អតីតបុគ្គលិកកាស៊ីណូណាហ្គាវើលដ៍ម្នាក់ចូលខ្លួនមកកាន់សាលាដំបូង តាមដីកាកោះលើកទី២(វីដេអូ)
- ភ្នំពេញ
រាជធានីភ្នំពេញ ៖ អតីតបុគ្គលិកកាស៊ីណូណាហ្គាវើលដ៍ម្នាក់ កាលពីរសៀលថ្ងៃទី២៧ ខែធ្នូ ឆ្នាំ២០២២ បានចូលខ្លួនមកកាន់អយ្យការអមសាលាដំបូងរាជធានីភ្នំពេញ តាមដីកាកោះលើកទី២ របស់លោក ឆាយ ហុង ព្រះរាជអាជ្ញារង ដើម្បីឆ្លើយបំភ្លឺតាមពាក្យបណ្តឹងក្រុមហ៊ុន ណាហ្គាវើលដ៍ លីមីធីត ពាក់ព័ន្ធពីបទ.រំលោ.ភលំនៅឋាន ធ្វើឲ្យខូចខាតដោយចេតនាមានស្ថានទម្ងន់ទោស និងចាប់បង្ខាំងដោយខុសច្បាប់។
អតីតបុគ្គលិកម្នាក់ខាងលើនោះមានឈ្មោះ ម៉ម សុវឌ្ឍិន ភេទស្រី អាយុ៣៤ឆ្នាំ មានទីលំនៅភូមិសំរោងក្អែរ ឃុំសំរោងធំ ស្រុកកៀនស្វាយ ខេត្តកណ្តាល។
អ្វីដែលគួឲ្យកត់សម្គាល់នោះ គឺមានក្រុមបាតុករអតីតក្រុមហ៊ុនណាហ្គាវើលដ៍ប្រមាណ៣០ នាក់ ដឹកនាំដោយឈ្មោះ ឈឹម សុខន ភេទស្រី បានមកប្រមូលផ្តុំគ្នាគាំទ្រឈ្មោះ ម៉ម សុវឌ្ឃិន ដែលតំណាងអយ្យការកោះហៅលើកទី២ ដើម្បីសាកសួរ។ ក្រុមអ្នកគាំទ្របានទៅជួបជុំគ្នាមុខបរិវេណសាលាដំបូង ក្នុងគោលបំណងស្តាប់លទ្ធផលចុងក្រោយ ពីជោគវាសនាស្ត្រីអតីតបុគ្គលិកណាហ្គាវើលដ៍ម្នាក់នោះ។
ហើយក៏បានសង្កេតឃើញទៀតថា បើយោងទៅលើបទល្មើសដូចការចោទប្រកាន់មែននោះ ប្រាកដណាស់ ក្រោយពេលតំណាងអយ្យការបើកការស៊ើបសួររួច និងអាចចោទប្រកាន់ជនសង្ស័យជាផ្លូវការ ដើម្បីចាត់បញ្ជូនទៅចៅក្រមស៊ើបសួរសម្រេច តែឃុំខ្លួន ឬមិនឃុំខ្លួនតាមឆ័ន្ទានុសិទ្ធិរបស់ចៅក្រម៕
ចែករំលែកព័តមាននេះ