បីនៅតាមបណ្ដាឃុំឆ្ងាយៗ ក៏មានផ្សារលក់ទំនិញ សម្រាប់ជួយដោះស្រាយកសិផលរបស់កសិករដែរ ។ ដូច្នេះហើយ ទើបខ្ញុំសម្រេចបោះទុនរាប់លានដុល្លារដើម្បីវិនិយោគលើវិស័យសំណង់ផ្ទះល្វែងនៅក្នុងខេត្តនេះ » ។
ដោយឡែកលោក ហេង យាន ប្រធានក្រុមហ៊ុនអចលនទ្រព្យ«សុខសាន្ត» ដែលវិនិយោគលើវិស័យសំណង់ផ្ទះល្វែង និងពុះដីឡូត៍លក់ដែរនោះ បានថ្លែងថា ការលក់ដីពុះជាឡូត៍ ឬលក់ផ្ទះល្វែងនៅក្នុងខេត្តបាត់ដំបងគឺមានទីផ្សារល្អ ។ លោកថា មានក្រុមហ៊ុនជាច្រើនបាននិងកំពុងកែប្រែដីស្រែចម្ការមួយចំនួនឲ្យក្លាយជា «បុរី»ដែលមានសំណង់ផ្ទះល្វែងព្រោងព្រាត ។ ជាពិសេសនៅតាមភូមិសាស្ត្រនានានៅជាយក្រុង ។
លោក ហេង យាន បានបញ្ជាក់ថា ក្រុមហ៊ុនរបស់លោក បានវិនិយោគលើវិស័យសំណង់ផ្ទះល្វែងនៅក្នុងក្រុងបាត់ដំបងជាច្រើនកន្លែងដែលទីតាំងខ្លះពុះជាដីឡូត៍លក់ រីឯទីតាំងខ្លះសង់ជាផ្ទះល្វែង ឬជាភូមិគ្រឹះសម្រាប់លក់តែម្ដង។ លោកបានបញ្ជាក់ដែរថា ទាំងដីឡូត៍ និងសំណង់លំនៅឋាន គឺលក់ដាច់គួរសម ។ អតិថិជនដែលទិញដី ឬទិញផ្ទះល្វែងពីក្រុមហ៊ុនរបស់លោក ភាគច្រើនមានជីវភាពមធ្យម ហើយមួយចំនួនមកពីតាមបណ្ដាស្រុកនានានៅក្នុងខេត្ត និងមួយផ្នែកទៀត គឺជាអតិថិជនមកពីតាមបណ្ដាខេត្តផ្សេងៗ ។
លោកឧកញ៉ា វែង ម៉ុង ម្ចាស់ក្រុមហ៊ុន «បុរីរំចេក» ក៏បានបញ្ជាក់ដែរថា នៅក្នុងបុរីរបស់លោកមានគម្រោងសង់ផ្ទះជិត២ពាន់ល្វែង ប៉ុន្តែពេលនេះសង់បានជាង៦០០ល្វែង និងលក់ដាច់អស់ជិត៥០០ល្វែងហើយ ។ លោកបានបន្ថែមថា អតិថិជនបានកុម្មង់ទិញច្រើនគួរសមចាប់តាំងពីក្រុមហ៊ុនដំណើរការរហូតមកដល់ពេលនេះ ។
លោកឧកញ៉ា វែង ម៉ុង បានលើកសរសើរថា ទីផ្សាអចលនទ្រព្យនៅខេត្តបាត់ដំបងល្អប្រសើរជាងនៅតាមបណ្ដាខេត្តនានានៅក្នុងប្រទេសដែលបង្ហាញថា ពលរដ្ឋខេត្តបាត់ដំបង មួយចំនួនធំមានជីវភាពល្អ និងរកចំណូលបានពីមធ្យម ទៅបង្គួរ ។
ប្រធានមន្ទីរដែនដី នគរូបនីយកម្ម សំណង់ និងសុរិយោដីខេត្ត លោក អ៊ូ ដារី បានថ្លែងថា បើយោងលើគម្រោងរបស់ក្រុមហ៊ុននានា ដែលមន្ទីរទទួលបាន គឺគម្រោងសំណង់ផ្ទះល្វែងមានសរុបប្រមាណ៨ពាន់ល្វែង ។ សំណង់ដែលបានសង់រួចរាល់បានប្រហែល២ពាន់ល្វែង ហើយក្រុមហ៊ុនកំពុងសាងសង់បន្ត ។ លោក អ៊ូ ដារី ក៏បានទទួលស្គាល់ដែរថា ទីផ្សារអចលនទ្រព្យនៅក្នុងខេត្តបាត់ដំបង ពិតជាល្អប្រសើរមែន។ លោកថា ការរកស៊ីរបស់ក្រុមហ៊ុននានា លើវិស័យអចលនទ្រព្យនៅខេត្តបាត់ដំបងនេះ បើតាមការកត់សម្គាល់ គឺមានការរីកចម្រើនយ៉ាងខ្លាំងក្នុងរយៈពេលប៉ុន្មានឆ្នាំចុងក្រោយនេះ ហើយលោករំពឹងថា វិស័យនេះនឹងរីកលូតលាស់ជាបន្តបន្ទាប់ទៀតទៅថ្ងៃអនាគត ៕
ចែករំលែកព័តមាននេះ